انو

[Fares]

صحيح أن أيام المعلم تابت كان عصر الإقطاع (متل ما منسميه) بس الله وكيلك من وقت ما إجا الإصلاح الزراعي ومد إيدو ع الأراضي وما عاد حدا اهتم فيها... ومن وقتها صارت المشرفة أرض بور بعد ما كانت جنة من الجنات حسب حكي الوالد!!

[whiterose]

هلىء الموضوع حلو
وأن تقريبا قهمت الزبدة

بس مشكلة هاني أنو ماعم يعرف يربط الأفكار بالجمل

المهم أنا سمعت كتييييييييييييير عن ضيع حمص
سمعت أنها فعلاً بتشبه الريف الأوربي كتير
بالنظافة والرتابة

وان شاء الله رح اعمل مشوار لهنيك هي الصيفية

أما تعليقي عن الموضوع
أذا بدنا نفكر يا هاني بالأختراعات العظيمة يلي اكتشفها الأنسان
بدك ترجع شي الف سنة لورا واكتر

مثلا انت عم تحكي عن تنظيم عمار البيوت بضيعتك

طيب قبل ما تحكي عن التنظيم احكي عن يلي اخترع العمار
وفكَر انو منحط مي على التراب بصيرو وحل منحط الحجر فوق الحجر بيناتهم وحل ومنعمل حيط
هاد بحد ذاتو اختراع مهم لولاه ماكنت انت هلىء قاعد ببيت

هاد ابسط الأختراعات بالنسبة للقرن هاد
لولاه كانت العالم بالشوارع
وعد على ها المثل مثايل

علم البرمجة علم قائم بحد ذاتو
مثل الموبايل مثلا بقولوا لك كيف بسمع صوتي؟؟؟
بقلك العالم يلي اخترعه ببساطة هو عالم ذبذبات واشعاعات لاترى بالعين المجردة
يعني
بلغة العلم 1+1= 2

واسفة على طول السيرة

[يمان Rooooonaldo]

بلغة العلم 1+1= 2

بس مو اي علم

[whiterose]

كاتب النص الأصلي : يمان Rooooonaldo

بس مو اي علم

عود عاقل يمان
بأي علم 1+1=2

يا بكالوريا علمي

[hanny dagher]

وايت روز انتي ما فهمتي شو بدي الموضوع
نطرو لاخر رد بالموضوع لانو هادا الموضوع اخد في اسلوب اني اخدكن على الصين الشعبية وبعدين فجأة طالعكن باميركا
وانا قلت من اول رد انو الفكرة الرئيسية للموضوع ما رح تتوضح لاخر رد (بعد شي تسع ساعات )


خيو فارس المشرفة كانت جنة على ايام تابت واسعتها جنة لهلأ
بس اللي عم يصير فيها انو عم تكبر شوي شوي والعالم فيها عم يزيدو (طبعا في عالم عم تهاجر كمان ) بس الزيادة عم تكون اسرع وبالتالي عم يتوسع العمران على حساب الارض الخضرا
بس اذا بتطلع صوب الاراضي والكروم بينشرح قلبك وبتحس حالك بجنة كتر الارض مانها حلوة

[whiterose]

طيب عم نستنى
وبعدين يعني

ضروري ها السسبينس

[hanny dagher]

تابع لما جرى ذكره في (فقيش)

خيو وقت اللي كنت اقعد فكر بهالبناء او بهالكمبيوتر و طبعا مع كل هالتعقيدات اللي كانت تضرب على التفكير اللي عندي كنت فوت على موضوع اعقد شوي من فكرة الكمبيوتر واروع كتير من فكرة البناء بجوز كتير منكن فكر فيها من قبل او قري عنها وبجوز كتير منكن رح يبلش يفكر فيها بعد ما يقرا هالموضوع فكرة تكوين جسم الانسان شبكن سطلتو انو قليلة يبا كيف هالانسان عايش كيف بيتحرك كيف بيحكي كيف بيشوف كيف بيفكر انو كنت بلش بتفكيري من اعضاء الانسان يعني اطلع على الانسان كراس واجرين وايدين و رئتين وقلب ومعدة ومخ قادر بواسطتن يعمل كل شي (متل الكمبيوتر شاشة وكيبورد وفارة ومعالج ) بعدين صير فكر بكل عضو لحال انو يبا هادا القلب اللي هوي مسؤول عن كل شي بالجسم او هالمخ اللي مسؤول عن تنظيم هالاعضاء صير فكر بتكوينن كل واحد منن مكون من خلايا ومو اي خلايا خلايا مختلفة عن بعضها كمان يا حبيبي هادا اللي ناقص يعني مشان يزيد التعقيد طبعا ما بيخلص التعقيد هون لما بتفكر شو في بقلب كل خلية اعتبارا من سيتوبلاسما لنواة لجسيمات كوندري (ما بعرف شو في اسا نسيت كل العلوم تبع البكالوريا ) غمق اسا لجوا شوي بيجيك هادا اللي اسمو ال DNA يعني كل جسم الانسان كوم وهادا اللي اسمو DNA كوم تاني لما كانو يمثلولنا يا بالبكالوريا كانو يحطو شي الف حرف حد بعضن وكل حرف الو حرف مقابيلو ولازم يكونو متطابقين مع بعضن لانو اذا ما كانو متطابقين بيطلع عنا تشوه بشكل البني ادم واللي بيعجبك اكتر شي انو ترتيب هالحروف بيغير شكل الانسان وبيخلي كل انسان يتميز عن التاني
هلا انا ماني متزكر شو هني الحروف (هني اربع حروف) بس خلينا نقول هني a, p , r , s ولنقول a و p بيتوافقو مع بعضن والتنين البقية بيتوافقو مع بعضن

فاذا عنا هالسلسلة هاي

a p r s s s p r a p s r والسلسلة المقابلة الها
p a s r r r a s p a r s شايف كيف كل حرفين تقابلو مع بعضهن طبعا اي خلل بهالتقابل هادا بيطالع الشخص مشوه بعيد العنكن بس خلينا نقول انو هيك تريتيبها صح وطلع عنا ولد عيونو خضر واشقر
بس شو رايك انو نخربط شوي بهالسلسلة ونغير ترتيب حرف واحد بس يعني مثلا تصير السلسلة

a p r s r s p r a p s r والسلسلة المقابلة
p a s r s r a s p a r s

رح يطلع عنا شخص تاني مختلف تماما ومن المحتمل انو يكون واحد لونو اسود مثلا وعيونو عسليات بس بسبب هالحرف هادا

هلأ هالشي ما بيزكركن بقصة الصفار والواحدات تبعيت الكمبيوتر طيب رح نوقف هون لحظة وارجع استرجع التلت ردود بالموضوع

منظر فني من بيوت عشوائية بناها الانسان
الة عجيبة من مجموعة دارات كهربائية صنعها الانسان

وهون المهم
سلسلة احرف بتخلق انسان بس ما خلقها الانسان
خليك معي لا تضيع

طيب كيف خلقت هالحروف لتخلق انسان ؟
سؤال سريع جدا اليس هذا دليل كافي على وجود الله
الانسان قوة عظيمة قدرت تخلق فن وقدرت تخلق صناعات ما الها حدود بالرغم من تعقيداتها
الله قوة عظيمة قدرت تخلق انسان بالرغم من تعقيداتو

طيب انا رح اسال سؤال تاني
لنفترض انتي مثلا يا شيخ الشباب او يا ست الصبايا ما بتعرفو شي عن الكمبيوتر حلو الكلام طيب ولسبب ما دراسة او هواي او حب استطلاع حبيتو تعرفو عن هالكمبيوتر وتبحرتو بمجال الكمبيوتر وعرفتو كيف بيشتغل الكمبيوتر بالضبط وصرتو تعرفو كل شاردة وواردة و عن طريق الصدفة صارتلكن فرصة لتصنعو كمبيوتر
طيب انتو عندكن المعلومات الرئيسية اللي تشبعتو منها مسبقا وعندكن ادوات تساعدكن بهالمجال
هل انتم قادرين على صنع كمبيوتر ؟ الجواب طبعا نعم لانو ما رح تحتاجو لشي اكتر من معلومات رئيسية وادوات قد لا يكون الكمبيوتر مثالي وقد ينتزع من بعد استخدامين او تلاتة بس بيضل عندكن امل انو طالما عملتو اول مرة بتقدرو تعملو تاني مرة وتاني مرة بيطلع معكن ازبط من اول مرة وهيك لتوصلو لكمبيوتر مثالي حتى لو انتو ما صنعتو اول كمبيوتر

طيب مننتقل للطرف التاني هالعلماء اللي درسو جسم الانسان و تبحرو في بجسم الانسان وعرفو الحروف شو بتعني وعرفو كيف جسم الانسان بيشتغل اذا توفرلهن ادوات لخلق انسان هل رح يقدرو يخلقو ؟ بجوز ما يقدرو يخلقو انسان كامل من اول مرة بجوز هالانسان يطلع احول واخرس ومفشكل تفشكل ويموت بعد يومين بس طالما قدرو يخلقو اول مرة بيضل عندن امل انو بيقدرو يخلقو تاني مرة وتاني مرة بتزبط اكتر من اول مرة هيك ليوصلو لانسان كامل وحتى لو هني ما خلقو اول انسان

بجوز الفكرة مفشكلة شوي وضبابية بس هالفكرة هاي ما بتخليكن تفكرو ولو بشكل بسيط انو طالما انسان قدر يخلق انسان معناتا في احتمال كبير على عدم وجودية الله ومعناتا لازم نرجع نفكر اكتر باصل الانسان الاول او على اقل تقدير بوجودية الله في الوقت الحالي ؟

فكرو فيها شباب وردو عليي خبر

تم

الموضوع غير منقول وغير مترجم نتاج فكري بحت
حياكم جميعا

[abosleman]

بالله انك حشاش
خيو على كلن بس يقدر انسان يخلق انسان من الادوات المخلوق منها الانسان
بنبقى ساعتها بنشوف إذا الله موجود ولا مو موجود

[moon]

I dont know what to say.and I dont think you know what your talking about,and I dont see the connection between God and your PC.all what I see is that you want to show off about your knowledge about PC and that you got the tallest house in your town.also I want to ask who was the first one to put our DNA together ,another human you think.

[handsome]

منيح اني ما قريت الموضوع لليوم .. لانو كنت قتلت هاني لو قريانو من قبل .

هلق عمي هاني انو شو دخل هاي بهاي بهاي .. انا ما كتير استوعبت .. انو انتي استخدمت طريقة لبرهان شي هي عبارة عن شي تاني بيشبهو كتير للاول بس ما هوي نفسو .. انو يعني باعتبارك شبهت الارقام 1 و 0 لال A T G C... هادا بنوب ما يعني انو فينك تشبه طريقة عملون لبعض ..
مثال كتير صغير . انو متل ما انتي تعلمت انو هاي شغلة 1 وال 0 انو هيي بتبين كتير صعبة بس بالحقيقة هيي شغلي كتير بسيطة وسخيفة . لما بتعمل لكل رقم معين معنى معين والكمبيوتر وقتا بيصير عطول يفهم هادا الرقم على انو هادا المعنى ..بس الكمبيوتر مافينو يعرف لحالو انو مثلا بوقت من الاوقات لزم رمز او رقم جديد مافينو لحالو يخترع هادا الرمز . رح يضل عما يستنا ليجي هادا البني ادم ويقلو انو خود تعلم في هادا رمز جديد واسمو هادا الرقم ...
الحلو بالكمبيوتر انو بيكفي تقلو مرة وحدة لحتى يتعلم .. بس لحتى تغير صيغة ال دي ان ايه بدك الاف السنين لانو الجسم بيتعلم لحالو مع مرور الوقت الطويل كتير وبيصير بيعرف انو هادا الشي لازم يغيرو لحتى يقدر يضلو عايش مع هاي البيقة الجديد الي عما تتغير كل يوم .. ومثال كتير صغار عن الموضوع ... انو لما انتي بتخاف بيوقف شعر جسمك كلو . لانو ايام زمان كان الجسم كلو معبا بالشعر ووقت بيوقف الشعر بيبين الجسم اكبر وبيصير الحيوان او الفريسة الي ادامك تخاف منك .. هلق لانو الانسان معدو محتاج لهادا الشعر راح ومعد طلع متل قبل .. لانو صار يعرف انو هادا الشعر معد يخوف حدي هالايام ...
انو يعني ببساطة قصدي انو شغلة ال دي ان ايه اسا اكبر بكتير بكتير من ال 1 وال 0

طب منرجع هلق عالانسان .. انو الانسان متل ما وقت بلش اول الشي بالكمبيوتر بالة كتير بسيطة وسخيفة كتير وما بتعمل غير عملية الجمع وكان وزنا حوالي ال 500 طن ومحطوطة بمخبر كبرو شي 200 متر مربع .. بس مع الوقت عرف يطور حالو شوي شوي .. وصار يشوف شو الاغلاط الي مساوية ومعد ساواها وشاف شو هي الشغلات الي فينو يحسنة وحسنا .. ومتل ما هلق جماعة النازا او جماعة البحوث العسكرية بالعالم بتعرف و بتستخدم شغلات اكبر بكتير ومتطورة اكتر بكتير من الشغلات العادية الي نحنا منستخدمة .. يعني متل ما تتطورت ايام زمان الكيميا من ورا العلماء الي كانو عما يدورو على طريقة مشان يصنعو الذهب فيا من مواد ارخص .. هلق هيك عما يصير بمختبرات التطور العسكري وغزو الفضاء..
وهادا الانسان الي انتي عما تقول انو بس العالم يقدرو يصنعو من العدم وقتا بيكون هادا البرهان على عدم وجود الله . هاي ما كتير ظابطة ... لانو الانسان من هلق بلش بس عالصغر انو يبني خلية .. يعني شوية بروتينات وشوية فيتامينات بيجمعون مع بعض وبيساويلون شغلات انا ما بفهم فيا بس بطريقة او باخرة بتصير عبارة عن شي حي .. هلق اساتو لهلق عالصغير كتير كتير .. بس انو الشغلة مانا كتير مطورة لتصير على انسان كامل .. بس شو بيصير حزرك وقتا .. بيجو اهل الدين وبيقولو انو هوي الله الي عطانا هاي القدرة واكيد في الو هدف من وراه هالشي ...
يعني ببساطة انو الاشخاص المتدينين ما بيقتنعو لا بالشي النظري ولا بالشي العملي انو هادا الشي الي صاير هلق والي نحنا منسمي كوكب الارض وكلشي عليه من كائنات حية .. هاي ما دخلو الله فيا ... وبعد كام سنة بيصير العالم ما يقدرو يستوعبو كيف كان الانسان هالقد غبي لحتى فكر انو هالشغلات كلى هوي الله الي ساواها .. متل ما نحنا منتضحك هلق عالفراعنة الي عبدو الشمس على اساس هيي الي ساوت كلشي او على عبادي الاصنام الي نحنا منقول كيف عبدو شي هني صنعو بايدون ونحنا هلق عما نعبد شي صنعوا كام شخص وخلونا نقتنع بحكيون مع انو ابعد ما يكون عن المنطق .. بس وقت الواحد بيفكر بالموضوع بمنطق بيصير كافر .. يعني الفكرة لحالة هاي اسا احلى بكتير بكتير من كيف الانسان قدر يبني شي حلو متل المشرفة او شي خيالي متل الكمبيوتر او الكائنات الحي تتطور حالة عن طريق ال دي ان ايه الي اسا بدنا كتير لتعرف عنو شوي ..

سوري عال لت والعجن .. بس الفكرة كانت حلوي وعجبتني
ميرسي مسيو هاني

[hanny dagher]

هلأ الموضوع كلو كان عبارة عن طرح للافكار اللي بفكرها وقت بطلع بوقف وبشوف منظر الضيعة بجوز ما في ترابط انو شو جاب الكمبيوتر للمشرفة لجسم الانسان بس في اوقات ما فيك تتحكم بشو عم تفكر بس هدول الافكار كانت تخطرلي كل مرة اطلع فيها على السطح

شو الرابط بين الكمبيوتر وجسم الانسان بجوز ما يكون في رابط ملموس
بس فكر فيها كشكل انو انتي شايف الكمبيوتر من برا كمجموعة قطع بلاستيكية ومعدنية بس لما بتتعمق بالبنية الداخلية للكمبيوتر وقصص التعقيد
ولما بتشوف الانسان كمجموعة اعضاء عم تتحرك وبتتعمق بالبنية الداخلية تبعو وقصص التعقيد
الا وما تلمح ولو بشكل بسيط انو في شي تشابه بالعمل بيناتن انا ماني عم قول انو الكمبيوتر صار متل الانسان عم قول انو في تشابه كتعقيد في البنية الداخلية للاعضاء عم يكون هالكائن (انسان او كمبيوتر ) اللي عم نشوفو قدامنا

بالموضوع طرحت عبارة عن فكرتين
فكرة مناظر حلوة مستوحاة من سؤال كان "الملحدين" يسالو للمؤمنين انو وين الله يبا يكونو المؤمنين جاوبوهن انو طلع بهالمناظر الطبيعية طلع بهالشجرة الحلوة سماع صوت هالعصفور بتلاقي وجود الله فيهن بالفكرة اللي طرحتا هون انو له الانسان في يعمل كمان مناظر حلوة

وفكرة انو تعقيد جسم الانسان واللي فكرة بتمخول بس الانسان قدر يفهما وقدر يخلق شي ومتل ما قال هاندسوم انو هلأ بلشو بالخلية ومع الوقت رح يخلقو انسان كامل

بس فكرة انو الانسان قادر على خلق انسان هاي عم تناقض كل شي تعلمنا من نحنا وصغار عن فكرة وجود الله الخالق اللي لا مثيل له

قد يكون الله موجود من قبل (مع انو اشك بوجودو قبل وحاسس انو العلم رح ياثبت عدم وجوديتو ) وخلق الانسان لكن شو دليلك على وجودو هلأ ؟

بجوز الافكار ما كانت واضحة بسبب اسلوب الكتابة يعني لو كنت عم احكي حكي كنت وضحت اكتر بس يا ست moon انا عرفان تماما عن شو عم احكي وعرفان تماما شو عم فكر وعرفان انو كل واحد بيطلع من قوقعة الدين اللي مغلف حالو فيها ويفكر شوي بمنطق وعلم رح يتفاجأ بالتناقض الرهيب بين العلم والاديان ( اذا ما بدكن تقولو الله مع انو انا بقولا بين العلم والله )
الموضوع ما كان لقول انو بيتنا اعلى بيت بالضيعة لانو انتو ما رح يهمكن هالشي ولا لفرجي معلوماتي بالكمبيوتر وبجسم الانسان لانو في ناس افهم مني بهيك شغلات وقادرين يحكو احسن مني بهيك مواضيع الموضوع كان مجرد طرح تساؤل (قد يكون موجود بس براسي ) حول وجودية الله بس استخدمت هالاسلوب القصصي هادا

حياكم جميعا

[راديا]

كاتب النص الأصلي : abosleman

انت شكلك رح تفوتني بالحيط
وانا اساسا هالشغلة ما عم تدخل مخي
شغلة الاكترون يعني
ناطر لشوف بركي بيطلع معي نتيجة وبستوعب

هاااني شو بنا ؟يعني شو هوي المغزى من هيدا كلو ؟ممممم ايييي يمكن ما فهمت

[moon]

can you give me an example .

[hanny dagher]

كاتب النص الأصلي : moon

can you give me an example .

طيب فكري من بداية الخلق

مين هوي الانسان الاول ؟ ادم وحوا
كم ولد كان عندن ؟ 2 قابيل وهابيل وبعدين اجاهن صبي تالت
قابيل قتل هابيل
شو صار عنا ادم حوا قابيل وهابيل من وين اجت بقية هالعالم ؟

فكرة تانية متل ما علمونا بالانجيل او بالقرآن او او او ادم وحوا خلقو بالجنة واكلو التفاحة ونزلو على الارض ( المسيحيين الاميركان بيآمنو انو ادم وحوا خلقو على الارض بعكس ما تعلمنا نحنا المسيحيين العرب )
طيب ايمت صار الخلق وايمت نزلو على الارض ؟

[moon]

بس روح قرا تكوين اصحاح 5 السطر الرابع والخامس
وتكوين اصحاح 2
السطر15

[فراشة]

الابداع والانتاج شي حلو
بس مهما وصل ابداع الانسان وانتاجو مابعتقد انو رح يقدر يكون متقن بقدر اتقان الخالق

برأيك انو الانسان ازا قدر يصنع انسان اخر
رح يقدر يخلق فيو روح كمان ..
يعني يعمل انسان متكامل ...شكلا ومضمونا ..

بعدين ليش كتير شاغلتكن فكرة وجود الله او عدمو
خلينا نبدع وننتج وطلعو من هالفكرة بقى

[hanny dagher]

كاتب النص الأصلي : moon

بس روح قرا تكوين اصحاح 5 السطر الرابع والخامس

كاتب النص الأصلي : moon

وتكوين اصحاح 2
السطر15

اول شي الانترنت رح يجنني اليوم كتر مو بطيء
تاني شي

الإصحاح الخامس

5: 1 هذا كتاب مواليد ادم يوم خلق الله الانسان على شبه الله عمله
5: 2 ذكرا و انثى خلقه و باركه و دعا اسمه ادم يوم خلق
5: 3 و عاش ادم مئة و ثلاثين سنة و ولد ولدا على شبهه كصورته و دعا اسمه شيثا
5: 4 و كانت ايام ادم بعدما ولد شيثا ثماني مئة سنة و ولد بنين و بنات
5: 5 فكانت كل ايام ادم التي عاشها تسع مئة و ثلاثين سنة و مات
5: 6 و عاش شيث مئة و خمس سنين و ولد انوش

الإصحاح الثاني
2-15 و اخذ الرب الاله ادم و وضعه في جنة عدن ليعملها و يحفظها

الاصحاح الثالث

3-23 فاخرجه الرب الاله من جنة عدن ليعمل الارض التي اخذ منها
3-24 فطرد الانسان واقام شرقي جنة عدن الكروبيم ولهيب سيف متقلب لحراسة طريق شجرة الحياة

طيب الاصحاح الخامس كل العالم اللي انزكرت هني ادم وولادو كيف تم التكاثر لحتى طلعت هالعالم كلياتها

الاصحاح التاني والتالت خلقه في جنة عدن واخرجه من جنة عدن اين موجودة هالجنة هل هيي موجودة على الارض كيف لكن بيقول اخرجه من جنة عدن (اللي افترضناها على الارض) الى الارض التي يعمل بها كيف طلع من الارض على الارض ؟ واين هو السيف لهيب السيف المتقلب ؟ اين هيي شجرة الحياة ؟

[whiterose]

مستر مذهول
مستر مصدوم +عم يبكي