Movie in a week

[..AHMAD]

مرحبا يا جماعة

بهاد الموضوع كل أسبوع "ابتداءً بيوم السبت وانتهاءً بالجمعة"
رح نحط فلم شفناه وعجبنا، قديم جديد ما بتفرق
رح حاول جاهداً أمن روابط لتحميل الفلم، أو ممكن اذا موجود بين ايديي ارفعو.. ما بيهم
هالموضوع مش بس لعرض الفلم ونشوفو عمدار الاسبوع بس
انما هون بدنا نحكي ونتناقش بكل عناصر الفلم بعد ما نشوفو
يعني كـ تصوير، أداء جماعي، اداء كل ممثل وممثلة لحال،قصة، حبكة، درزة

أول فلم رح اختارو انا

اللي هوي

Green Mile



فلم مأخود عن رواية "Green Mile" للكاتب ستيفن كينج
أحداث الفلم بتدور تماماً حول القصة بدون أي تغيير
بالمختصر الفلم بتدور أحداثو حول سجن "Green Mile" وبالأخص السجين "جون كوفي" الي بكون محكوم عليه بالاعدام "ظلماً وبهتاناً" لكن بيتعوض بقدرات خارقة اكتشفوها لحالكن
ما رح احكي اكتر من هيك .. كرمال اللي مو شايفو ما يسبني ( مع انو أكيد الكل شايفو )

الفلم من بطولة :
توم هانكس - ديفيد مورس - بوني هانت - مايكل كلارك دنكن - جيمس كرومويل.. وكتير غيرهن

تاريخ الفلم: 1999

بالنسبة لرابط الفلم عمارفعو .. بس يخلص بحطلكن ياه

نشالله نلاقي تفاعل

[marioma alghzayala]

انا بحب الغرين مايل .. بزكرني برفيقي كتير

ثانكس ثانكس ل الك

[رجل من ورق]

مطول الرفع شنو مو شايفه لسا؟

[MadMax]

حلوة الفكرة ... عجبتني
بس هالفيلم صرلو عندي كذا سنة ...و لهلأ ما خطرلي احضرو ..
إذا قدرت احضرو بهاليومين ....منبقى منرجع نشارك معكون بشكل ايجابي


ثانكس خيو

[..AHMAD]

انا بحب الغرين مايل .. بزكرني برفيقي كتير

ثانكس ثانكس ل الك

هلا والله مريوم .. ثانكس الك انتي

مطول الرفع شنو مو شايفه لسا؟

لسا ما رفعتو .. حاول تجيبو ازا قدرت .. لأانو الموجود DVD بدي حولو بعدين ارفعو .. بدها تاكل شوية وقت

حلوة الفكرة ... عجبتني
بس هالفيلم صرلو عندي كذا سنة ...و لهلأ ما خطرلي احضرو ..
إذا قدرت احضرو بهاليومين ....منبقى منرجع نشارك معكون بشكل ايجابي


ثانكس خيو

اي اب سمرا ... حاول تحضرو باقرب وقت .. من روائع الأفلام اللي بيدخل فيها الخيال القابل للتصديق .. بيروح نص عمرك ازا ما بتشوفو
وناطرين رجعتك

[saman]

هلأ انا شايفو للفلم شي مرتين او تلاتة ...بس انو قصتو غريبة ما !!

هوي قصتو كتييير حلوة ..... وبيزعل آخرو

بدك نبلش نقاش فيه قبل ما ترفعو !

[jano.]

الفلم حلو ... فلم طويل (زيادة عن اللزوم) بس مع هيك ما بيملل..
فيه أفكار كتيرة يعني خرج كل فكرة تنعمل فلم لحالا... ومع هيك ما اعطو الفكرة الأساسية حقا على أكمل وجه، كأنن مستهونين شوي بقضية الإعدام والكرسي الكهربائي ... يعني أحياناً بتحس حالك حابب تعيش معن بهالسجن عكترة المقالب الظريفة (واحد بيشخ عالتاني أو بيعبّي وشو شوكولا) ولّا الفارة الي بتعمل سيرك بالسجن المقصد أنو فلم متل هاد (طويل وحلو ومؤثر) المفروض انو كان لازم يوقفّوا شوي أكتر ضد قضية الإعدام، من هالناحية فلم The Life of David Gale بيتفوق عالغرين مايل بكتير..

الحلو بالفلم كمان أنو الأحداث تغيرت بشكل فجائي كتير (وبعد شي ساعة من بداية الفلم )لبلشت قصة العملاق الخارق، يمكن البعض يشوفو الشغلة سلبية بس أنا حبيتا..

كمان عجبني بالفلم أنو ماحدا من السجانين حاول يدخل لعالم هالعملاق ... ضل لنهاية الفلم شخصية غامضة..
أحلا شي بالفلم لمّا العملاق الخارق صلّحلو المجاري الفضائية الحيّوية تبع البنى التحتيّة لتوم هانكس وكيف التاني ضل شغّال بالبيت للصبح وأخد إجازة تاني يوم كمان

القصة حلوة... يعني الواحد بيشتهي يسمعا من ختيار متل الختيار الطيّوب يلي بآخر الفلم .. وذكرني هالختيار(لانو انجبر يشوف كل احبابو عم يموتو) بمقولة من فلم Troy "الآلهة تحسد البشر لأن البشر بيموتو" ...
خلص أكتر هيك بيصير ماعاد في لزوم لتحضرو الفلم
لازم ارجع احضرو أنا كمان