نهاية علاقات الحب الجملة المعروفة (انا مش عايز أظلمك معايا) ـ

[ماما منوشه]

في الفترة اللي فاتت دي بقيت اسمع كتير أوي ان في علاقات حب بتنهي بجمله غريبة جدا السبب ده سمعته كتير اوي
يسألهم/ مرتبطة؟,,
ترد:كنت,,
يقولها/ طيب و ايه اللي حصل احكيلي,,
تقوله: قالي انامش عايز اظلمك معايا انا احنا لازم نسيب بعض احنا مهما عملنا حكايتنا مش حاتكمل ابدا
و يسيبها و يمشي والبنت تعيش الوهم ان هو عايش حياة مليانه بؤس و اصحابه ييجوا يقولولها ان هو و لا بينام و لابياكل و تعبان و دخل المستشفى و حالته تصعب ع الكافر وتفضل تقول ان هو ضحى بالحب علشان سعادتها و ان هو فعلا مش عايز يظلمها معاه طيب هل دي فعلا الحقيقة؟ هل ينفع اتنين يكونوا بيحبوا بعض و في اليوم اللي تيجي البنت تقوله ايه يا كابتن احنا حانفضل في اللي احنا فيه ده كتير و اللا ايه؟ انت مش حاتيجي تتقدم لبابا ؟؟ يكتشف بعديها بكام يوم ان هما ما ينفعوش لبعض و يبرر موقفه ان احنا في زمن ما فيهوش شغل فباتالي مش حاقدر اجيب شبكه و لا مهر و لا اجهز الشقة لاني اصلا مش معايا الشقة اللي اجهزها و الكلام ده و لسه هروح الجيش و حايضيع من عمري مش عارفة سنه و اللا اتنين و بعدين هطلع عقبال ما الاقي شغلانه عدله و أحوّش و أكوّن نفسي فيها مش اقل من 10 سنين و انا مش حاقدر أركنك جنبي طول الفترة دي فمعلش يا حبيبتي حبي ليكي يخليني و يجبرني اني اضحي بسعادتي علشانك و ينهي كل حاجة طيب معلش انا ببقى نفسي اسأل كل واحد بيقول الكلمتين دول
**هو انت حضرتك ما كنتش عارف كل ده في اللحظة اللي قلبك دق فيها و قررت انك هتروح تعترف بالحب الكبير اللي ملا قلبك و تقول بحبك للانسانه اللي كنت مستنيها من زمان كانت كل الظروف دي موجوده و اللا لأ؟ و اللا هي النكسه الاقتصاديه اللي في البلد هي و البطاله حصلت بعد ارتباط حضرتك و اللا ايه الأخبار؟ مش قادرة اقول فعلا الموضوع ده بينرفزني قد ايه,, بتحبها ؟
خلاص المفروض انك تتفق انت و هي اناهعمل كذا و حاجي بعد كذا و هحاول ابذل قصارى جهدي علشانك مش بكل هبل تقول مع السلامه إلا بقة لو انت واخد الموضوع ده حجه و ده الغالب من وجهة نظري ما عندوش كلام يقوله فبيقول الجمله الغريبه دي و و الله احيانا بعد لما البنت تقول ان هو قالها كدة تعرف ان هو خطب بعديها بأسبوع و اللا اتنين و اللا قابلته في الشارع مع واحدة و طلعت مراته و حاجات كدة غريبه فعلا بجد بيحصل
اقولك على حاجة؟ انت مالك يا سيدي هي راضيه انها تقعد تستناك كام سنه 10 كدة انت ايه اللي مزعلك هي اشتكت انت لو مفهمها الظروف و بينكم تفاهم و هي شايفه انك فعلا بتحاول تعمل حاجة علشان تسعدها مش حايفرق معاها سنه من عشرة هي البنت كدة لو حست انك بتقدم خطوة بتقدم هي عشرة و يمكن اكتر على حسب قدرتها على المشي..و بعدين الأهل خلاص ما بقوش زي الأول ما بقوش زي اللي بييجوا في التليفزيون خلاص الأهل دلوقتي ما بيصدقوا أصلا ان في عريس لبنتهم لان هما عارفين ان في ازمه عرسان في البلد زي ما في ازمه شغل كدة بالظبط و بقوا غلابه كدة و يقولوا الرأي رأي البنت الا القله القليل يعني احنا برده مش عايزين نعمم الكلام يعني تقريبا الأكتر خلاص ما بقوش يطلبوا الشبكه اللي بالشئ الفلاني و لا الشقة اللي لازم تبقى 4 إوض و صالتين و بلاكونه بحري و حمامين و روف جاردن خلاص تقريبا الحوارات دي خلاص قربت تنقرض خلاص دلوقتي عندي شقه حاتقعد مع مامتي كل ده حتى لو هما شايفين ان العريس مش قد كدة و مش داخل دماغهم أوي بقوا خلاص يقولوا البنت عايزة كدة خلاص دي حياتها و هي حرة فيها علشان هما عارفين ان هما لو ما وافقوش و الموضوع مشي برضاهم ممكن هما يمشوه بغير رضاهم و بوسائل غلط و هما اللي يبقوا السبب في الآخر في المشاكل الكتير اللي ممكن تترتب على رفضهم ده
طيب نرجع تاني للنقطة اللي بنتكلم فيها ياريت ياريت قبل حضرتك ما تروح و تاخد خطوة الارتباط دي تفهم و تعرف انت تنفع للبني ادمه دي أو لأ يعني ما ينفعش حضرتك تبقي عايشه في وسط عيله العلم عندها هو الهم الأول و الأخير في حياتهم و باباكي دكتور و مامتك مهندسه و اخوكي وكيل نيابه و انتي في كليه صيدله و تحبي واحد معاه دبلوم صنايع ده حتى عيب يعني ايوة الراجل مش بشهاداته بس عيلتك مش من الناس اللي بتقتنع بكده و انتي عارفة كدة كويس طيب ايه اللي يخليكي تاخدي الخطوة دي و بعدين ترجعوا تقولوا احنا حكايتنا مش ممكن تكمل مهما حصل بعد لما ماكنش في على لسانك و لا لسانه غير كلمه احنا حانعمل أي حاجة علشان نبقى لبعض لحد اخر يوم في عمرنا و مش حايهمنا حد و كلام الافلام العربي ده.. و برده العلاقه بتنتهي بـ (انا مش عايز أظلمك معايا أنا عارف ان احنا لا يمكن نكون لبعض) و بقيت الجمله الغريبه اللي بنتكلم عليها
*برضه ليه البنت تروح تعرف ولد أصغر منها؟ ده أصلا البنت علميا بتكبر أسرع من الولد طيب عايزة تعرفي واحد اصغر منك روحي إعرفي واحد أصغر منك بشهور و اللا بسنه و اللا اتنين و اللا حتى تلاته ده بالكتير اوي و ده برده مش دايما بينفع يعني ما ينفعش تبقي لسه في الجامعه و تعرفي واحد اصغر منك بسنتين تلاته ايه هتحبي واحد في ثانويه عامه و اللا ايه؟ ده لو حضرتك معديه الـ26/الـ27 ممكن الحوار ده يتبلع بس اصغر من كدة ما اظنش ان ده بيستمر و غالبا بتفشل العلاقه دي بالجمله اللي بنتكلم عليها لان محدش حايقبل علاقه زي دي من الأهلين بعيدا عن اختلافات الرأي و التفكير ده موضوع تاني خالص
و برده العكس ماتروحيش حضرتك تعرفي واحد قد باباكي و تقولي بحبه بحبه اعملكمٍ ايه القلب و ما يريد هنا انا ممكن اقولك القلب و ما يريد في عينك انتي و هو يا حبيبتي, يا بنتي فكري في بكرة كدة يمكن دلوقتي هو لسه عنده 40 سنه و انتي عندك من 20 لـ25 مش واخدة بالك ان هو كبير بس استني كدة لما انتي يبقى عندك الـ40 سنه و هو يبقى عنده 60 سنه انتي حاتبقي في قمه جمالك و حيويتك و هو ماشي بعكاز ليه تعملي في نفسك كدة و بعدين انا زمان كنت فاكرة و تلاقي الناس كلها فاكرة زيي كدة ان البنت اللي بتعمل كدة هي البنت اللي باباها متوفي مثلا او قاسي عليها مسافر يعني الحاجات دي مش حاسه بوجود باباها و خلاص فعلشان كدة غصب عنها بتروح تحب واحد اكبر منها بكتير يمكن فعلا حالات كتير بتكون كدة بس اللي اخدت بالي منه ان في بنات كتير جدا الحياة عندهم ماشيه فل الفل و تمام جدا و باباها راجل كويس جدا و الأسرة ما فيهاش أي خلل و برده بتحب واحد كبير مالهاش دعوة بقة متجوز مش متجوز و تغنيله (فرق السن و ما بيني و بينك جايز يبقى كتير بس انا شايفة في عيني و عينك حلم و حب كبير) و هو يفرح بشبابه هو كمان و يغنيلها (انا حبيته خلاص يا ليالي خدني الشوق و لا كان على بالي) و الله العظيم عيب الكلام ده ,
**المهم برضه ايه اللي يخليكي تعرفي واحد من على النت من العراق مثلا على فكرة انا مش ضد علاقات الحب اللي ممكن تتم عن طريق النت بس لو صح مش تروحي تحبي واحد من العراق و انتي قاعدة في مصر و اللا في أي بلد تانيه و انتي عارفة ان هو مش هيعرف ينزل يخطبك لانه اصلا مش عارف ينزل من بيتهم لا يتمسك فقاعد بيسلي نفسه على النت و تقوليلي اعمل ايه لقيت في كل الصفات اللي انا عايزاها في الراجل اللي ارتبط بيه طيب ماشي يا حبيبتي و بعدين في صفات حلوة و عايزاها في الراجل اللي ترتبطي بيه جميل اوي طيب و بعدين؟؟ فين العقل فين الدماغ ؟؟؟؟؟؟
**في علاقات كدة لازم نفكر فيها بالعقل ليه تروح تحب واحدة مش من دينك يا بابا؟؟ البنات خلصوا مالقتش غير واحدة مش من نفس الدين لو كنت فاكر نفسك في فيلم عربي بيتكلم عن الوحدة الوطنيه و اللا في مسلسل أوان الورد تبقى غلطان ؟؟ احنا في مجتمع ما بيرحمش و لا انت حايسيبوك في حالك و لا هي كمان حاتتساب في حالها حاتظلمها معاك أوي أوي فبلاش يا كتكوت فكر!!!
** ايه اللي يخلي بنت البيه تعرف ابن السواق قدام هي عارفه ان باباها راجل مادي و حاططلها عريس من نفس مستواها عايزة تتجوزي واحد انتي اللي اخترتيه اختاري صح و اعملي حساب لاهلك حبيتي ابن البواب خليكي قد المغامرة دي علشان العلاقه ما تنتهيش بإنه يغنيلك اغنيه (على قد حالي ما اقدرش ابص لفوق لاتعب)
كل الرغي ده يوصلنا لإيه؟؟ يوصلنا ان مش كل حاجه نفكر بيها بقلبنا زي ما مش كل حاجه نفكر بيها بعقلنا فكر كويس في الخطوة اللي انت حاتخطيها علشان ماترجعش تندم عليها فكر في بكرة كويس اوي علشان ما ترجعش تندم و تقول انا اللي جيبت ده كله لنفسي ما انا لو كنت فكرت كويس ما كنش جرالي اللي جرالي

[بنت الاكارم]

منى بجد موضوعك غايه في الاهميه ، لانه في ناس كتيييير عم يعملوا اللي قولتيه
بس المشكله انهم الناس ما عم يقدروا يفكروا بعقلهم ما بفكروا الا بقلوبهم لانه لو ردوا على العقل حيكون في بعد وفراق واي حد بخاف من هالكلمه وبحاول يتناسى هالكلمه مع انه لما يقعد مع نفسه بكون متاكد انه ما في امل بعلاقتهم بس ليش ما بيقدر بتخذ هذه الخطوه انه يقول للي بحبه انه لازم نفترق وكل واحد فينا يروح بطريق .

بتعرفي منى يمكن الامل في انه تنجح علاقتهم هو اللي بخلي الواحد ياجل هالكلمه لوقت متاخر او يخليها لوقتها ، بس بعد شو بعد مايكونوا ما رح يقدروا يبعدوا عن بعض

بجد مشكله شائكه وما الها حل

شكرا كتييير منى على طرحك لها الموضوع اللي كتيييير مفيد

[ماما منوشه]

كاتب النص الأصلي : بنت الاكارم

منى بجد موضوعك غايه في الاهميه ، لانه في ناس كتيييير عم يعملوا اللي قولتيه
بس المشكله انهم الناس ما عم يقدروا يفكروا بعقلهم ما بفكروا الا بقلوبهم لانه لو ردوا على العقل حيكون في بعد وفراق واي حد بخاف من هالكلمه وبحاول يتناسى هالكلمه مع انه لما يقعد مع نفسه بكون متاكد انه ما في امل بعلاقتهم بس ليش ما بيقدر بتخذ هذه الخطوه انه يقول للي بحبه انه لازم نفترق وكل واحد فينا يروح بطريق .

بتعرفي منى يمكن الامل في انه تنجح علاقتهم هو اللي بخلي الواحد ياجل هالكلمه لوقت متاخر او يخليها لوقتها ، بس بعد شو بعد مايكونوا ما رح يقدروا يبعدوا عن بعض

بجد مشكله شائكه وما الها حل

شكرا كتييير منى على طرحك لها الموضوع اللي كتيييير مفيد

ألف شكر على التعليق الجميل كرومه

وانا معك في انها مشكله كتير كبيره لكن ما بنشعر بها غير لما نكون فعلا حبينا
مشكوره مره تانيه على التعليق الراقي والك منى الف بوسه

[أسير التشرد]

النهايات دائما بتكون قاسية وأليمة في حياة الانسان...

لي تعقيب على الموضوع بعدين ..

[ماما منوشه]

كاتب النص الأصلي : أسير التشرد

النهايات دائما بتكون قاسية وأليمة في حياة الانسان...

لي تعقيب على الموضوع بعدين ..

ليش بعدين يا رضيع الحب؟؟؟