مفاوضات سورية اسرائيلية في اسطنبول

[مسطول على طول]

كاتب النص الأصلي : phoenixbird

يعني عفوا بس معقول السوررين لهدرجة لياخدو الجولان بلا مي ؟

والسؤال الثاني انو وبعد المفاوضات رح يصير تطبيع؟

هوي تركيا عارضة على سوريا مياه من عندها مقابل مياة الجولان .. بس ياترى كيف لح يتم جر المياة من الشمال الى اقصى الجنوب ؟...

كاتب النص الأصلي : *.• Roaa •.*

هوو عاجلا ام اجلا حـ يصير سلام ..

لما يكون في رئيس وزراء اسرائيلي قوي ومعو تأيد من الكنيسة ممكن .. حكومة المرت أعجز من أنة تتنازل عن الجولان

ع الهامش : قال في مباحثات عسكرية روسية سورية عن صفقة اسلحة .. شو صار بالاجتماع في شي خبر ؟

[phoenixbird]

وتحديدا سلاح جو لانو قائد القوى الجوية بموسكو
بس انو غريبة هي من الشمال للجنوب اساسا اذا بدو يرجع الجولان كرمال المي للشام يعني ممكن تركيا تعطي مياه للقرات تستفيد حلب بس ما بظن الشام يمكن يفاوضوهوم على جبل الشيخ

[Government]

هوي تركيا عارضة على سوريا مياه من عندها مقابل مياة الجولان .. بس ياترى كيف لح يتم جر المياة من الشمال الى اقصى الجنوب

بالخراطيم ..

[was616im]

كاتب النص الأصلي : Government

بالخراطيم ..

يقبرني خرطومك انا شو زكي عين امك تحرسك

[بنفسجة]

هلا الخبرية بالنسبة الي قديمة شوي يعني في حكي عن هيك شي بس كان ناطر الاعلان الرسمي
بس يلي خلاني اتاكد اكتر انو الاخ بوش لما زار الاراضي المحتلة ما ذكر سوريا بكلمتو بالكنيست لامن قريب ولا من بعيد
بعدين توافق الفرقاء اللبنانين مؤشر تاني كمان
وناطرين شو بدو يطلع منها هالمفاوضات هل رح تكون حقيقية ام تقطيع وقت كالعادة

اما انو تركيا تعطينا مي بدل مية الجولان فما بعرف باي بنك بينصرف هالحكي
مال القصة كلها قصة هالكم متر يلي فيون مي مو معقول يرجع الجولان بدون مي
وسمعنا بالاول انو شرط اسرائيل انو سوريا تفك ارتباطها بايران وحزب الله وكمان ما بعرف باي بنك بينصرف هالحكي
واذا هيك رح تكون المفاوضات فما بتوقع الشباب يلحقو يجتمعو اصلا

[MadMax]

أنا بظن أنو قضية الجولان هي قضية معنوية أكتر مانها مادية ....
و من ناحية تانية ..و اذا بدكون عالصراحة .... حدود سوريا ما بتوصل لبحيرة طبرية ...
لأنو قبل الـ67 كان النا 10 امتار بمياه طبرية .... بس حالياً تراجعت مياه البحيرة أكتر من 10 امتار
و كمان بالاساس ... نحنا حدودنا بالـ67 غير حدودنا قبل الـ 48 ......لأنو بالـ 48 دخلنا شوي بالأراضي الفلسطينية

[Government]

بس بصراحة ترجيع الجولان بهالطريقة ماكتير محببة هالطريقة بالنسبة الي
يعني انو مابعرف كيف !!
بس انو هالطريقة ماكتير بترفع الراس

[زوربا]

المهم نعمل سلام ونريح راسنا من هالمشاكل الدائمة بالبلد..بلكي ان شاء الله بيتحسن الوضع الداخلي...

بس أنا عندي قناعة مطلقة أنو مستحيل يصير سلام مع اسرائيل...لأنو هيي ما بدها.... بيجوز تعمل هدنة شي كم سنة من شان تقوي حالها ..وبعدين بتفرط القصة

[phoenixbird]

يعني اذا رجع الجولان ينتهي قانون الطوارئ

[sandra]

كاتب النص الأصلي : phoenixbird

يعني اذا رجع الجولان ينتهي قانون الطوارئ

ليش قانون الطوارئ كان مشان الجولان ؟

[phoenixbird]

لكن مشان فلسطين؟

[sandra]

كاتب النص الأصلي : phoenixbird

لكن مشان فلسطين؟

والله ما بعرف مشان مين بالاساس انعمل هالقانون
بس اللي بعرفو أنو هو حاليا مستخدم ضد كل مين فتح تمو بالبلد
ما كنت بعرف انو مشان الجولان

[phoenixbird]

اي مو كان بحجة انو نحنا بحرب مع اسرائيل هلا بحجة شو حرب مع اميركا؟

[M@hmoud]

ان برأي انو اولمرت عم بيحاول الهروب من وضعو السياسي بالقفز للامام ..

ما لقى قدامو غير انو يفتح ملف حساس متل المفاوضات مع سوريا

ان شاء الله تمشي المفاوضات وتصل بس لمرحلة التفاوض المباشر ....عالقليلة......بيصير في شوية روح فيها

لكن انا ما بتوقع ينجح شي ولا حتى انو يتفقو عا الانسحاب ....
زعماء السياسة اليهودية ..ما بيقدرو قررو هيك قرارات بدون موفقة الحاخام....لانو هالشي حرام بدينهون

و ا ولمرت ..كرتو محروق عند مجلس الحاخامات الاعلى...لانو انسحب من غزة

طيب شو فوائد السلام الايجابية داخليا بتوقعي:

-تخفيض سنوات الخدمة العسكرية

-خفض الميزانية العسكرية اللي بتتجاوز رسميا ال70% من ميزانية الدولة

- دخول العلوم الاوربية في مجالات العلوم الثقيلة والمعقدة والمتطورة في الصناعة...لانو هالشي ممنوع بشكل غير رسمي الى الان

-ارتفاع مستوى المساعدات والاتفاقات الاقتصادية مع بقية الدول الغنية....واولها اليابان والصين وامريكا

-يعني بشكل عام رح يزيد مصدر دخل الدولة من الاموال .....بغض النظر عن الحرامية اللي رح يستلمو هالاموال

بتوقع هالشي رح يفيد كتير المواطن بشكل مباشر....ان كان اقتصادي ولا علمي ولا ثقافي

يعني السلام ان شا ءالله خير عالبلد...بس ليصير ...عالوعد يا كمون

[ayhamm26]

شوفوا الجزيرة اليوم شو كاتبة:


كشف المدير العام لوزارة الخارجية الإسرائيلية السابق ألون ليئيل الذي شارك في لقاءات تمهيدية مع شخصيات سورية للجزيرة نت أن رئيس الوزراء إيهود أولمرت التزم بالانسحاب الكامل من الجولان المحتل.
ولفت إلى أن الولايات المتحدة الأميركية أعطت الضوء الأخضر للتقدم في المفاوضات مع سوريا بعدما بات الرئيس جورج بوش بدون خيارات سوى التماشي مع رغبة إسرائيل وسوريا.
وأوضح أن الجانبين تمكنا بمساعدة الوسطاء الأتراك من الاتفاق على كافة القضايا اللوجيستية والإجرائية الخاصة بالعملية التفاوضية التي ستستأنف في أيام بأنقرة، حسبما قال.
وشدد ليئيل على أن نص البيان المتطابق الصادر في إسرائيل وسوريا وتركيا يتحدث بروحه وصياغته عن سلام في المنطقة برمتها، موضحا أن هذه هي دلالة الإشارة في النص لمؤتمر مدريد عام 1991.
وأضاف "توصل الأطراف الثلاثة لصياغة النص المنشور (أمس) والمكون من أربع جمل بعد 13 شهرا من المداولات في العاصمة التركية".
وأكد ليئيل المحاضر في العلاقات الدولية في جامعة تل أبيب أن رئيس الوزراء إيهود أولمرت قدم التزاما بالانسحاب من هضبة الجولان بكاملها حتى حدود الرابع من يونيو/ حزيران 1967.

مواقف شجاعة

واعتبر ليئيل أن كل من إسرائيل وسوريا قد سجلتا مواقف شجاعة. وقال إنه ليس سهلا أن تقوم الأخيرة بالتفاوض مع الأولى حول اتفاق سلام، وأضاف "بالتأكيد لن يخرج الإيرانيون للرقص في الشوارع ابتهاجا بهذه التطورات".
وعن الاتهامات الكثيرة التي وجهت لأولمرت من قبل أوساط واسعة في اليمين واليسار في إسرائيل بالقيام بمناورة من أجل بقائه في الحياة السياسية, نفى ليئيل ذلك وقال إنه من غير المعقول أن تشارك تركيا وسوريا في مناورة لصالح أولمرت، وأضاف "مع ذلك لا أستبعد أن يكون أولمرت قد سارع للكشف عن المفاوضات بسبب وضعه الداخلي".

ليئيل مع سليمان عندما زار الأخير إسرائيل في أبريل/ نيسان 2007 وعقدا مؤتمرا صحفيا في القدس (الفرنسية-أرشيف)
منتجع دولي
وكشف وجود اتصالات تمهيدية غير رسمية جرت بين الجانبين منذ ثلاث سنوات في تركيا وسويسرا وبلجيكا والولايات المتحدة شارك هو شخصيا فيها مع شخصيات سورية مقربة من النظام الحاكم، منهم رياض داهودي وسمير تقي ورجل الأعمال الأميركي من أصل سوري إبراهيم سليمان والسفير السوري في واشنطن.

وأضاف "أنا سعيد جدا بالكشف عن المفاوضات الرسمية وأرجو أن تتحول إلى مباشرة".
وعن جوهر الاتفاق المتوقع وتبعاته بما يتعلق بالحدود والمياه وطبيعة السلام وعلاقات سوريا مع إيران وحزب الله ومنظمات المقاومة الفلسطينية، قال ليئيل إن كل شيء خاضع للتفاوض.
وردا على سؤال، كشف ليئيل أن سوريا قبلت في اللقاءات غير الرسمية بمقترح يقضي بتحويل المنطقة الشمالية الشرقية من بحيرة طبريا التي اختلف عليها الطرفان في المفاوضات السابقة عام 2000 إلى منتجع سياحي ومرفق اقتصادي مشترك تسند إدارته لجهة دولية، وأضاف "لكن السوريين سيفاوضون على كل شيء في الاتصالات الرسمية".
من جانبه بارك الوزير العربي في الحكومة الإسرائيلية غالب مجادلة عملية التفاوض مع سوريا، وعبر عن رغبته في زيارتها من أجل دفع مسيرة السلام، وأكد عدم وجود مناورة سياسية خلف الكشف عن التفاوض.



يعني لاحظوا المفاوضات مبلشة من 3 سنين ,يعني لما كان بشار عم ينفخ حالو بانتصارات حزب الله وعم يعير التانيين انن انصاف رجال,كان حضرتو عم يتفاوض مع الاسرائيليين بالسر وهني نازلين ضرب بحلفاؤه

اما شو ممانعة بترفع الراس

[Donald Duck]

على ما أظن انو صعب يصير سلام ..

لانو الشعب الاسرائيلي متمسك بالجولان كثير ..

وبعدين ما بدهم يتنازلوا عن شبر واحد احتلوا ..

يعني اذا ممثلة من حزب ميرتس طلعت وقالت .. اولمرت ما بحكي الا عن نفسه ..

وهو حزب ميرتس اقل الاحزاب تطرفا ..

شو بدك تلاقي من باقي الاحزاب اليهودية ..

اولمرت ليوخذ الدعم من حزبة بالاول .. ليقدر يحكي عن عملية سلام ..

[M@hmoud]

كاتب النص الأصلي : ayhamm26

يعني لاحظوا المفاوضات مبلشة من 3 سنين ,يعني لما كان بشار عم ينفخ حالو بانتصارات حزب الله وعم يعير التانيين انن انصاف رجال,كان حضرتو عم يتفاوض مع الاسرائيليين بالسر وهني نازلين ضرب بحلفاؤه

اما شو ممانعة بترفع الراس

هللق هادا اللي فايت بالحيط بتصدق كلامو اكتر من كلام رئيسك

ليش ما بتعرف شي اسمو حرب اعلام ؟

واليهود اكبر خبير بهيك حرب.....مشان اللي متل حضرتك يخلوهون يتشككو بمصداقية رؤسائهون

لهيك اذا انت بتفتخر برئيسك ..لا تتناقل هيك حكي..وتصير الهون ببغاء

اما اذا غير هيك.. ........ بيكون اصبح عليك السلام

[ayhamm26]

كاتب النص الأصلي : M@hmoud

هللق هادا اللي فايت بالحيط بتصدق كلامو اكتر من كلام رئيسك

ليش ما بتعرف شي اسمو حرب اعلام ؟

واليهود اكبر خبير بهيك حرب.....مشان اللي متل حضرتك يخلوهون يتشككو بمصداقية رؤسائهون

لهيك اذا انت بتفتخر برئيسك ..لا تتناقل هيك حكي..وتصير الهون ببغاء

اما اذا غير هيك.. ........ بيكون اصبح عليك السلام

اولا هدا مو رئيسي وانا بستعر منو ما بفتخر في ,انا ما انتخبتو وهو اجى غصب عني وعن كتيرين وعلى كل هدا مو موضوعنا

بتحب جبلك كم مرة نفى رئيسك واركان حكمو واعلامو الكذاب قيام اي اتصالات بينو وبين اسرائيل باخر 3 سنين؟؟

التجارب علمتنا انو اعلام النظام السوري الرسمي بيطلع دايما اكبر كذاب وبيكذب لسا اكتر من الاعلام الاسرائيلي

اما اذا حضرتك مقتنع انو رئيسك اللي بتفتخر في ما بيكذب ومنزه عن الاخطاء والمعاصي والذنوب فمبروك عليك هي رئيس وهيك تفكير