أخوية  

أخوية سوريا: تجمع شبابي سوري (ثقافي، فكري، اجتماعي) بإطار حراك مجتمع مدني - ينشط في دعم الحرية المدنية، التعددية الديمقراطية، والتوعية بما نسميه الحد الأدنى من المسؤولية العامة. نحو عقد اجتماعي صحي سليم، به من الأكسجن ما يكف لجميع المواطنين والقاطنين.
أخذ مكانه في 2003 و توقف قسراً نهاية 2009 - النسخة الحالية هنا هي ارشيفية للتصفح فقط
ردني  لورا   أخوية > منتديات عامة > الصـــــــــــالون

إضافة موضوع جديد  إضافة رد
 
أدوات الموضوع
قديم 09/10/2009   #1
صبيّة و ست الصبايا أم الجود
عضو
-- زعيـــــــم --
 
الصورة الرمزية لـ أم الجود
أم الجود is offline
 
نورنا ب:
Dec 2008
المطرح:
من فسط برج إيفل
مشاركات:
1,478

افتراضي التقـــاليد ...؟ ليـــش !!؟


مرحبا ...

اليوم حطيت على بروفايل الفيسبوك تبعي كـ status جملة قريتا بـ ايميل وصلني من فترة و عجبتني .. الجملة بتقول :

{التقاليد هي العادات التي يفرضها الأموات على الأحياء}

و لفت نظري سرعة تفاعل الـ friends مع هالحكي و كلو يا عمل Like يا علّق بما يفيد تأييدو و موافقتو ..
أنا هون صفنت ... انو طيب إذا كلنا منشوف التقاليد تقيلة دم .. و مو عاجبتنا و مالا طعمة .. طيب شو ناطرين لنغيرها ؟؟ لا حدا يقلي : "المجتمع هيك ..!" لأنو المجتمع هو نحنا .. المجتمع منا و فينا مو حدا غريب يعني ... بستغرب الحقيقة كيف منستهجن أشيا كتيرة بمجتمعنا و منرفضا و بالوقت نفسه ما عنا الشجاعة نجاهر بقناعاتنا و نقاتل كرمالا .. منقعد و منتكتف و منستنّى التغيير يهبط علينا من فوق بالقفة ..!!

و مشان ما أنفهم غلط .. لما بحكي عن التقاليد اللي بدها تغيير فهون ما بكون عم بقصد مكارم الأخلاق و العادات الحميدة المتوارثة اللي منتلقاها بتربيتنا و منعلّما نحنا بدورنا لولادنا و أجيالنا الجاية ..
أنا قصدي على مجموعة من التصرفات المفروضة علينا من دون ما نفهم المبرر الها و الداعي للقيام فيها .. مثال بسيط على ذلك لبس الأسود عالميّت ...
انو أكيد لما شخص بيموتلو إنسان عزيز عليه بيميل ليلبس الألوان الغامقة لأنها بتنسجم مع نفسيتو و بتعبر عن حزنو و كآبتو .. بس بتفاجأ مثلاً بكلام بينحكى عن أرملة على غرار : "ييييي يا عيب الشوم عليها .. بس سنة وحدة لبست أسود على جوزها !!!؟"
طيب مين قال انو شدة الحزن و غلاوة المتوفى بتحددهن مدة لبس الأسود ؟!!
ليش منعطي لحالنا الحق نقيّم مكنونات الناس و نحكم على نواياهن من خلال تصرفات سطحية تحت عنوان عريض : "هيك الأصول ..!"

بتحضرني بهالحديث

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 


بآخر مقطع من هالمقال :
اقتباس:
كاتب النص الأصلي : LiOnHeArT.3LA2 عرض المشاركة
كم من القوانين والإجراءات
المطبقة، تطبق بنفس الطريقة وبنفس الأسلوب البيروقراطي غير المقنع منذ
الأزل، ولا يجرؤ أحد على السؤال لماذا يا ترى تطبق بهذه الطريقة؟ بل سيجد أن الكثير
ممن يعملون معه وعلى الرغم من أنهم لايعلمون سبب تطبيقها بهذه الطريقة

يستميتون في الدفاع عنها وإبقائها على حالها

الحكي هون عن البيروقراطية و القوانين القديمة اللي ما عادت صالحة و منسجمة مع المجتمع .. بس أنا بشوف انو نفس الشي تمام بينطبق عالتقاليد اللي منتبناها بشكل أعمى و من دون ما نفكر بجدواها ، أو مرات منشوفها بدون جدوى و مع هيك منقوم فيها حتى ما نشذ عن محيطنا ...


يا ريت نتبادل الخبرات بهالخصوص ..



- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟



- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟



- شو هي التقاليد و العادات -بنظر كل واحد منا- اللي تستحق الانتقاد ..؟




و بحب الناس الرايقة اللي بتضحك على طـول D:
أما العالم المتضايقة .. أنا لأه ما ليش في دول
  رد مع اقتباس
قديم 09/10/2009   #2
صبيّة و ست الصبايا boozy
عضو
-- زعيـــــــم --
 
الصورة الرمزية لـ boozy
boozy is offline
 
نورنا ب:
Mar 2008
المطرح:
العراق الحبيب
مشاركات:
1,410

افتراضي


احب اكمل الجملة الي اثارت انتباهك:
هي قيود الاموات المتخلفين على الاحياء من جيل (ناسا, الانترنت, زرع الاعضاء, الاستنساخ البشري, اصغر روبوت,سيارة بالطاقة الشمسية, الوقود الذري, ووووووووووووو)

لستُ بجسدٍ تسكنه روح.
بل
ثلاثة أرواحٍ
و عقولٍ
و قلوب
جزئها المرئيُّ الصغيرُ
جسدْ.
http://evandarraji.blogspot.com/
  رد مع اقتباس
قديم 09/10/2009   #3
شب و شيخ الشباب suryoyo
مشرف
 
الصورة الرمزية لـ suryoyo
suryoyo is offline
 
نورنا ب:
Dec 2005
المطرح:
اطلال المدينة الفاضلة
مشاركات:
5,118

افتراضي


اقتباس:
لا حدا يقلي : "المجتمع هيك ..!" لأنو المجتمع هو نحنا .. المجتمع منا و فينا مو حدا غريب يعني
هلا لو نجي للتقاليد هي جزء من ثقافة المجتمع ... و هي منطومة معقدة عمرا الاف السنين و تتقدم ببطئ

بس يصير التقدم التكنلوجي أعلى من التقدم الحضاري ... معناها دخلنا مرحلة التخلف الحضاري اللي نعاني منها مجتمعيا

فكثير تقاليد هي مو صح او غلط ... بس ضارت غير مناسبة و خصوصا لجيل الشباب ...

اعطيك امثل اهم من لبس الاسود ..
الطالب من يجي للبكلوريا .. ما يظل احد من الاقارب الا و اجا اعطى رايو بمستقبل الشاب !
من يصير موضوع زواج .. تصير شغلة اصل و فصل .. و عيب و عيب و عيب ...

التقيد بزواج المطلقة او الارملة ...

و نشوف كثير شباب متحمسين للانفتاح وضد التقاليد ... بس من يكبر يبدي يمارس التقييد بالتقاليد على الجيل الثاني .. و يمنع زواج ابنائو من مستوى محتلف ..

لان هو انصقلوا بثقافة المجتمع و صار صعب يتخلى عنها ..
طبعا ما ننسى انو هناك مستفيدين من التقاليد ... مثلا شغلة ورث او شغلة جاه ... الخ


مثلا عنا يجيك يقلك ممنوع تقص شجرة النبق (السدر) .. بس تقطعها يموت واحد من البيت .. بس اذا قطعت الزيتون او البرتقال ما يصير شي

أدعى الناس الى الشفقة ذلك الي يحول أحلامه الى الفضىة و الذهب.. جبران خليل جبران

اذا كان العالم اشتراكيا بالفطرة و رأسماليا بالفطرة و ربما قوميا بالفطرة ... فهل يا ترى كان رجعيا بالفطرة ؟

لن نبق اسرى الماضي ...
  رد مع اقتباس
قديم 09/10/2009   #4
صبيّة و ست الصبايا sandra
مشرف
 
الصورة الرمزية لـ sandra
sandra is offline
 
نورنا ب:
Dec 2007
مشاركات:
3,859

افتراضي


- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟

التقيد بشكل عام مزعج فما بالك إذا متقيدين بشي ما منقتنع فيه
وإذا كان فيها شي من الحفاظ عالأصالة فهالشي بيرجع لطبيعتها ومدى موافقتها النها
يعني في تقاليد بالأعياد أنا بحب الحفاظ عليها طالما مو زاعجتني ومو لاغيتني

- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟
من قبل إي
بس هلا بعرف كيف ساير وقت اللي لازم ساير وكيف بعارض لما لازم عارض




- شو هي التقاليد و العادات -بنظر كل واحد منا- اللي تستحق الانتقاد ..؟


لبس الأسود عالميت بتذكر رفيقتي قبل ما يخلص أربعين أبوها نزلت واشترت بوط رياضة أسود وألو خطين زهري
إي ما ضل حدا ما عتب على هالقلة الاحترام والوفا
يعني لو ما جبتي أنتي المثال كنت أنا رح أحكيه لأن كتير بيضرب على عصبي

في عادة كمان ما بطيقا وهي عادة "نقل جهاز العروس" وفي عادة "الحنّة" ما بحبا بالمدن بس بالريف بحسها ظريفة

ممكن كمان موضوع التبعية للعيلة والحارة والمحيط بشكل يلغي فرديتك أنت كأنسان

هاد يلي خطر ببالي لهلا ...


بس مجملا ما بحب العادات يلي بتحمل طابع التكلّف والنفاق الاجتماعي


// وأنّ حضورك في دمي مسكُ الختام //
  رد مع اقتباس
قديم 09/10/2009   #5
صبيّة و ست الصبايا بنفسجة
عضو
-- مستشــــــــــار --
 
الصورة الرمزية لـ بنفسجة
بنفسجة is offline
 
نورنا ب:
Jun 2007
المطرح:
ضيعة تشرين
مشاركات:
5,641

افتراضي


هلق بالعموميات مش كل العادات والتقاليد بتاخد طابع سيء او مش ايجابي
في عادات وتقاليد كتير حلوة وبتعطي للمجتمع خصوصيتو متل الاحتفال بمناسبة معينة مثلا
متل زيارة ختيارية العيلة بالاعياد ومعايدتون اول شي هيدا تقليد حلو بيلم شمل الاسر
وطبعا في عادات مش ولا بد متل تزويج البنت من ابن عما مثلا
نحنا بوعينا قادرين انو نفرق التقليد المفيد من التقليد الضار او غير المناسب
وقادرين ناخد يلي بنلاقيه مناسب وننبذ يلي بنلاقيه غير مناسب

ياوطني يسعد صباحك
متى الحزن يطلق سراحك
الابتسامة النبيلة هي التي تخرج من قلب يبكي هكذا انا قررت
((((*(*(*(*(*(*(*عصابة الملوك *)*)*)*)*)*)*) ))))
  رد مع اقتباس
قديم 09/10/2009   #6
شب و شيخ الشباب LiOnHeArT.3LA2
عضو
-- مستشــــــــــار --
 
الصورة الرمزية لـ LiOnHeArT.3LA2
LiOnHeArT.3LA2 is offline
 
نورنا ب:
Oct 2007
المطرح:
مشغل سيكارة .. وقاعدلك
مشاركات:
3,492

افتراضي


- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟

اكيد .. وكتير ..
لأنو انا بكره التقيّد بالاساس ..
فكيف ازا شي ماني مقتنع فيه ..
بس كمان متل ما قالت ساندرا ..
في عادات بحب اعملها .. واغلب الاحيان بتكون مانا من عادات مجتمعي او عادات المجتمع اللي حواليي


- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟


عطول .. وهادا الشي كتير بتقاتل انا واهلي مشانو ..
انو ماني مضطر يا اخي انا روح اعمل شغلات .. ما بحبا ولاني مقتنع بأمها


- شو هي التقاليد و العادات -بنظر كل واحد منا- اللي تستحق الانتقاد ..؟

عادات الردّ ..
انو لازم رد العزيمة ..
ولازم ردّ الهدية ..
ولازم رد المدري شو ..
لك حتى كلمة بحبك .. لازم يكون الها ردّ ..


في كمان عادة .. انا بكرهها
هلا بحس غباء مني انو اكرها ..
بس عنجد بكرها وما بقدر ..
هيي عادة التعزية ..
اخي ما فيني عزّي .. ما فيني روح هيك ولاقي مليون بني آدم ممئوت ..
صعبة شوي عليي .. يعني انا هربان من المئت والحزن ..
ما بعرف ..

المهم الي رجعة .. ازا اتزكرت شي..

هاموش :
حلو الواحد يشوف اسمو بموضوع متل الخلق والعالم

,, Abu Mustafa ,,

الخيار لك...والرغبة منك...والحل بيدك...لنكون كلنا معا في سبيل مستقبل أخوية...
..
عقلنا .. ليس وظيفته التفكير .. لكن لرفع مستوى الادرينالين عندما نفعل شيئا منافيا له ..
..
احتجاج دماغي .
  رد مع اقتباس
قديم 09/10/2009   #7
شب و شيخ الشباب suryoyo
مشرف
 
الصورة الرمزية لـ suryoyo
suryoyo is offline
 
نورنا ب:
Dec 2005
المطرح:
اطلال المدينة الفاضلة
مشاركات:
5,118

افتراضي


اقتباس:
كاتب النص الأصلي : LiOnHeArT.3LA2 عرض المشاركة
عادات الردّ ..
انو لازم رد العزيمة ..
ولازم ردّ الهدية ..
ولازم رد المدري شو ..
لك حتى كلمة بحبك .. لازم يكون الها ردّ ..


في كمان عادة .. انا بكرهها
هلا بحس غباء مني انو اكرها ..
بس عنجد بكرها وما بقدر ..
هيي عادة التعزية ..
اخي ما فيني عزّي .. ما فيني روح هيك ولاقي مليون بني آدم ممئوت ..
صعبة شوي عليي .. يعني انا هربان من المئت والحزن ..
ما بعرف ..
ما قللولك كلشي دين بوفا ...

يعني ما عزمك على عرس خالتو .. ما تعزمو بعرسك حتى لو قبل يومين كنت سهرانين سوا
ما اجا بتعزية فلان ... ما تروح تعزيه ..

و هلم جرا
  رد مع اقتباس
قديم 09/10/2009   #8
شب و شيخ الشباب مشلف من المدرسة
عضو
-- أخ لهلوب --
 
الصورة الرمزية لـ مشلف من المدرسة
مشلف من المدرسة is offline
 
نورنا ب:
May 2009
المطرح:
وين ما كان
مشاركات:
267

افتراضي


بصراحة كلامكم كلو عالعين والراس
وأنا حابب اضيف معلومة انو تقاليدنا يلي الكل ( أو بمعنى أصح الأغلبية ) متمسك فيها ومعتبرها بمثابة الشرف هي مو غلط ......
لكن هي غير صالحة في زمن لم يعد فيه معايير ومقاييس ، سألتوني كيف يعني:
احنا بزمن لا يحتمل القيود أو استحضار مواقف قبل شي 150 سنة ، وبالتالي لو بقيت على ما هي عليه من ايام اجداد اجدادنا ما رح نستفيد بالمرة ..... شكرا عالموضوع و الي رجعة

لو أن دموعا قد نزلت منك وسببها ايماني
لعشقت جهنم تأويني وكفرت بكل الأديان
يا حبي الأوحد لا تبكي فدموعك تحفر وجداني
يا صيفي الأخضر يا شمسي يا أجمل أجمل ألواني
هل أرحل حنك وقصتنا أحلى من عودة نيسان
  رد مع اقتباس
قديم 10/10/2009   #9
صبيّة و ست الصبايا butterfly
مشرف
 
الصورة الرمزية لـ butterfly
butterfly is offline
 
نورنا ب:
Jan 2006
المطرح:
قلب الله
مشاركات:
14,333

افتراضي


{التقاليد هي العادات التي يفرضها الأموات على الأحياء}

وا الشجاعة نجاهر بقناعاتنا و نقاتل كرمالا .. منقعد و منتكتف و منستنّى التغيير يهبط علينا من فوق بالقفة ..!!


هلق أنا من الأشخاص اللي بيلتزمو بالتقاليد في حال كانت ما بتمس شي جوهري بيعنيلن
لأنو ما فيكي تضلي شاهرة سيفك بوش المجتمع طول الوقت ، ما فيكي حتى لو بدك
انا ما ملتزمة بكتير تقاليد وعم جابهها .. بس مانو المشروع سهل
يعني عم قول وافعل و عبر .. بس بكتير أوقات في أشيا عم ساير وماني مقتنعة لكن متل اللي مخبي أسلحتو لمعركة أكبر
ليش ما عم نتحداها ، لأنو منخاف .. الإنسان ككائن اجتماعي ( شو بحبو هالمصطلح تبع ارسطو ) اي بيتمنى ينال رضا الجماعة ، وينتمي ألها وهيك ، بيخاف الرفض
والمجتمعات المغلقة واللي بتنتفي فيها الفردية وبيصير مين ما كان من حقو يتدخل بسلوك مين ما كان
ابتداء بجارتكن اللي بتقولي لها الصبح مرحبا ، وما بتتذكر اسمك ، انتهاء بكل عيلتك
هادا كلو بدك تواجهيه وقت ما تلتزمي بعادة أو تقليد معين ،

( خدي مثال صغير ، العروس ما بصير تتجوز إلا من بيت أهلها ، من فترة بكتشف انو عيلتي بيعنيلها هالتفصيل وأنا كنت محسبتن كول وأوبن مايدد
قال هيك الأصول ! ، لك تخيلي تعملي العرس الضهر وتشحطي الناس بين مدينتين ، مشان ما ينقال أنك سافرتي .. بدون جازة ، علما أنو هلق يعني ممكن تكوني مسافرة معو انتو وخاطبين شي سبعين مرة
والأصول هي الأصول ) طيب واحد ما فينو يجاكر كل عيلتو .. حتى لو ما مقتنع
لأنو ما دايما النتيجة قد الخسارة
يعني المربح من المجابهة ما بيساوي التعب المبذول مشانها بكل الأوقات ،

- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟

بيضرب ععصبي أوقات

- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟

اي بكتير اوقات قلت ما رح ساوي واللي بدو يصير ، بس كانت أمور جوهرية ! بتتعلق بأمور حياتية
( خاصة وقت توفى والدي ، اضطريت باكتر من موقف أني جابه لما يتم التعامل معي أني انثى بيحق لإي حدا يقول رأيو بأسلوب حياتها )

- شو هي التقاليد و العادات -بنظر كل واحد منا- اللي تستحق الانتقاد ..؟
الموت بشكل رئيسي ، ( عادات الندب ، وانن يبكوكي .. غير صحية بنوب ، بتتجمع الناس حواليكي وبتحكيلك وبتحكيلك لبين ما أنتي تنهاري ،
اكل اكل اكل .. تبويس وحضن ، الأفضل يكون عائلي وحميمي وصامت وصلاة حقيقية )
الأعراس .. ( كمان بهورة .. وتفاصيل فيها إرضاء للعادات أكتر ما اهتمام بالشريك )
هدول براسي هلق



انك " فقير إلى الآخر " كما هو فقير إليك " وأنك محتاج إلى الآخر ، كما هو محتاج إليك
الأب جورج

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 



- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 


  رد مع اقتباس
قديم 10/10/2009   #10
شب و شيخ الشباب saman
عضو
-- مستشــــــــــار --
 
الصورة الرمزية لـ saman
saman is offline
 
نورنا ب:
Aug 2006
المطرح:
اليأس !
مشاركات:
2,220

إرسال خطاب MSN إلى saman إرسال خطاب Yahoo إلى saman
Thumbs down


- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟
كتير بيزعجنبي التقيد ... خصيصاً بالتقاليد البالية حتى لو كانت سخيفة وبسيطة كتير

هلأ في شغلات بحب حافظ على محتوى التقليد فيها ... مثلاً برمضان ... لازم يكون في نوع أكل موجود دايماً عالطاولة وبكل يوم ...
ومثلاً كمان .. في عندك العادات التقليدية المنظمة .. انو لازم كل يوم الصبح اشرب قهوة واسمع فيروز ... هي ممكن اعملها فترىة طويلة بعدين مل منها ...وبعد فترة ارجعلها ... بس ما بحب ضل متقيد فيها دايماً دايماً ..لأنو انا من الناس يلي بتحب التغيير وبتكره الروتين كره العمى !

- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟
اي دايماً
انو ليش انا مثلاً لازم رتب غرفتي بعد ما فيق .. مع انو رح ارجع نام بنفس الغرفة ورح ترجع تصير مو مرتبة ...
ليش لازم ارجع عالبيت بكير .. مع انو بكون طول نهاري قاعد بالبيت وبطلع ساعتين مثلاً من الـ 1 بالليل للـ 3 .... انو مثلاً هالساعتين نفسهن لو طلعت اكتر منهن بالنهار ما رح يصير شي .. بس بالليل ممنوع !
انو مثلاً انا بحب احياناً اقعد والغرفة مكركبة ... وانا مرتاح ومروق انو هيك هيي الغرفة ... بيجي حدا من اهلي .. ليش مو مرتب غرفتك ليش مو عامل .. طيب انا هيك مرتاح ... ماني مضطر ساوي شي انا ما بدي ياه ...
ماني مضطر التزم بشي انا ما بحبو !
ماني مضطر كل يوم افطر واتغدى واتعشى مع اهلي.. ماني مضطر فيق من عز دين الصبح منشان قوم اشرب فنجان قهوة مع امي يلي بتفيق قبل الشحادة وبنتا او افطر معها !
(هي الشغلة اليوم صارت معي )
- شو هي التقاليد و العادات -بنظر كل واحد منا- اللي تستحق الانتقاد ..؟
كتير شغلات ...
الاعراس مثلاً ... بحس انو في كتير شغلات بتصير فيها مالها طعمة بنوب .. واحياناً مزعجة ... مثلاً زمور السيارات يلي ع طول الطريق من الصالة لبيت العروس .. انو هاد شو الو طعمة ... بيعبر عن الفرح .. لأ يا سيدي حط موسيقى ولا تزعج البشر بزمورك وخصيصاً ازا كان بنص الليل ! (هي عادة كتير بتزعجني .. وبينطلي واحد بيقللي هي تقاليد العرس! )
لبس الاسود عالميت (مع اني بحب الاسود ) ... بس انو ليش بهالوقت بالزات .. انا ماني مضطر البس اسود ما دام انا ما بدي .. يعني اوك انا زعلان .. شو الو علاقة الزعل بالسواد !
ولك انو بالميكرو يا عمي او بالباص الكبير ... انو ازا اجت بنت لازم تقملها وتقعدها محلك ازا ما في مطرح ... لك يا عمي انو انا ماني مضطر قملها ... بيقولولك لو اختك محلها بترضاها .. بقللن اختي متلها متلي ومتل اياي انسان بهالدنيا بيقدر يوقف متل ما ايا واحد ممكن يوقف ... ومو ضروري قملها منشان تقعد المرا او الصبية يلي بتكون عم بتدور بالسوق صرلها كم ساعة (مثلاً ) ... هي من التقاليد البالية يلي في ناس بيربطوها بالشرف والزوق الشرقي !

وفي تبع انو ازا فتت على بيت جديد لازم تفتلو برجلك اليمين .. اي شو الها طعمة يعني ازا فتت باليمين او اليسار .. رح تخرب الدنية ؟؟!
وعندك كم شغلة كمان ما بقدر اتقيد فيهن ... وكتير بيحاولوا يجبروني عليهن .. انو مثلاً .. لا تاكل بالطريق ... لا تدندن بالطريق ....لا تقعد بالحارة ( او بالطريق ) ... لا تحكي بالطريق ! ... شوي تانية لا تتنفس بالطريق ...
يحرق اخت هالطريق .. اي شو جامع !
وفي عندك عادة انو يتسمى الولد البكر على اسم الاب ( يعني على اسم جدو ) .. انو هي مالها طعمة ابداً .. لك بركي كان اسم الاب قديم كتير ومو حلو ... متل فتحي مثلاً ... انو هاد الولد ما رح يصير مسخرة وقت يكبر وينحط بالمدرسة ويقرف حياتو ويقرف ابو وجدو على هالتسماية !
ولسا في تقاليد بلاوي ... منشان الحفاظ على مظهر الاسرة المحافظة ... وعادات مقيتة جداً

الكلُّ سفّاح و ابنُ سفّـاح
.
القومُ أبناء القومِ يا صــاح
.
عندهم الدّينُ زهقُ أرواح
.
والذّبحُ للنّاس نهجُ إصْلاح
  رد مع اقتباس
قديم 10/10/2009   #11
صبيّة و ست الصبايا أم الجود
عضو
-- زعيـــــــم --
 
الصورة الرمزية لـ أم الجود
أم الجود is offline
 
نورنا ب:
Dec 2008
المطرح:
من فسط برج إيفل
مشاركات:
1,478

افتراضي


اقتباس:
كاتب النص الأصلي : suryoyo عرض المشاركة
اعطيك امثل اهم من لبس الاسود ..
الطالب من يجي للبكلوريا .. ما يظل احد من الاقارب الا و اجا اعطى رايو بمستقبل الشاب !
من يصير موضوع زواج .. تصير شغلة اصل و فصل .. و عيب و عيب و عيب ...
هي لحالا قصة عنتر .. ما بتجي لترتبط بشخص إلا بينطوا العيلة و عيلة العيلة و بيقولوا لك : "سألتوا عنو/عنا ؟؟!!"
انو معلش عدم المؤاخذة ... لمين بدنا نسأل عيني ؟؟ الجيران !!؟ طيب بركي وقعنا على جيران مو طيبات مع الجماعة و حبوا يخدموا و يطقوا براغي
بيصير هيك البني آدم يبني قرارت مصيرية بحياتو على شو قال فلان و شو تبوجأ علان !!؟

اقتباس:
كاتب النص الأصلي : sandra عرض المشاركة
لبس الأسود عالميت بتذكر رفيقتي قبل ما يخلص أربعين أبوها نزلت واشترت بوط رياضة أسود وألو خطين زهري
إي ما ضل حدا ما عتب على هالقلة الاحترام والوفا


يا عيب الشوم ما هنن هدول الخطين الزهري اللي فضحوها لرفيقتك و ورجوا للناس قلة أصلا و محبتا لأبوها ...
الله كبير

اقتباس:
كاتب النص الأصلي : sandra عرض المشاركة
في عادة كمان ما بطيقا وهي عادة "نقل جهاز العروس" وفي عادة "الحنّة" ما بحبا بالمدن بس بالريف بحسها ظريفة
ممكن كمان موضوع التبعية للعيلة والحارة والمحيط بشكل يلغي فرديتك أنت كأنسان
هاد يلي خطر ببالي لهلا ...
بس مجملا ما بحب العادات يلي بتحمل طابع التكلّف والنفاق الاجتماعي
و أنا متلك

عالهامش : انبسطت بردّك بشكل خاص .. اشتقنالك
  رد مع اقتباس
قديم 10/10/2009   #12
صبيّة و ست الصبايا أم الجود
عضو
-- زعيـــــــم --
 
الصورة الرمزية لـ أم الجود
أم الجود is offline
 
نورنا ب:
Dec 2008
المطرح:
من فسط برج إيفل
مشاركات:
1,478

افتراضي


اقتباس:
كاتب النص الأصلي : LiOnHeArT.3LA2 عرض المشاركة
هاموش :
حلو الواحد يشوف اسمو بموضوع متل الخلق والعالم

شكراً علاء .. عالمرور و الإطراء

اقتباس:
كاتب النص الأصلي : بنفسجة عرض المشاركة
هلق بالعموميات مش كل العادات والتقاليد بتاخد طابع سيء او مش ايجابي
في عادات وتقاليد كتير حلوة وبتعطي للمجتمع خصوصيتو متل الاحتفال بمناسبة معينة مثلا
متل زيارة ختيارية العيلة بالاعياد ومعايدتون اول شي هيدا تقليد حلو بيلم شمل الاسر
وطبعا في عادات مش ولا بد متل تزويج البنت من ابن عما مثلا
نحنا بوعينا قادرين انو نفرق التقليد المفيد من التقليد الضار او غير المناسب
وقادرين ناخد يلي بنلاقيه مناسب وننبذ يلي بنلاقيه غير مناسب

كلامك صح لمى و أنا معك .. بس أنا أكيد لمّا بحكي عن الحاجة للتحرر من التقاليد بكون عم بقصد تاني نوع ، لأنو أول نوع أنا ما بعتبرو تقاليد ، هو عبارة عن عادات حميدة
  رد مع اقتباس
قديم 10/10/2009   #13
شب و شيخ الشباب التقرير الجوال
عضو
-- زعيـــــــم --
 
الصورة الرمزية لـ التقرير الجوال
التقرير الجوال is offline
 
نورنا ب:
Nov 2007
المطرح:
U.S.A
مشاركات:
1,282

إرسال خطاب Yahoo إلى التقرير الجوال
افتراضي


إذا سمحتولو شاركّن و عقّب على نقطة الخلط بين العادات و التقاليد و سلوكيات و إنتقادات المجتمع تجاههن.
هلأ التقليد موجود بكل المجتمعات و الحضارات بس النقد تقريبا آخد حيّز كبير بمجتمعاتنا العربية .. بدنا نفرّق بين نقاش التقليد-يللي هوي عادة مكتسبة و متوارثة- و نقاش الامور المرتبية على ممارسة التقليد أو العادة, من نقد أو خلافه.

تذكرت هلأ عادات بيعملها الغرب مثلاً أثناء الزواج و بحفلة العرس العروس بترمي بوكيه الورد يللي شايلتو و يللي بتلقطو بتكون هي التانية يللي رح تتزوج .. تقليد موروث و مُتّبع لهلأ .. و كمان بيقولو عنو Good luck هلأ هالحقي بيتسدّق؟ .. نفسهن الناس يللي عم بيساوو ما بيساوو نتيجة إعتقاد, و إنّما تقليد جميل حابينو و منشان هيك مستمر لهلأ .. في شي كمان شغلة تانية بما يخص الـ Groom قال يا شباب بأنو العروس بتربط شقفة قماش هاد لما اخترعو هالقصة .. هلأ صارت Ribbon و شغلات بلاستيك .. ما علينا بتربطها العروس Around her thigh موصولة بالجرابات لتثبيتها .. فالعريس بعد نهاية مراسيم العرس بيجي بيفك هالريبانة و بيدوّر و بيعطي ضهر للناس و بيرمي هالشغلة يللي بيسموها Garter أي و بيرمي هالـ Garter و يللي بيلقطو بيكون التاني يللي رح يتزوج
مبسوطين كتير عالزواج .. فالعرف بيقول بأنو البنت صارت للعرس من بعد عمل هالشي و كمان للي رح يلقط الريبانه .. طيب هي عادات و تقاليد متوارثة من مآت السنين و مازالت .. بظن لأنها محببة على قلوب الناس.
كمان في عادة بدول شرق آسية هي بانو يحطو صحن بالبيت على شي كومودينو و لازم يكون مليان رز و هاد دليل على عمران البيت بالخير أو هيك شي طبعاً هالامور لاتعد و لاتحصى .

أما العادات يللي لحد هلأ مش ملاقية أي حيّز او مكان بنفوس الناس و يللي سموها عادات و تقاليد بالية بيكون التعامل معها على نمطين .. يا إما تكون شجاع صاحب شخصية ما بتبالي بكلام الناس وقتها بتصير هيك عادات ما بتعني و لا بتساويلك شي .. و الأمثلة كتير هلأ في قصات شعر خارجة عن المألوف و في ناس عاملين بحالهن الهوايل و ماشين بالشوارع مش سائلين .. خارج عن المألوف أو فيك تقول مابيشبه الأعراف و التقاليد .. هلأ في لبسة بتلبسها البنات أنا بحبها بس كمان مش عرف و لا تقليد " جاكيت مع بنطلون و قميص رسمي و كرافا " حلوة كتير .. و مع هالشي صارت خارج العرف أو التقليد .. منرجع للجانب السلبي و للناس يللي بتخاف الشذوذ عن أفكار المجتمع الإعتيادية .. كمان هيك مش غلط لأنك إذا بدّك تكون ضمن هالمجتمع بشكل سليم فأكيد بدّك تتبع تقاليدو و بهاليومين ما عاد في تدققيق كتير.. بس أكيد العرف أو التقليد البالي يللي ما بيدل على شيئ و غير مستحب أكيد بدو ينتسى و بيواجه تمرّد.

أما عن عادات التواصل و التعامل مع الآخرين فهي محببة يعني مقابلة الهدية بالهدية مثلاً .. المجاملات و هيك أمور بتعلب دور بتماسك المجتمع و نشر الحب في.

Flush it down the Loo
  رد مع اقتباس
قديم 10/10/2009   #14
صبيّة و ست الصبايا أم الجود
عضو
-- زعيـــــــم --
 
الصورة الرمزية لـ أم الجود
أم الجود is offline
 
نورنا ب:
Dec 2008
المطرح:
من فسط برج إيفل
مشاركات:
1,478

افتراضي


اقتباس:
كاتب النص الأصلي : butterfly عرض المشاركة
هلق أنا من الأشخاص اللي بيلتزمو بالتقاليد في حال كانت ما بتمس شي جوهري بيعنيلي

لأنو ما فيكي تضلي شاهرة سيفك بوش المجتمع طول الوقت ، ما فيكي حتى لو بدك
انا ما ملتزمة بكتير تقاليد وعم جابهها .. بس مانو المشروع سهل

يعني عم قول وافعل و عبر .. بس بكتير أوقات في أشيا عم ساير وماني مقتنعة لكن متل اللي مخبي أسلحتو لمعركة أكبر

متفقين

اقتباس:
كاتب النص الأصلي : butterfly عرض المشاركة

ليش ما عم نتحداها ، لأنو منخاف .. الإنسان ككائن اجتماعي ( شو بحبو هالمصطلح تبع ارسطو ) اي بيتمنى ينال رضا الجماعة ، وينتمي ألها وهيك ، بيخاف الرفض

والمجتمعات المغلقة واللي بتنتفي فيها الفردية وبيصير مين ما كان من حقو يتدخل بسلوك مين ما كان
ابتداء بجارتكن اللي بتقولي لها الصبح مرحبا ، وما بتتذكر اسمك ، انتهاء بكل عيلتك
هادا كلو بدك تواجهيه وقت ما تلتزمي بعادة أو تقليد معين




على عيني و راسي ... بس كمان إذا الواحد بدو يعمل متل ما الناس بدها من خوفو لا يخسر رضى اللي حواليه بيكون مرات عم يدفع من كيسو هوه .. لأعطيكي مثال بسيط :

من كم سنة طلعت موضة قائمة الهدايا (liste de mariage) مشان هدايا الأعراس .. و الفكرة منطقياً مقبولة كتير و بتناسب العرسان و المعازيم .. بس مثلاً إذا عرسان طالعين على سفر و غربة شو بدهن يساووا بالغراض اللي بدها تجيهن هدايا !!؟

- طيب خلونا ناخد هالمصاري اللي بدكن تهدونا بقيمتها و نحنا هونيك منبقى منشتري فيها الغراض اللي بتلزمنا ...
(بتنط أم العروس و بتقول : شوووووووو !!!!؟؟ بدكون نقول للناس عطونا مصاري ؟؟؟؟!!!! يا عيب الشوم على جثتي
بيقوموا الجماعة مشان يوصلوا لحل وسط يرضي قدر الإمكان جميع الأطراف بيروحوا على محل أدوات منزلية على أساس بدن يعملوا عندو قائمة هدايا و بينقوا هدايا خلـّبية -يعني ما في هدايا ولا هوا غربي- و بيجوا الناس بيدفعوا مصاري حق الغراض المزعومة و بعد هالدعكة كلا بياخدوا العرسان مصرياتون اللي تجمعت بالمحل -10% حق تعبتو للزلمة صاحب المحل و أجرة استقبالو الحلو للمعازيم
هالـ 10% اللي هي تمن هاللفة و الدورة للتحايل على "الأصول" مبلغ الو قيمتو بالنسبة لـ 2 مجوزين جديد ما حلن يطلعوا من قصص مصاريف العرس و نفض البيت و شرا العفش ...
هلأ الحلو بهالمثال اللي عطيتك ياه انو الناس شوي شوي صارت تحسبا غير و قررت تسمّك وش و تتحدى "العيب" و "الأصول" و تحط مصلحتا بالدرجة الأولى ، و صرنا نشوف أرقام حسابات مصرفية ببطاقات الدعوة .. هلأ يمكن أول و تاني كرت من هالنوع وصلوا لأهلي انمسحت بعرسانن الأراضي .. بعدين بلشت الشغلة تصير عادية و طبيعية و صارت البنوك الخاصة -اللي نبتت متل الفطر- تتسابق لتتخاطف العرسان و تعملون -قال يعني- عروض خاصة لفتح حسابات
الشي اللي بيدل انو ممكن لما ندافع عن أفكارنا و قناعاتنا -حتى لو كانت مو منسجمة مع تقاليد زمانا- انو ننصر هالأفكار و القناعات و نعطيها فرصة لتصير مقبولة اجتماعياً
  رد مع اقتباس
قديم 10/10/2009   #15
شب و شيخ الشباب mhsen77
عضو
-- زعيـــــــم --
 
الصورة الرمزية لـ mhsen77
mhsen77 is offline
 
نورنا ب:
Nov 2008
المطرح:
بين البيت و الشغل ما عم افضى لشي تاني
مشاركات:
1,497

إرسال خطاب MSN إلى mhsen77 إرسال خطاب Yahoo إلى mhsen77
افتراضي


النا زمان عن مواضيعك الحلوة ام الجود


- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟
حسب التقليد مو كل شي بيزعجني في امور بسيطة وشكلية و خفيفة يمكن مو مستاهلة انو الواحد يوقف عندا و في كمان تقاليد انا ضدها بالمطلق
و العادات يلي عم نحاول نفرضها هلأ و يلي عم يحاربها الجيل الاقدم او المحافظين عالاصالة بتعبير تاني بيوم من الايام هي يلي رح تكون اصالة و العادات الجديدة هي الغريبة عالمجتمع لهيك ما في شي ثابت

- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟

ما بتذكر حالي نحطيت بهيك موقف
يمكن لاني متعود اعمل يلي بدي ياه الى حد ما
بس انو المسايرة و احترام مشاعر الاخرين واجب بفرضو على حالي


  رد مع اقتباس
قديم 10/10/2009   #16
شب و شيخ الشباب Nasserm
عضو
-- زعيـــــــم --
 
الصورة الرمزية لـ Nasserm
Nasserm is offline
 
نورنا ب:
Aug 2009
المطرح:
نقطة زرقاء باهتة
مشاركات:
998

افتراضي


- شو هي التقاليد و العادات -بنظر كل واحد منا- اللي تستحق الانتقاد ..؟

ممممممممممممم.. كتيرة.. مثلاً..

القصص العائلية اللي بلا طعمة..
يعني الزيارات أو الأخد والعطى مع حدا ما بتتفق معو ولا بتحبو ولا بيحبك.. ولا بتفهمو ولا بيفهمك..
بس شو؟ بيقربك..

عدم احترام الصغير..
هاي كانت مكرّهتني حياتي أنا وصغير.. ما حدا بيخليك تحكي.. وإذا حكيت.. ما حدا بيسمعك متل الخلق.. وإذا سمعوا.. ما بياخدوك ع محمل الشو اسمو..
وبالبيت.. لما بيجتمعوا "الكبارية".. فـ شغلتك "حوّيص".. جيب هاي.. وخود هاي.. وشوف عمك فلان شو بدّو.. وعمّك علاّن شو بعلتو..
إنو مين هالمنظوم اللي قال "صغير القوم خادمهم"!!
و ع سبيل الحفاظ ع التقاليد.. بتلاقي بيكبر الواحد وبيعمل باللي أصغر منو.. متل ما عملوا فيه قبل


معليش.. خلّي الولد الصغير يتنمرد ع أهلو.. وبلا ما "يدق" كف ويقوّي..



أصلاً.. قصة السلام.. كمان عادة بتهوّي..
هي بالأصل علامة إنو الواحد ما رح يغدر بالتاني.. فـ بيمد بإيدو إنو مالو مخبّي سلاح..
فـ كيف لما يكون السلام لسّا مع طقطقة بوس.. وتمجيق.. وعبط
(بين أفراد الجنس الواحد).. بأوقات يعني الدنية شوب وعرق ومرض!! يا سلام

بذكر من أكتر المحافظين والممارسين لهالتقليد كان أبو عمار ياسر عرفات




شو في لسّا؟

هيدول ببالي هلق..

ممكن نرجع..

ربما كان عدم الاتفاق أقصر مسافة بين فكرين. (جبران النبي)

آخر تعديل Nasserm يوم 10/10/2009 في 03:16.
  رد مع اقتباس
قديم 10/10/2009   #17
صبيّة و ست الصبايا rama1985
عضو
-- أخ لهلوب --
 
الصورة الرمزية لـ rama1985
rama1985 is offline
 
نورنا ب:
Feb 2008
المطرح:
بهالعالم
مشاركات:
272

افتراضي


في قول قرأتو وعجبني كتير :



( اتباع التقاليد لا يعني أن الأموات أحياء.. بل أن الأحياء أموات)





- هل بيزعجك التقيّد بالتقاليد ؟ أو بتلاقي بهالشي نوع من الحفاظ عالأصالة ؟


العادات والتقاليد والأعراف والثقافة المجتمعية يلي أاخدناهاعن اهالينا وأجدادنا
يلي كمان اخدوها عن أجدادهن وأجداد أجدادهن ما اخدناها بارادتنا
وماحدا سألنا ولا اخد رأينا ازا كانت ضمن قناعاتنا أو مبادئنا
وبالتالي اكيد ايا شي بنفرض فرض بكون مزعج

- هل بشي مرة وقفت و قلت لحالك : "أنا ليش مجبور هيك ساوي ؟" أو "لا ما رح ساوي متل ما لازم و شو ما بدو يصير" ... ؟


هل شغلة بالزات بتصير معي كل يوم تقريبا وبتوقع بتصير مع كتير عالم
مرات بضطر ساير لانو مابحب كون شاذة عن المحيط يلي حواليي
ومرات بساير لانو بحب اهلي كتير ومابحب زعلهن كوني وحيدتهن
ومرات بتمرد وبعمل يلي براسي خاصة ازا كان بيمس خصوصيتي


من فترة وحدة من رفئاتي تزوجت وكانت متفقة مع خطيبها
يعملو حفلة صغيرة وبلا عرس ولا مصاريف ولا مظاهر
ويكون كل شي بسيط بس الاهل من الطرفين عارضو وبشدة
وكلن مصرين بدهن عرس مطنطن وحفلة وصاله ووو
وكانت حجتهن كلام الناس والعادات
يعني شي غريب هلأ ما بيصير الفرح إلا إزا الشب دفع مئات الألوف ؟
ما منفرح إلا إذا لبسنا وتكلفنا وتبروظنا ادام الناس؟
مابصير نفرح بدون مانحسب حساب هاد وهاد


- شو هي التقاليد و العادات -بنظر كل واحد منا- اللي تستحق الانتقاد ..؟


قضايا المرأة بشكل عام المرأة مظلومة
والسبب العادات والتقاليد ونظرة المجتمع الها
والأضواء يلي مسلطة على سلوكها
سواء كانت بنت او زوجة او مطلقة
اكتر بكتير من الأضواء المسلطة على الرجل
وعم نشوف جرائم الشرف يلي السبب الرئيسي
فيا هوي العادات وكلام الناس
وكمان جرائم التار ببعض الدول يلي كمان العادات هيي السبب فيا
هاد غير عادات الزواج والعزا والحجاب
يلي ببعض دول متمسكين في بسبب العادات والتقاليد
مو من منطلق ديني ولا عن اقتناع تام


سوريا يا بلدي يا أحلى البلاد ... دبحتيني بحبك اي حاجي عاد

متى ستعرف كم اهواك يا املا ابيع من اجله الدنيا ومافيها
لو تطلب البحر في عينيك اسكبه او تطلب الشمس في كفيك ارميها

I want to be with you all the time

الكلمات الجميلة تشبه اصحابها
  رد مع اقتباس
قديم 10/10/2009   #18
شب و شيخ الشباب د ر و ي ش
شبه عضو
-- أخ لهلوب --
 
الصورة الرمزية لـ د ر و ي ش
د ر و ي ش is offline
 
نورنا ب:
Sep 2009
المطرح:
**********
مشاركات:
89

افتراضي


اوكي انا معكن انو العادات والتقاليد فيها شغلات مزعجة بس الي بيزعج اكتر انو تصير الشغلة على مبدأ خالف تعرف وفهمكن كفاية

عندما سئل ناجي العلي عن موعد رؤية وجه حنظلة أجاب : عندما تصبح الكرامة العربية غير مهددة ،وعندما يسترد الانسان العربي شعوره بحريته وانسانيته
  رد مع اقتباس
إضافة موضوع جديد  إضافة رد


أدوات الموضوع

ضوابط المشاركة
لافيك تكتب موضوع جديد
لافيك تكتب مشاركات
لافيك تضيف مرفقات
لا فيك تعدل مشاركاتك

وسوم vB : حرك
شيفرة [IMG] : حرك
شيفرة HTML : بليد
طير و علّي


الساعة بإيدك هلق يا سيدي 00:18 (بحسب عمك غرينتش الكبير +3)


Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
Page generated in 0.20696 seconds with 14 queries