|
أوباما يمتنع عن وصف مجازر الارمن ب (الإبادة)
أوباما يمتنع عن وصف مجازر الارمن ب (الإبادة)... ويعد بمواجهة كل من ينكر حقيقة «المحرقة النازية»
واشنطن - (أ.ف.ب): أكد الرئيس الاميركي باراك اوباما أمس الاول في مراسم ذكرى ضحايا محرقة اليهود في الحرب العالمية الثانية، التزام الولايات المتحدة القوي باسرائيل وتعهد بمحاربة الذين ينكرون المحرقة. وقال اوباما في مقر الكونغرس حيث اقيمت المراسم التي نظمها متحف الولايات المتحدة لمحرقة اليهود وبحضور يهود نجوا منها ان "هناك الذين يصرون على ان المحرقة لم تحدث ويرتكبون كل اشكال التعصب من عنصرية ومعاداة للسامية وكره للاجانب وتمييز بين الجنسين وغيرها". واضاف "ادينا فرصة لمكافحة هذه الآفات وهذا واجبنا". وتابع "لدينا الفرصة للالتزام بمكافحة الظلم والتعصب بكل اشكالهما، بمواجهة الذين يطلقون الاكاذيب بشأن التاريخ وبأن نبذل كل جهد ممكن لمنع وقوع فظائع مثل تلك التي حدثت في رواندا ودارفور". وتأتي كلمة اوباما بعد خطاب الرئيس الايراني محمود احمدي نجاد في مؤتمر الامم المتحدة لمكافحة العنصرية حيث وصف اسرائيل بانها "حكومة عنصرية". من جهته، استغل ايلي فيزل الذي نجا من معسكري الاعتقال النازيين في بوشنفالد واوشفيتز المناسبة ليهاجم الرئيس الايراني. وقال ان احمدي نجاد "يحتل المرتبة الاولى بين الذين ينكرون المحرقة". واضاف ان الرئيس الايراني "استخدم منبرا رسميا لاجتماع للامم المتحدة لاهانة دولة اسرائيل بطريقة لا يقوم بها اي شخص متحضر". من جهة اخرى امتنع الرئيس الجمعة عن وصف المجارز التي ارتكبتها الامبراطورية العثمانية بحق الارمن في العام 1915، بانها عمليات «ابادة»، الا انه قال انه غير نادم على استخدام هذا المصطلح اثناء حملته الانتخابية. واتبع اوباما التقليد الدبلوماسي الاميركي الحديث باصدار بيان في يوم ذكرى المجازر الارمنية واصفا عمليات القتل التي راح ضحيتها اكثر من 1,5 مليون شخص بانها «واحدة من اكبر الفظائع التي ارتكبت في القرن العشرين». الا انه وبعد ضغوط من تركيا التي تجري حاليا محادثات مصالحة مع ارمينيا، لم يستخدم اوباما كلمة «ابادة». وقال اوباما ان التصالح مع الماضي هو افضل طريقة بالنسبة للاتراك والارمن للتقدم الى الامام والعمل لتجاوز «التاريخ المؤلم.. بطريقة صادقة ومنفتحة وبناءة». المصدر : - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
ما حسيت انو في كتير ضرورة لذكر كلمة ابادة طالما ذكر اوباما انو "من اكبر الفظائع الي ارتكبت في القرن العشرين"
يعني كلام الرئيس الامريكي يؤدي لنفس النتيجة بالنسبة للارمن وهوي انو موقفو متعاطف بشدة مع الارمن وتجاوز التاريخ المؤلم بطريقة صادقة ومنفتحة وبناءة هوي الحل الامثل.. طبعا بعد اعتراف واعتذار تركيا رسميا عن المجازر.. بذكر على هامش الخبر انو العثمانيين ابادو ايضا جزءا كبيرا من الشركس بالتواطؤ مع الروس في نهايات القرن التاسع عشر وبدايات القرن العشرين.. |
هلا انا ماالي مصلحه لا مع الارمن ولا مع الدولة العثمانيه
بس مجازر الارمن كلها حكي فاضي هديك المرة احمد منصور (وهو شخص معروف بقوة مصادرو) كان بلا حدود بتكلم عن مجازر الارمن والمبالغه بعدد الضحايا وحكى الشخص اللي استضافو انو كان اكتر احصائية لأعداد الارمن هداك الوقت مليون وتلاتمائة الف وكيف وبقولو الضحايا مليون ونص ! كيف زبطت والعدد الحقيقي 20 وهدول قتلو لأنهم كانو يحاربو مع الجيش الروسي ضد الدوله العثمانيه ازا معلوماتي غلط يا ريت حد يصححها |
يمكن الو مصلحة قريبة مع تركيا ..
بعدين بترجع نفس الاسطوانة .. بعدين ما بيتاخد عن تمو شي وين وصفو لمجازر اميركا واسرائيل بالمنطقة ؟؟ |
اقتباس:
من جهتي بحس انه ضروري وكتير ضروري يتم التوقف على طريقة التعامل مع الأوضاع .. التطهير العرقي ( بحسب التسمية المعتمدة من قبل الأرمن ذاتن ) اللي تعرض لها ارمن الشمال السوري والشمال العراقي صايرة لعبة بايد الدول الكبيرة .. كلما حبت تنتقد تركيا بتذكرها بحرب العالمية الاولى وايام ال 1915 . تماما متل ما اللعب صاير على نقطة الهولوكوست الاسرائيلي .. لكن الفرق بأن الأرمن ما عندن هلنفوذ القوي اللي مخلي العالم تركض ليرضاهون ويحصلولن حقوقن ، فبتبقى مطالبن باعتراف دولي ضرب من المستحيل . بخصوص الاعتذار التركي لجرائم اتاتورك وشلته .. فعلى علمي كان في جلسة حوار تركي ارمني 20 بالشهر .. لسخافة القدر قبل ذكرى المجزرة بـ 4 أيام :lol: |
اقتباس:
احمد منصور شو ما كان تكون مصادره بالنهاية في شي اسمه تاريخ متوارث .. في شي اسمه احداث مؤثرة .. في شي اسمه مفهوم احترام لضحايا معظمهم كان من الأطفال . غريب كيف العالم بتطالب بتأييد قضاياها واحترام امواتها وبنفس الوقت بكل بساطة بتهين المشاعر القومية للآخرين بكل بساطة .. اذا مع الأيام صار ورحتي على ارمينيا فينك تشوفي اكبر حديقة في العاصمة الأرمنية يريفان ، لعلمك حاطين فيها 1600 نافورة مي تقديسا للمليون وستمية الف ضحية اللي تم تصفيتن ... على اقل تقدير فينك تحترمي مشاعر العالم اللي كانت هلحادثة نقطة محورية بتاريخن العرقي ... |
اقتباس:
|
اقتباس:
الأرمن تدبّحو قدام عيون أجدادنا اللي كانو يلمو الأطفال الرضع من أحضان أمهاتهون المتوفيات بطريق التهجير (و ما أكثر الأطفال الأرمن اليتامى اللي تبنوهون عائلات عربية بمنطقة الجزيرة, و لهلأ بتشوفي أولاد و أحفاد هدول انو ملامحهون قوقازية لما باقي العائلة أو العشيرة ملامحهون ملامح عرب)... و العدد بنوب مانو مبالغ فيه لأنو في اللي مات بالمجازر و اللي مات من الجوع و المرض بطريق التهجير الهمجي و الطرد من أراضيهون.. و اللي مات ع ايد قطاع الطرق... كتير كلاسيكي في فكر العرب قولبة التاريخ حسب الايديولوجيا و الاعتقاد .. و معروف انو قطاع واسع من الاسلاميين يحنون لأيام الخلافة حتى لو ع ايد العثمانيين.. و سبحان الله وقت نحب حدا ما نشوف أخطائو.. حتى لو ضحاياها مئات الآلاف اقتباس:
|
* عهامش الموضوع:
بذكر انو اليوم (الخميس يعني) الساعة 6:00 pm رح يطلع حلئة عن الأرمن ضمن برنامج "حكاية سورية" عالأورينت.. |
والله انا بصراحة ماني متثقفة سياسيا لدرجة كبيرة وكلامكن كتير حلو والموضوع عن جدمثير للاهمية بس عندي تعليق انو امريكا واوباما هاد للي اجى من كم شهر ما حيكون احسن من للي سبقو واكيد بدو يسمع كلمة اسرائيل بكلاش كعب 12 وعصاية طولها امتار
يعطيك العافية ابو توني :larg: |
اقتباس:
اختي .. الارمن كان يعيشوا في شرق تركيا قبل مية سنة ... و اليوم شرق تركيا بلا ارمن ... اختفوا الارمن من المنطقة و من القرى و من البيوت اللي كانوا يملكوها على حكيك و حكي احمد منصور ... اما الارمن انتحروا .... او الارمن قرروا يلعبوا لعبة الغميضة ! الارمن من وصلوا على مدينة الموصل ... كانوا اطفال و مراهقين ... لان عبر الطريق تعرضوا للابادة من قبل الجيش التركي و الميليشيات اللي كانت مدعومة من جند الخيالة الحميدية صدر امر السلطان عبدالحميد بتهجير كل الارمن من منطقة بحيرة فان لانهم اتهمو بالخيانةو العظمى و العمالة للسوفيت بالتعاون مع ارمن روسيا و كان القائد الخالد اتاتورك قائد الجيش آنذاك و لذلك لا احمد منصور و لا غيرو ... يقدر يغير التاريخ ... لاعتبارات دينية بحتة ... يا ريت لو يقعد يبحوش على مصادر عن حكم محمد علي الالباني و كيف حكم مصر يكون احلى ! |
اقتباس:
الشرق الاوسط قبل الحرب العالمية .. كان بيد الاحتلال العثماني (الرجل المريض) و كان لا بد من انتهاء دولة بني عثمان اتفاقية سايكس بيكو ليست وليدة 1916 ... هي اقدم بكثير ... و العثمانيين احسوا بالخطر و قاموا بعمليات تطهير عرقية حتى يحتفظوا بأكثر مساحة ممكنة ... طبعا بذلك الوت كانت مصر تحت حكم محمد علي وو الحجاز حكم ذاتي ... بقت ولايات تركيا الحديثة و العراق و الشام ... و قاموا بعمليات كثيرة بالتوطئ مع الروس و مع الانجليز و سنة 1916 طلعت الاتفاقية سايكس بيكو ... بعد ما تغيرت ديموغرافية المنطقة ... اكثر قول يعجبني عن الحرب العالمية الاولى .... انو العراق هو البلد الوحيد اللي زاد عدد سكانه بعد الحرب و فعلا .. كان تهجير الكثير باتجاه العراق و سوريا حتى تبقى تركيا للجنس التركي ... بموافقة بريطانيا العظمى و اكبر دليل على كلامي ... ما تقسمت تركيا الى دولتين مثل ما تقسم الهلال الخصيب ! |
اقتباس:
اقتباس:
اقتباس:
هلا مثلا محرقة اليهود صحيحه 100% بس الكزبه كانت بالعدد يعني لما نحكي مليون ونص اندبحو قبل 100 سنه وبأمكانيات هداك الوقت بحسا شي مستحيل يعني متل ما تقول 15 مليون بوقتنا احنا جدودنا لما كانو يحكو عن الهجرة في 48 اليهود كانو يفوتو على قرية يدبحولهم 100 او 200 واحد يقومو شي 5000 واحد من القرى اللي جنبها يخافو ويهاجرو حتى ما يصير هيك فيهم فهمتو قصدي بجوز الدولة العثمانيه نفس الشي عملت مع الارمن لتخلص منن وطبعا طريقه اجراميه انها تدبحهم كبر العدد او صغر بس مشاركتي كان هدفها البحث عن الحقيقة وبس:D:D |
اول شي شكراً Abu toni ع هالمشاركة يلي من زمان كان لازم نحكي عليها
اقتباس:
( مع العلم انه في مسيحية كتار كانوا ضحية هالابادة كمان) ع القليلة يقولوا الأتراك انه نحن عملناها ما يقولوا كله كذب الاتراك اندبحوا و بس عدد صغير كانوا ارمن ..متل ماصار بمقابلة من كم يوم اي جريمة بالعالم بتصير بيقولوا مين المجرم وبيحاكموه طيب اذا تركيا ماعم تعترف ليش ما عم يعملوا محكمة دولية ويحققوا .. في حقوق وفي تعويضات لازم تصير... وين العدالة Abu toni و yass معلوماتكن عن هالابادة دقيقة 100% انا بحترم كل الشعب الارمني يلي عم يطالب بهالحق وياريت ننضم نحن الشعب المسيحي معهن ونطالب بحقوق اجدادنا |
اقتباس:
لما الأمر يتعلّق بالقتل و آلياتو... مافي شي مستحيل (هاي من طباع البشر) |
أمريكا لا تبحث إلا عما تريده أن يكون حق أو حقيقة ومجازر الأرمن لن تحظى بدعم أمريكي للاعتراف بها لأنه لا مصلحة لأمريكا.
أما موضوع تكذيب المجازر الذي جاء على لسان مفكرين من ذوي التوجهات الاصولية الاسلامية فمرده لموقف تركيا من االدول الاسلامية بعد عجزها عن الدخول في الاتحاد الأوربي نتيجة عدم اعترافها بحقوق الأقليات ومن ضمنها حق الأرمن بالاعتراف بالمجازر، الأمر الذي اعادها للبوتقة العثمانية الاسلامية القديمة ولكن لا تركيا ولا الأصوليون قادرون على نفي مجازر واضحة وضوح الشمس. برأي التركيز الأرمني يجب أن يكون على الاتحاد الأوربي للحصول على حقهم بالاعتراف التركي بهذه المجازر. |
اقتباس:
|
اقتباس:
عن جد يعني حاج... اذا عرس هيفا ندحش اسرائيل, اذا انفلونزا ضراب السخن ندحش اسرائيل.. اذا انصاب كرستيانو رونالدو ندحش اسرائيل... انو شو دخل هاي بهاي؟!!!!! شوية موضوعية رجاءً |
اقتباس:
يعني الكل بعرف أنو الشركس لما تهجروا من قبل الروس من القفقاس اجو لعند الدولة العثمانية حفاة عراة , فاستقبلهم الأتراك وتصدقو عليهم بالأراضي التي بنوا عليها قراهم الحالية في تركيا و سوريا و الأردن. وفي هذا الصدد يقول المؤرخ الشركسي السوري المعروف عدنان قبرطاي في موقعه: ( ولقد خصصت السلطات العثمانية للشركس أراض ليبنوا عليها قراهم وأخرى زراعية ليعيشوا منها واحتفظوا بالأراضي الوعرة كمراعي لمواشيهم .) |
اقتباس:
يوم بيعتبروها جريمة ضد الانسانية ويدان مرتكبها بشدة .. يوم بيعتبروها أحداث تاريخية يجب تخطيها والمضي قدما في الحياة دون الالتفات إلى النكبات .. اليوم عما نشوف الصدور الارمنية ما مشفي غلها من الأتراك ... ايا انسان ارمني ملتزم بقوميته وبيملك انتماء الها لابد ما تلمس عنده كره قوي كتير نحو الأتراك ، لو حصل الأرمن على اعتراف دولي بأنهم كانوا ضحية مجزرة وتصفية عرقية هل ستتغير النظرة الأرمنية نحو الأتراك ؟ اقتباس:
ليكا فرنسا معترفة بالمجزرة ... وما كان اعترافا محبة بالأرمن قد ما هوي تسيس لمصالحها ومحاولتا لامتلاك ورقة ضغط . بالنسبة إلي المجتمع الدولي واتهامات الكيل بمكيالين بتظهر بشكل كتير واضح بالتعاطي مع مذابح الأرمن من جهة والهولوكوست الصهيوني من جهة تانية ... هي اذا ما كان حدا راضي نقارن مذابح الأرمن بالمذابح الي عما تشهدا المنطقة بغزة والعراق . |
بالنسبة لما يسمى (مجازر الأرمن) فهذا ادعاء غير مثبت من طرف واحد وأنا حقيقة لا أعلم لماذا يصر الأخوة الأرمن على إقحام قضيتهم في سوق السياسة والتسول أمام البرلمانات الاوروبية والكونغرس الأمريكي وغيرها.
الأتراك أعلنوا من أعلى شخصياتهم بدءا بالرئيس عبدلله غول واردوغان و انتهاء برئيس مجمع التاريخ التركي بأن حل هذه المسألة يكون بتشكيل لجنة من المؤرخين الأرمن و الأتراك لتقصي الحقائق ولتفتح كل الوثائق والأتراك جاهزون لتحمل اي نتيجة تعلنها هذه اللجنة. أما غير ذلك نجوم السما أقرب |
اقتباس:
انو في شي مفارقة بالموضوع! :?.. |
اقتباس:
بالمناسبة .. الأرمن من اكثر متابعي القنوات التركية .. ما بقصد المسلسلات المدبلجة التركية اللي ظهرت حديثا ، بقصد القنوات التركية بشكل مباشر .. ودائما كنت بتعجب وبستغرب من هلنقطة :lol: |
اقتباس:
ما بتذكر انه تم اقحام القضية الارمنية ضمن " سوق السياسة " لا بل " سوق السياسة " هوي اللي التجىء الها بأكتر من موقف لتجريم احفاد اتاتورك ..مش الأرمن اللي ركضوا لأحضان العالم ودخيلكن ساعدونا .. بالنهاية المطالب القومية حق وليست تسول ، الاعتراف بتعرض عرق لمجزرة ومحاولة ابادة يمكن ما يحمل بالنسبة الك ايا اهمية بعكس الانسان الأرمني المعتبرها قضيته القومية العليا ومن حقه الحصول على اعتراف دولي بجريمة ارتكبت بكل وحشية بحقه . بخصوص لجنة التأريخ .. من حسن حظي قدرت ارجع اتذكر بعض الجمل المحورية اللي بوساطة العم غوغل وصلتني للمقال اللي كنت عما دور عنه . ما بدي انقل المقال كاملا مشان ما يحترق النقاش ..لكن بتمنى منك قراءته بتمعن وما عندي مانع ناقشك ببعض افكاره . المقال بقلم كاتب ارمني اسمه كيراكوس قيومجيان مقتطفات : اقتباس:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
ما بعرف كيف التعصب القومي بيعمي البصيرة لهل الدرجة وإنو شو مشان الستيريو اللي ضارب معك سوري تركي تركي سوري ناطق بالعربية. وبالنسبة لموضوع الارمن تركيا من يوم يومها تعاملها مع الأقليات شوفيني عنصري وأكبر دليل اللي عم نشوفو اليوم بموضوع الأكراد وحقوق الطائفة العلوية في تركيا. |
[FONT='Arial','sans-serif']ابو طوني[/font]
[FONT='Arial','sans-serif']الدعوة لهذه اللجنة هي من قبل اردوغان ذاته لذلك هو باعتباره رئيس وزراء جمهورية تركيا يجب ان يقبل بنتائج هذه اللجنة التي دعا لتشكيلها[/font] [FONT='Arial','sans-serif']الدعوة وجهت الى جمهورية ارمينيا لترشح من تشاء من مؤرخيها ولكن ارمينيا الى حد الآن تتجاهل الدعوة, لا أدري لماذا؟؟ ربما هم خائفون من الحقيقة.[/font] [FONT='Arial','sans-serif']اورهان باموك اديب, هرانت دنك صحفي , يقى شو دخلن بالتاريخ؟[/font] [FONT='Arial','sans-serif'][/font] [FONT='Arial','sans-serif']ابو عياش[/font] [FONT='Arial','sans-serif']وين قلت انا انو ما صار تهجير, لا أكيد صار تهجير بس انو ابادة لا هادا افتراء , بعدين مي قلك انو الأكراد و العلويين مضطهدين بتركيا؟ حبيبي تركيا دولة ديمقراطية والاقليات آخدة حقوقها , يمكن انت مخربط بين تركيا و سورية[/font] [FONT='Arial','sans-serif'][/font] [FONT='Arial','sans-serif']وأخيرا هل الأرمن أيضا مستعدون للنقاش حول الابادة الجماعية التي ارتكبوها ضد الاتراك الاذريين في باكو و قاراباغ و خوجالي وغيرها من المدن الأذرية حيث تم قتل ألاف الاطفال والنساء من قبل عصابات الطاشناق ستون واسالة وغيرها من التنظيمات الارهابية الارمنية؟[/font] |
اقتباس:
الطريق من بحيرة فان شمال شرق تركيا الحديثة ... الى منطقة آزخ و طور عبدين (جنوب تركيا الحديثة) و من ثم الى الموصل او الى الحسكة ... طويلة و وعرة كل هذه المسافة كانت مشيا على الاقدام و عبر الطريق كانت الميليشيات من قرى المنطقة مدعومة من الاتحاد و الترقي تقوم و تغير عليهم و تقتلهم .... قرى كاملة بكل ناسها ... قطعوا 200 - 300 كيلومتر مشي على الاقدام ... و بعدين قلليلي مليون بهذاك الوقت بهذاك الوقت كان هناك بنادق و مدافع و كلشي موجود اتمنى تكوني فعلا باحثة عن الحقيقة .... اللي صار بفلسطين شي مختلف ... عصابات صهيونية كانت تقتل و تروع الاهالي البسطاء و تهجرهم الى مناطق مجاورة ... بينما بحالة الارمن جيش الدولة العثمانية اشرف بنفسه على التهجير الكلي و الفوري ... و ترحيلهم جنويا و لذلك انقتلوا بسبب الاسلحة و البرد و الارهاق و الاوبئة ... و ما وصل من هذا الشعب المسكين الا اللي اعمارهم 15 سنة و قدام عيونهم انذبحوا اهلهم و اخوتهم ... تطمني العدد مو كذب ... ولا هي خيالية .... اقتباس:
بس العرب انفسهم مو معترفين بالمجازر اللي تصير بالعالم العربي ... الى اليوم ما متفقين القتيل بالعراق ... شهيد او قتيل ... :lol: و لذلك لا تستغربي من المجتمع الدولي |
اقتباس:
يعني اذا اعترف الاتراك بالمجزرة او ما اعترفوا ... الارمن ما رح يطلعوا من القبور ... و من المناطق النائية اللي انذبحوا فيها بس رح تبقى المجزرة .... وصمة عار على تركيا الى الابد |
اقتباس:
تاريخنا تاريخ عظيم ومشرق , وليس هناك أي فترة من فترات تاريخنا نشعر بالخجل حيالها او نرغب بالإعتذار بسببها. Ne Mutlu Turkum Diyeni |
كل واحد عم يكتب عن رايو اكيد بيكون رايو بيعود لمصدر موثوق وللي عم يحكي على اساس مصدر غير موثوق لا يحكي فيه بتمنى من اي شخص عندو وجهة نظر صحيحة وموثوقة يكتبلي اسم المصدر لانو بصراحة متابعتي لردودكون عم بتوه بين الحئ والباطل:o
|
المحرقة الصهيونية يستفاد منها سياسياً ( امريكياً - صهيونياً ) وهي قضية تاريخية ان حدثت فهي مستنكرة وشنيعة كذلك جرائم الابادة ضد الأرمن . معرفة التاريخ يجب ان تكون للاستفادة في المستقبل لا لـ الاستغلال السياسي ولا لـ زرع الحقد والكراهية بين اجيال لم تعاصر الحدث ولم تشارك به . والاعتراف بالابادة هو خطوة رمزية فقط . |
اقتباس:
و بريطانيا ايضا تفتخر و فرنسا و العرب يفتخروا ... و كل العالم يفتخر بتاريخو المظلم و المشرق بالمناسبة حتى الظواهري مفتخر بتاريخ القاعدة ! بس الكلمات و الشعارات ما تغير الحقيقة و ما تلغي المجازر ... لكن يظل شي ايمو مستقبل و بعض الشعوب فعلا تحولت من الهجية الى حالة أنزك قليلا ... ! بالمناسبة تركيا و التركمان مو حبايب ... بس بسبب بعض الظروف الاقليمية صارت تهتم فيهم ... ممكن يكون السبب خلافات عائلية من ايام آسيا الوسطى ؟؟ |
طبعا في شي اسمو مستقبل , بقى خلينا نستنى مفاجأتو
|
اقتباس:
بئس من يشتم الذّل و يمارس الإذلال في الوقت ذاته, فهو كمن يحرق القمح و يشتكي غلاء الخبز. و ما أكثر النوعين.. بحسها جداً تنطبق على حالتك, لأنك عم تعمل بالضبط نفس الشي اللي دائماً تشتكي انو عم ينعمل فيك.. يعني لأنك مناصر للأتراك صارو الأتراك ملائكة, و ترفض الاقرار بأخطائهون و جرائمهون.. و تطالب غيرك يعترف بجرائمو؟ مو زابطة.... اقتباس:
بحكيك هاد, بتذكرني كتير بشي ناطق بعثي و هو يحكي عن الحريات بسوريا, جداً ها... و يمكن لازم تراجع نفسك لأنو يفترض هالناس انت عم تحاربهون لأنو هاضميلك حقوقك |
اقتباس:
بس مستغرب كيف عما تفسر الجهود الأرمنية المستمرة لفتح ملف المجزرة بأنها تهرب وبنفس الوقت عما تعتبر القوانين التعسفية اللي بعدها سارية المفعول بحق كل شخص بشكك بوجود مجزرة او احداث قتل وتهجير بأنها دعوة للحوار ولفتح الملف بطريقة جدية . وذكرتلك اسماء اشخاص اتراك الجنسية تم اغتيالن بسبب فتحن ملف المجزرة بطريقة ما اعجبت السلطة التركية اقتباس:
تهمته كانت بسبب تصريحه لإحدى المجلات الأوروبية بمقتل مليون ارمني في مذبحة على ايدي الاتراك وبحسب تعبيره اللي مستحيل اقدر انساه " ولا احد غيري يجروء على قول ذلك " فـبعدك مصرّ على جملة " ربما هم خائفون من الحقيقة " ؟؟!؟ |
كمان عهامش الموضوع:
كيف ممكن تكون جريمي ارتكبها جدي وصمة عار عليي انا:?؟؟وعاي اساس بتحمل عواقب افعالو :shock:؟؟ |
علة نفس الأساس يلي بيطالبو فيه الفلسطينيين بحق العودة وإلا بتنتهي الجريمة وبيتوقف العقاب على وفاة المنفذين.
|
اقتباس:
ثاني شي .. هون المشكلة مو شخص مع شخص ... المشكلة شعب مع شعب و لذلك من يكون الشعب موافق و مستفيد من اللي صار .. اكيد رح يتحمل المسؤولية الادبية على الاقل |
اغلب تاريخ البلدان بيشيد بحضارات الاجداد المؤسسين وبيحكي عنهم بقدسية وتنزيه . فـ بشوف انو شعب تربى على احترام هيك شخصيات صعب يرجع يبحث وعم بحكي عن الشعبين . وبنفس الوقت اثبات هيك جريمة بتضل خطوة رمزية مدينة للقاتلين . والتعصب بالموضوع من الطرفين غير مقبول . |
كوننا عم نحكي على ملف الارمن والاتراك فمافي مشكلة اذا حطيت شوية افكار براسي عن الموضوع
سؤال جيمي : اقتباس:
" شو بتخسر تركيا لو اعترفت بالمجازر ؟ " يعني الاعتراف بجريمة ارتكبها اتاتورك " السفاح " ما حتأثر أبدا على السلطة التركية الحالية وان كانت امتداد للسلطة العثمانية الا ان صيغة الحكم وشكله ومبادئه مختلفين تماما . بيعتقد البعض انها بترفض الاعتراف بوجود نقطة سودا بتاريخا .. شخصيا برفض هلطرح لأن مساوء الاعتراف لا تقارن مع ايجابياته على اقل تقدير بتكون خلصت من المدايقات والضغوطات المتعرضة الها حاليا نتيجة عدم تجاوبها مع المطالب الأرمنية . تحليلي الشخصي ونظرتي الشخصية بتقول انه تركيا عندا تخوفات بأن اعترافها بالمجزرة ممكن يكون دافع للأرمن بالمطالبة بأراضي تركية حالية بزعم انها من حق الأرمن المعرضين للمجازر وهيك بتكون خطوة الاعتراف ملحقة بخطوة طلب التعويض عن طريق منح الأراضي ... الشي اللي الحكومة التركية عما تحاول تتفاداه بأي وسيلة كانت . في كتير عالم ماعندا ايا علم على الموضوع لهيك بدي لخص الأحداث .. اذا حدا عنده شي يضيفه او ايا اعتراض باب المشاركة مفتوح للجميع تاريخيا اراضي الأناضول ما بتشكك باحتضانها للقومية الأرمنية عبر العصور ، وان كان الارمن اللي فيها دائما بحالة مذرية ودائما في حالة من التشتت ودائما في حالة تبعية للمستعمر ( فارسي - بيزنطي - اسلامي - مرورا بالعثماني ) تعرض الأرمن خلال كافة المراحل لمضايقات ومحاولات انتزاع لغتن وقوميتن ودمج التجمعات الارمنية داخل الكيان العام خلال الفترة العثمانية ما كان الوضع متأزم متل ما الكل متصور .. أو على الاقل في نهاية القرن التاسع عشر ما كان كتير متأزم القصة كلها ظهرت مع ضعف الدولة العثمانية وظهور اطماع من الدول الكبيرة ( روسيا - انكلترا - فرنسا ) باستغلال مرحلة الضعف في التاريخ العثماني العثمانيين أو الأتراك خلينا نقول عندن قناعة بأن روسيا التجأت للأقليات العرقية والقومية وحرضتن للثورة المسلحة بوج الحكم لإضعافه الاحزاب الأرمنية ( طشناك ، خنجاق ) بتم اتهامن بإقامة مجازر بحق الاتراك اللي كانوا عايشين ضمن المنطقة الجغرافية الواصلة بين تركيا وروسيا من طرف تاني الأرمني ما بيعترف بتهمة حمل السلاح بالأصل وبيعتبرا كذبة تم تلفيقا من السلطة التركية الحالية بمحاولة لتخوين الاتراك والتستر عن عملية التصفية العرقية تحت تسمية " الدفاع عن الوطن " ومجموعة كتير قليلة التقيت فيها بتقر على مضض بواقع حمل السلاح بوجه الـ "محتل " العثماني بتقول بأن حمل السلاح ما كان لتحقيق اهداف خارجية تماشيا مع المصالح الروسية بقد ما هوي محاولة الحصول على الحرية اللي ما بعمرن حصلوا عليها .. فكانت فترة ضعف الحكم العثماني فرصة ما بتتفوت ليحصل القوم اللي عاش تاريخه بشكل محتل على الحرية . موقف الاحزاب الأرمنية المسلحة واجهه عبد الحميد التاني بقبضة من حديد .. ولحد اللحظة عبد الحميد التاني مشهور عند الارمن باسم ( السلطان الأحمر ) نتيجة الدماء الأرمنية اللي اسيلت بأمر منه . الوضع المتازم بين الارمن الثائرين وبين العثمانيين المجاهدين للسيطرة على الوضع استمر بتواتر مختلف حتى قيام الحرب العالمية الأولى ، دخول روسيا على الامبرطورية العثمانية من حدودا الشرقية لاقاه هياج وغضب تركي - اسلامي كبير خصوصا بأن المنطقة الحدودية الشرقية بتحضن الأغلبية الارمنية فكانت التوغل الروسي دليل دامغ على التواطئ الارمني- الروسي ضد الدولة العثمانية وتم اتهام الأرمن بتشكيل ميليشيات ومهاجمة المدنين الاتراك العزل وارتكاب جرائم ومجازر بحق اطفالن . الحل كان بالنسبة للدولة العثمانية بأنها تطلب من ارمن المنطقة الهجرة من مكانن " في الحدود الشرقية " نحو منطقة الشمال السوري - العراقي ففي حال خضوعن للرغبة العثمانية فهاد بيعني انصياعن لقرارها .. فهنن غير متحالفين مع روسيا اما في حال عدم الانصياع فبكونوا اعلنوا رسميا اشتراكن بعمليات القتل والذبح وبتم التعامل معن تماما كالتعامل مع الاعداء . التاريخ بصرح وبقر على انصياع الأرمن التام للرغبة العثمانية ..فكانت هجرة الأرمن دليل دامغ على عدم اشتراك الأرمن بالمجازر المرتكبة ضد الاتراك من قبل روسيا الهجرة هية النقطة المحورية وهية مركز الصراع التركي الأرمني فاثناء الهجرة تم تصفية الأرمن عن طريق السكان المحليين اللي صار عندن حقد كبير ضد الارمن من جهة.. وعن طريق العساكر العثمانية من جهة تانية ويُقال بأن القوافل الأرمنية اللي وصلت بالنهاية كانت خالية تماما من الرجال .. وأكبر الاشخاص عمرا فيها ما كان بيتجاوز الـ 16 سنة .. والباقي كله تم تصفيته بوحشية رقم المهاجرين اللي تمت تصفيتن لحد اللحظة غير معروف وموضع خلاف لكن بالتأكيد مش اقل من300 الف ومانه اكبر من مليون وستمية انسان . عملية التصفية طالت باقي الأقليات المسيحية من آشوريين سريان وكلدان .. لكن الأغلبية الساحقة كانت من الأرمن لهيك ما كتير منشوف اصرار من بقية الأقليات على الاعتراف التركي بالمجزار قد ما منشوف عند الأرمن .  الصورة التالية من عام 1915 بحسب الويكيبيدي: اقتباس:
 واللي بهمه يشوف صور اكتر حول الموضوع - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - وعذرا على الإطالة . |
| الساعة بإيدك هلق يا سيدي 10:28 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
؟؟وعاي اساس بتحمل عواقب افعالو 
؟؟