محمود الزعبي مصطفى ميرو ناجي العطري

[VivaSyria]

موضوع جديد أصدقائي.. سوف نناقش كل يوم ثلاثة أسماء من المسؤولين الذين شغلو نفس المنصب وبإعتبار نحنا بسوريا يعني يلي بيقعد بيلزق فممكن متنلاقي بعض المناصب شاغلينا غير تنين او ممكن نقارن بين اشخاص من نفس الوزن حتى لو كانو مو رسميين..

أنا رح حط مقتطفات من حياتن و انجازاتن(( يارب لاقي شي انجاز)) و بعدين منقتح باب النقاش..

رؤوساء مجلس الوزراء:

محمود الزعبي (( أبومفلح)) :
ولد في خربة غزالة في محافظة درعا. عمل رئيساً لمجلس الشعب بين عامي 1981 و1987. عين رئيساً للوزراء عام 1987 خلفاً لعبد الرؤوف الكسم، واحتفظ بالمنصب حتى آذار 2000، حين قدم استقالته ثم انتحر (( انتحر بطلقتين بالراس و ثلاثة طلقات بالصدر و من أسلحة مختلفه )).

طبعاً كان رمزاً من رموز الفساد و الإفساد (( متل العاده ما تكتشفو انو فاسد لبعد 40 سنه - مو معقول شو بياخدو وقتن ليكتشفو- )) و قصصه و قصص أولاده لا تخفى على أحد من المناقصات الوهميه لصفقات الطائرات المستعمله لتسعير كل منصب بالحكومه لموضوع الأختام يلي كانت مع مفلح (( بتصور شفتو غزلان في غابة الذئاب)).. المهم استقال و (( انتحر)) و ماتت معو حقيقة و أعضاء الشبكة يلي كانت معو و يلي جزء كبير منها بعدو موجود...

محمد مصطفى ميرو (( أبو مصطفى)) :

كانت الحكومة الأولى التي ترأسها محمد مصطفى ميرو شكلها الرئيس حافظ الأسد بتاريخ 13-3-2000، خلفا لوزارة "المنتحر" محمود الزعبي التي استقالت يوم 7-3-2000، واستمرت هذه الحكومة في عهد الرئيس بشار الأسد قرابة العام وتسعة أشهر حيث قدمت استقالتها بتاريخ 13-12-2001، ثم ترأس ميرو حكومة ثانية استمرت إلى 18-9-2003

طبعا معروف انو حضرتو كان محافظ حلب و يقال انو كان مسعر كل شي بحلب من بير الماء لمخالفات البناء لتزفيت الشوارع لكل شي ويقال انو طلع من حلب بمئات الملايين و مكافأه لجهوده الجباره عين رئيس وزراء وطبعا كمل السرقة هو و ابنو يلي انحجز على أموالو بعد ما اتقلع أبوه.. و يقال أن السيد ميرو ضبط بمطار حلب هو و عائلتو محاولا تهريب 90 مليون دولار بسبع حقائب.. طبعا معتمد عل إنو مابيتفتش و بيطلع من قاعة الشرف (( دخيل هيك شرف)) و كان متوجه لبولونيا (( حلويين البولونيات )) و من وقتها و هو ممنوع من السفر و مختقي حسو..

محمد ناجي العطري:
مواليد حلب عام 1944. يحمل بكالوريوس هندسة معمارية من جامعة حلب عام 1967، ودبلوم تخطيط المدن من هولندا عام 1972. متزوج و له أربعة أبناء، يقال أنه من القومية التركمانية.
كان آخر منصب شغله قبل تبوئه رئاسة الحكومة (مجلس الوزراء) هو نائب رئيس مجلس الوزراء لشؤون الخدمات
و شغل مناصب رئيس مجلس مدينة حلب دورة 1983 - 1987 (( مو معقول حلب شو وجها حلو)) محافظ حمص منذ 26/ 12/ 1993 (( شرط أساسي يكون رئيس الوزراء محافظ سابق مشان يكون حرامي مضمون و بيعرف الطبخة))..
كمان مأثره معروفة بحلب و حمص و حتى إنو أوقف عن العمل و تحول للتفتيش كذا مره و مع هيك بيصير رئيس وزراء و يقال انو كان مسعر رحصة المشروع الصناعي بحمص ب 5 ملايين ليره و ترخيص البناء بمليونين و بير الماء بمليون ويقال أنه من مناقصة مشروع أ وتستراد و نقق واحد قبض مليون دولار (( أحلى شغله بمسؤولينا انن بيسعرو الرشاوي و بيلتزمو بالأسعار يمكن مشان التمويين)).. وطبعا متل العاده بتنفضح كل قصص فسادو بعد ماينشال..

هي كانت لمحه عن هالشخصيات بقا شو رأيكن؟؟


أبطال حلقة الغد نواب الرئيس: رفعت الأسد عبد الحليم خدام فاروق الشرع

[عطر سوريا]

الله يئوويك انا وراااااااااااااااك عندي ملفات ابشع من ملفاتك هع هع

[VivaSyria]

كاتب النص الأصلي : عطر سوريا

الله يئوويك انا وراااااااااااااااك عندي ملفات ابشع من ملفاتك هع هع

لك أنا ماعم حط ملفات لأنو صدقني اذا بدنا نبلش ملفات الأخوية مابتسع أنا حاطط الموضوع للنقاش عن هالشخصيات.. بعدين نحنا وراك ياحبيب بس ماقلتلي من وين جبت الملفات؟؟

[مالي خايف]

الله يقويك يا حبيب بس أنا بظن كلشي معروف والله يقويهن جماعة مكافحة الفساد ما بيشتغلو الا بالناس الهربانين برات البلد مشان ما يحاسبون جوات البلد ويحجزو على أموالون خطيي ما حلوة يكونوا عايشين بنعيم وبعدين ينتقلوا للجحيم وأنا بفضل يا معلم تحط ملفات الفساد تبع المسؤولين الموجودين بالبلد هلأ نحنا بنعرفون بس مشان الشباب الطيبة الي بيتابعوا الموقع يتعرفوا عليهن(الشباب الطيبة يعني المخابرات وأمن الدولة يلي عم يدورو عالناس الي عم تحكي الحق)بظن بيكون أفضل بركي بيتخزولون شي موقف لمصلحة البلد وبعدين بتحكيلنا عن الناس الي هربانة

[VivaSyria]

كاتب النص الأصلي : مالي خايف

الله يقويك يا حبيب بس أنا بظن كلشي معروف والله يقويهن جماعة مكافحة الفساد ما بيشتغلو الا بالناس الهربانين برات البلد مشان ما يحاسبون جوات البلد ويحجزو على أموالون خطيي ما حلوة يكونوا عايشين بنعيم وبعدين ينتقلوا للجحيم وأنا بفضل يا معلم تحط ملفات الفساد تبع المسؤولين الموجودين بالبلد هلأ نحنا بنعرفون بس مشان الشباب الطيبة الي بيتابعوا الموقع يتعرفوا عليهن(الشباب الطيبة يعني المخابرات وأمن الدولة يلي عم يدورو عالناس الي عم تحكي الحق)بظن بيكون أفضل بركي بيتخزولون شي موقف لمصلحة البلد وبعدين بتحكيلنا عن الناس الي هربانة

حبيب أنا ما عم بحكي على الناس الهربانين.. بموضوعي في واحد ميت و التاني بالبلد و التالت على رأس السلطه التنفيذيه لهلأ .. يعني الموضوع هو شرح عن هالمسؤولين و مقارنة بيناتن... بعدين جماعة الأمن يلي بيفوتو لهون بيعرفو كل شي عن المسؤولين و أخر همن بقا ما كتير بيهمني اني صحين.. بكل الأحوال حبيب انشالله يكون عجبك الموضوع

[مالي خايف]

معلم جد مواضيعك الي بتخص السياسة وبتخص البلد لهلأ كلها ممتازة

[souriana]

صديقي بس تفوت عالخط في كم نقطة رح نحكي فيها انا وياك مع بعض ولحالنا
موضوع مميز احييك

[souriana]

ما يأمر عليك ظالم
بس هيك حبيت المناقشة معك لانك بتحترم الطرف التاني بعكس البقية اللي حكيت معهم

لاحظت انو في عامل مشترك بين اللي انشحطو من منصبهم انو بتصير مصادرة لكل اموالهم واموال اولادهم
الشغلة التانية : انو الاولاد عم يحتموا باسم ابوهم ويفظعوا بالبلد مو انو في مسؤولين شرفاء مابيسترجوا يحكوا شي بس لما الاب بينشال بيدقوا برقبة العيلة مرة وحدة

[VivaSyria]

كاتب النص الأصلي : مالي خايف

معلم جد مواضيعك الي بتخص السياسة وبتخص البلد لهلأ كلها ممتازة

شكراً حبيب

[VivaSyria]

كاتب النص الأصلي : souriana

ما يأمر عليك ظالم
بس هيك حبيت المناقشة معك لانك بتحترم الطرف التاني بعكس البقية اللي حكيت معهم

تسلم حبيب

لاحظت انو في عامل مشترك بين اللي انشحطو من منصبهم انو بتصير مصادرة لكل اموالهم واموال اولادهم

بس عالفاضي الحجز عم بيكون لأنو المصاري عم بتكون صارت برات البلد و عم ينحجز على شغلات فاضيه يعني بيت و سياره و حساب بنك فيه خمسين ألف ليره..

الشغلة التانية : انو الاولاد عم يحتموا باسم ابوهم ويفظعوا بالبلد مو انو في مسؤولين شرفاء مابيسترجوا يحكوا شي بس لما الاب بينشال بيدقوا برقبة العيلة مرة وحدة

بتصور انو لو الأب كان صح و مو حرامي كان حط حد لأبنو و كان الولد أساساً ما استرجى يغلط لأنو بيعرف انو أبوه أول واحد رح يحاسبو.. ولا شو رأيك؟؟

[souriana]

كاتب النص الأصلي : VivaSyria

بتصور انو لو الأب كان صح و مو حرامي كان حط حد لأبنو و كان الولد أساساً ما استرجى يغلط لأنو بيعرف انو أبوه أول واحد رح يحاسبو.. ولا شو رأيك؟؟

مزبوط معك حق بس كان عندهم حماية ولما طلعوا انلطشوا وطاروا

[VivaSyria]

كاتب النص الأصلي : souriana

مزبوط معك حق بس كان عندهم حماية ولما طلعوا انلطشوا وطاروا

والله مصيبه ياحبيب اذا بدنا نستنا كل واحد ليطلع مشان يتحاسب... يعني ممنطرهون ليخلصو سرقة و تصير المصاري بسويسرا بعدين منجي منحاسبن؟؟

[souriana]

بس مابعرف انا سمعت غير هيك
هلق لما اعلنو نهاية ايام الزعبي وريحتو ماعاد ينسكت عنها وقرروا يخلصوا منو سمعت انو 6 مليار دولار او اكتر رجعت عميزانية الدولة
هلق وين اهتفت ال6 مليار وشو صار فيها مابعرف بس انو رجعت

[VivaSyria]

صدقني هي إشاعات أنو سته مليار رجعو على الخزينه؟؟ بشرفك في شي عنا بيروح و بيرجع؟؟ بعدين لو انو لهالدرجة المصداقيه بمحاربة الفساد ما كانو جابو لبعدو حرامي أكتر منو و يلي بعدو حرامي أكتر من التنين.. الحقيقه في تطور بألية الإختيار

[BL@CK]

أللي حابب يحكي نكت يروح عا قسم عا الطاير .. و أللي حابب يحشش يروح عا السقيفة ..

و أللي حابب يحكي عن ألله يتصل فيه تلفون أو يصلي أو يعمل قداس

أما هون فا إسم القسم واضح و هوي "الفساد" ..

و توصيف القسم بيدل أنو القسم للفساد و فقط الفساد يعني / مشاكل و حلول /

وجب التنويه .

[ماغنوم56]

محمد مصطفى ميرو (( أبو مصطفى)) :

كانت الحكومة الأولى التي ترأسها محمد مصطفى ميرو شكلها الرئيس حافظ الأسد بتاريخ 13-3-2000، خلفا لوزارة "المنتحر" محمود الزعبي التي استقالت يوم 7-3-2000، واستمرت هذه الحكومة في عهد الرئيس بشار الأسد قرابة العام وتسعة أشهر حيث قدمت استقالتها بتاريخ 13-12-2001، ثم ترأس ميرو حكومة ثانية استمرت إلى 18-9-2003

طبعا معروف انو حضرتو كان محافظ حلب و يقال انو كان مسعر كل شي بحلب من بير الماء لمخالفات البناء لتزفيت الشوارع لكل شي ويقال انو طلع من حلب بمئات الملايين و مكافأه لجهوده الجباره عين رئيس وزراء وطبعا كمل السرقة هو و ابنو يلي انحجز على أموالو بعد ما اتقلع أبوه.. و يقال أن السيد ميرو ضبط بمطار حلب هو و عائلتو محاولا تهريب 90 مليون دولار بسبع حقائب.. طبعا معتمد عل إنو مابيتفتش و بيطلع من قاعة الشرف (( دخيل هيك شرف)) و كان متوجه لبولونيا (( حلويين البولونيات )) و من وقتها و هو ممنوع من السفر و مختقي حسو..

شوف خيو كل الي كاتبو في ما يخص محمد مصطفى ميرو
ما الي تعليق عليه

ما عاد الي بالأحمر
ابنو ما الو لا بخل ولا بالخردل ابنو مانو عارف الله وين حاطو وهل المشاكل
الي عم تحكي عليها براهنك انك انت بتعرف عنها اكتر منو
اول شي ابنه صيدلاني وفاتح صيدليه عا ادو من مصاري ابو طبعا
وتاني شي من معرفتي الشخصيه فيه ان هل الصبي لا بهش ولا بنش
ولا الو بمشاكل هل الدنيا كلها
اقتضى التنويه ليس اكثر

تقبل مروري

[VivaSyria]

كاتب النص الأصلي : ماغنوم56

شوف خيو كل الي كاتبو في ما يخص محمد مصطفى ميرو
ما الي تعليق عليه

ما عاد الي بالأحمر
ابنو ما الو لا بخل ولا بالخردل ابنو مانو عارف الله وين حاطو وهل المشاكل
الي عم تحكي عليها براهنك انك انت بتعرف عنها اكتر منو
اول شي ابنه صيدلاني وفاتح صيدليه عا ادو من مصاري ابو طبعا
وتاني شي من معرفتي الشخصيه فيه ان هل الصبي لا بهش ولا بنش
ولا الو بمشاكل هل الدنيا كلها
اقتضى التنويه ليس اكثر

تقبل مروري

وزير المالية وبناء على احكام المادة 196 من قانون الجمارك رقم9 لعام 1975 وتعديلاته وبناء على المرسومين التشريعين رقم 12 و177 لعامي 952 و969 وبناء على اقتراح مدير الجمارك العام بموجب كتابه رقم 3585 ق ع 2005 بتاريخ 30 -1- 2006 يقرر مايلي:

مادة اولى :يوضع الحجز الاحتباطي على الاموال المنقولة وغير المنقولة العائدة للمخالفين التالية اسمائهم ادناه وعلى اموال زوجاتهم ان وجدت :

1- محسن بن حسين الزلم والدته زهرية المصرية تولد 1965 التل .
2- مصطفى ميرو بن محمد
3- عبد اللطيف الحبشي بن احمد وذلك ضمانا لحقوق الخزينة العامة من الرسوم والغرامات المتوجبة بالقضية رقم 1077- 2005 حرة البالغة قيمتهت 10451154 ليرة سورية، والرسوم المعرضة 456048 ليرة سورية وغراماتهما المستحقة لصالح الخزينة 43632008 ليرة سورية.
4-
مادة 2 ينشر هذا القرار ويبلغ من يلزم لتنفيذه.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وفي موضوع الحجز على أموال ابنه، أكد محمد مصطفى ميرو صدور هذا القرار، وقال في تصريح نشرته صحيفة "الثورة" الرسمية السورية إن "الحجز الاحتياطي هو باسم ابنه مصطفى الذي استورد مع شريكين له موادا أولية من العراق عام 2003 لمصنع الصناعات المعدنية، إلا أن قيام الحرب على العراق أدى لإلغاء عدة عقود ووضعت بالاستهلاك المحلي, ودفعوا كل الرسوم والضرائب كاملة, ومع ذلك رأت الهيئة المركزية للرقابة والتفتيش أن جزءاً من هذه البضاعة مهرب وأحيلوا إلى المحكمة الجمركية.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

بتخيل مافي داعي علق.. بس يبدو معرفتك فيه ماني كتير قويه

[VivaSyria]

ياريت ياشباب نحكي بالوقائع و بيلي شايفينو كلنا بعيونا... أنا عم حاكيكن وثائق.. حاج نحط راسنا بالرمل متل النعام