|
تذكرتك لبيت خالتك ..بعمرها ما كانت اسهل !
بالفترة الأخيرة صار الحكي كتيير عن انو الناس بسوريا ملّت و قرفت من التنظير و التشخيص ..و كمان صار الحكي كتيير عن انو الأزمة السوريّة ما الها حل ...او حلها مانو بمتناول الشعب السوري ....و صار الحكي كتيير عن انو الحديث عن الوضع السياسي و الأمني بسوريا بيولّد استجابة عند المواطن السوري بتشبه استجابتو للرائحة الكريهة ! حابب من خلال الموضوع هاد و عبر المنبر هاد انو اسمع من السوريين نفسون شو هي مُقاربتون للحل بسوريا ...و خلونا نتجاوز التشخيص و التنظير ... انو مثلا عنجد يمكن ما يكون فيه حل ! او ما قادرين انو حتى نفكّر بحل منطقي ! ...طيب ...اذا ما في حل ...خلونا نفكر بحلول جزئية ما بتعالج مشكلتنا بالكامل بس بتحسن من حالتنا شوي ...يعني هون بقصد ...المعتقلين السياسيين و معتقلين الضمير كملف ..و قانون الطوارئ كملف تاني ..او قانون الأحزاب ,,,او قانون لأعلام ...الخ .. و على فكرة ...صدقوني ,,يمكن تفكرو انو في افكار معينة صغيرة و ما كتير الها قيمة و ما بتنفع كحل او كجزء من الحل ...بس الأفكار هي يمكن تطلع مفيدة كتيير لألنا ,,او الأفكار هي اذ كلها انجمعت مع بعضها ممكن تعمل شي ....لهيك بتمنى انو كل واحد و لو بيعتبر انو فكرتو ما كتير مهمة معلش ..خلونا كلنا نسمع بعض ...سواء لو كانت افكارنا ثورية ...او لو كانت افكارنا بتشوف انو واقعنا قابل فقط للتغيير ضمن حدود ضيقة ....سواء اذا عم نحكي نحنا شو قادرين نعمل من داخل سوريا ...او عم نحكي شو قادرين نعمل من الخارج ... خلونا كلنا نسمع بعض ....حتى ولو كنت موالي للرئيس بشار الاسد و منظومة السلطة بسوريا ....كمان بهمنا نسمع رأيك ... يعني خلونا نقول كيف منعمل حلول و شو هي الأليات الممكنة لتحقيقها ..ما ضروري شرح مفصل عن الأليات ...بس افكار عريضة ...انو مثلا انا بشوف مقاطعة الأنتخابات البلدية و النيابية و الرئاسية بسوريا فكرة حلوة وما بتطلب مننا غير انو نقعد بيبتنا ...او مقاطعة النشاطات الحزبية بالمدارس و الجامعات ,,كمان نفس الشي ... او مثلا ضراب من العمال عن العمل ليوم واحد بيشمل البلد كلها مثلا للأحتجاج على زيادة الأسعار ... او هدون البرا مثلا ...اعتصامات امام السفارات السورية بكل دول العالم يلي بتسمح بشي اسمو اعتصام ,,للمطالبة الأفراج عن معتقليين الرأي و الغاء قانون الطوارئ ...يعني هو اعتصام واحد بصراحة ما الو قيمة ....بس يوم اعتصام ب برلين ..و بعد اسبوع ب نيويورك و بعدين بلندن و ب باريس و موسكو ...بتصير الحكومة تشوف انو في شباب عم يحكو و صدقوني لما بتكون الشغلة جماعية و في كتير من السوريين برا.. ما قادرين يسجنون كلون بس يرجعوا على سوريا ...خصوصا انو الأعتصامات هي الها مطالب محددة و وطنية بالدرجة الأولى ..او حملات انسانية بالجامعات يلي عم يدرس فيها السوريين برا بتجذب عدد اكبر من السوريين و بتلفت الأنتباه اكتر و اكتر ....في مثلا التطوع بمنظمات متل العفو الدولية و الهيومان رايتس ووتش .. يعني فينا نبحبش و نشوف شو قادرين نعمل ...ما بظن انو خلص متنا على الأخيير !! و حبيت حط العنوان بالطريقة هي فقط لتبيان الأنحطاط يلي وصلنالو بسوريا ..لما بتصير الكلمة ....تذكرتك للسجن |
حكي حلو
بس بظن اول خطوة هي انك تعرف بالضبط كم سوري بيرغب فعلا بالتغيير.. من السوريين داخل سوريا و خارجها انا بتوقع انو بأريحية تامة اغلبية المسيحيين و العلويين و باقي الطوائف الصغيرة رح ترفض التغيير خوفا من شبح الارهاب يلي رح يصير من الانفلات الامني و يلي رح ينهي سوريا بالشكل يلي منعرفها من هون لشي خمسين سنة نفس الكلام رح ينطبق على تقريبا كل السنة السوريين الغير متعصبين.. و يلي هني اكتر من السنة المتعصبين هالحكي داخل سوريا.. خارج سوريا.. نسبة السوريين العلمانيين او المسيحيين اعلى من نسبتها داخل سوريا (مجرد احتمالية اكبر لهجرة الناس يلي معها مصاري أكتر.. و ازدياد المصاري يتناسب عكسا مع ازدياد التدين غالبا)... بقى نفس النتيجة هلق انا اطلب منك رقم واضح و دقيق عن اديش بالضبط نسبة السوريين مستعدة تموت كرمال سوريا بشكلها الحالي.. و نسبة يلي مستعدة تموت كرمال التغيير... شو رح يطلع معنا؟ اول شي بيطلع معنا انو نحنا ما منعرف شي.. بس منقدر نتوقع نسبة اعلى للجماعة الاولى بقى يعني اذا السوريين الراغبين بالتغيير انفسهم ما بيعرفوا عددهم و تمثيلهم الطائفي و السياسي و الجغرافي (داخل و خارج سوريا).. فأيا نوع من التغيير نحنا بدنا نحقق؟ كل كلامنا بينصب تحت خانة حديث قهاوي... ما إلو أي معنى على الأرض يعني حتى الاجوبة يلي رح نحصل عليها هون.. مانا معبرة بأي شكل من الأشكال عن نسبة الشعب الحقيقية هون رح تلاقي نسبة كبيرة من الناس يلي مستعدة تنظّر ليوم التنظير. بينما لما تجي ال moment of truth .. يمكن يوقفوا ضد اي تغيير خوفا على طائفتهم ثم بخصوص التنظيم.. بتلاقي السوري بس يطلع برات سوريا .. إحدى اهم النصائح يلي بتنعطالو هي انو يبعد عن سوريين!! و فعلا هون بتلاقي الجاليات السورية عبارة عن جاليات طائفية مناطقية.. اهل كل مدينة و طائفة صحبة مع بعض و بس... مافي شي اسمو جالية سورية متلاحمة و إلها وجود و لوبي جروب... للاسف مع انو اعدادنا هائلة و عنا قوة اقتصادية كبيرة بكتير دول بالاميركييتين.. بس على الفاضي طيب هي كمان بدنا نلوم عليها الحكومة؟ مع العلم انو هالهجرات قبل و خلال و ما بعد الحركة التصحيحية المجيدة يعني انقساماتنا موجودة داخل الوطن و خارجه... بقى... ناس منقسمين مافيك تتوقع منهم شي بخصوص الحل.. انا ممكن اطرح عَلمَنة الشعب (من علمانية).. بس هالطرح رح يكون في مقابيلة طرح مقابل هو أسلمة الشعب بما انو نسبة كبيرة من العرب شايفة انو مشكلتنا هي الابتعاد عن الدين! (كل هالتدين و لسا بدهم تدين أكتر)... بقى طرحنا رح يكون متل يلي عم يطبش بالمحيط... بقى انسى الحل الوحيد الممكن هوي حل بعييييد المدى جدا و هوي عبارة عن تشكيل مجموعات جدية لنشر الثقافة و العلم.. و بقى بتتأمل انو بسبب العلم و الثقافة الشعب رح يوصل للعلمانية لحالو.. بدون دفش يعني انت بتعطيهم الثقافة و العلم.. و بتتركهم يوصلوا للنتيجة الصح (لانو نحنا منفترض انو بالاساس العلم و المعرفة المفروض تودي لهيك اتجاه..).. يعني بدون ما ندحش بعقولهم شغلات بتخليهم ينفروا من العلمانية و التحرر. هالشي رح ياخد وقت... بس هي الطريقة الوحيدة المضمونة برايي و هي شغلة كل الناس ممكن تشارك فيها و كل شخص بيشارك بالشغلات يلي بيفهم فيها شغلة حلوة مثلا بلشت شوفها هي انتشار عقلية التطوع. صار في برامج للتطوع بسوريا بالصيف و قصص متل هيك... هي اول الطريق لانشاء مجتمع مدني.. يعني خطوة خطوة منوصل نشالله |
اقتباس:
بس كتعقيب على هي الفكرة.. اعتبرها كانك عم تنظم حملة انتخابية. ما بدك معلومات عن قاعدتك الجماهيرية مشان تقدر تختار برنامج صحيح؟ اكبر دليل على فشل المعارضة انهم بكل طروحاتهم بيهاجموا النظام.. بس ما بيطرحوا شي بيتعلق بالشعب و شو رح يقدموا هني للشعب كبديل بقى انا اذا بدي فكر جديا بالمعارضة.. لازم اعرف مين معي.. غير انت و فيفا سيريا و صديقي جاك حوراني.. بدي اعرف نسب الشعب و شو تطلعاتهم و شو رايهم.. غير هيك بكون انا بس جاي اعمل ضجة اعلامية أو متامل اني اركب على ضهر دبابة اميركية.. ما بيجوز هالكلام بصراحة لو في رغبة حقيقية للتغيير عند السوريين كنا من زمان منشوف جرايد و مواقع معارضة حقيقية تابع للجاليات السورية الكثيرة جدا الموجودة بكل مكان... بس مافي رغبة و لا في حيل.. عوجاااااااااااا |
كلام خطير بس قبل كل شي هي :D
اقتباس:
كلامك مهم كتيير و النقط يلي ذكرتها كتيييير مهمة ...بس خلينا هيك نحكي مع بعض شوي برحابة صدر .. صديقي ... اولا ,,كلامك كأنو نحنا عم نحضر لشي حرب ..بلشت عم تحكي عن الموت و عن الأستعداد للموت ,,و كأنو في شي خطير بدو يصير ...يا رجل عنجد خليتني خاف ...لأ Joe ..ما حد حكى انو بدنا نموت ..بالعكس ..خصوصا انو على المستوى الشخصي ما بآمن بأي سيناريو بعد الموت,,,يعني اذا متت و انا هلئ شب ..فبتكون ,,,طلعت ب ***** نظامي .. فخلينا اول شي ننسى قصة الموت ..و ما تكون متل غيرك ..تمسك الموت و تبلش تخوف الناس فيه .. هلئ مين الناس و كم نسبة الناس يلي عندها الأرادة انو تعمل شي ...هيك عم تصعبها كتيير علينا ...خليني قلك ...برأيك في نسبة بسوريا لتمثيل الطوائف ضمن المجتمع السوري ..لك في نوع من الأحصائيات او دراسات لأي شي بيتعلق بالديموغرافيا عنا ... كيف بدك ياني طلعلك نسب ...طيب انا ما قادر طلع نسب ...بس انت طلعت نسب و استعجلت و قلت يلي بدون التغيير اقل من يلي بدون الوضع هاد ...شو هي الأرضية يلي اعتمدتها لتوصل للنتيجة هي ! القصة باخدها بالشكل التالي ...انو انا مع التغيير ... اذا انا مع انو اعمل شي ..ما بهمني اذا ورايي عشرين مليون ...او عشرين شخص ...مع اني بحترم توقعاتك عن النسب و هيك شي بس انا كمان عندي توقعات انو لي بدو التغيير ...اكتر بكتيير من الشي يلي بتتوقعو ! اقتباس:
اقتباس:
بخصوص التنظيم بالخارج ..هادا شي قادرين نشتغل عليه خصوصا انو البيئة برا بتساعدك اكتر بكتيير من لي جوا .. بعرف انو برا في عالم طالعة بفيزا مزورة و عم يشتغلو بالأسود مشان يرجعو لبلدون و معن كام ليرة بعد كام سنة ... بس هاد ما بيلغي انو في ناس كتير تانية لأ ظروفها بتساعدها لأنو تتحرك ..و عندون الرغبة ...بس يمكن ما في المحفز ...كلامك صح مية بالمية ..مجتمعاتنا برا مشتتة كتيير ,, بس اذا انشغل على قصة تنظيم الخارج بلاقي في امل و امل كبير . اقتباس:
اقتباس:
ما حدا قادر يعطيك ضمانات انو رح يكون معك مليون واحد او هيك شي .. الشي الوحيد المضمون ,,,,,هو التذكرة :o |
النقاط يلي طرحتها Joe مهمة كتير ...و الي رجعة تانية
|
النقاط يلي طرحتها مهمة كتير ...و الي رجعة تانية لتفاصيل اكتر
|
اذا بتسمحولي ادخل على خط النقاش
اقتباس:
هلق انا معك انو أغلبية الشعب بسوريا صارت تحسبها للاسف من منطلق طائفي بس ياأخي انو في أمثلة كتيرة عم تصير عم تعطي أمل انو في كسر لهاقاعدة الذهبية اللي اشتغل عليها حافظ أسد كتير لانجزها خود عندك مثلا من الطرف العلوي معارضين كتير دفعوا ثمن معارضتن غالي, صح الاغلبية لازالت مقتنعة بفكرة الوحش الاصولي اللي بدو ياكلنا من بعد التغيير, بس الواقع السئ اللي عايشينوا عم يخلي كتير منن يتنبه للحقيقة. يعني أهم شي بهالمجال انو لو في جهة محايدة موثوقة عندها قدرات اعلامية توصل لكل بيت سوري, بس تشرح للناس انو سبق للسوريين عاشوا بوطن واحد من دون قانون طوارئ و قائد مفدى. اقتباس:
اقتباس:
اقتباس:
أنا رح قلك شغلة, نحني عم نناقش التغيير من وجهة نظر داخلية فقط, بس انا رأيي انو نسيانين شغلة اهم وهي التأثيرات الاقليمية والدولية, هي باوربا الشرقية انا بعتبرن كان عندن وعي سياسي اصعاف اللي عنا هلق, وحاولوا كذا مرة يعملوا انتفاضات بس فشلت دائما لانو الظرف الدولي كان دائما ضدن. أنا معك بنقطة انو الحل لازم يكون تدريجي بس يا أخي بدك نظام يفك العقدة شوي, يسمح على الاقل لتلت او اربع شباب يقعدوا يحكوا بواقع بلدن من دون ما تنتهي السهرة بالاعتقال, يسمح بوسائل اعلام مستقلة, جمعيات ومؤسسات تعليمية ترفع شوي من مستوى الشعب بدل من جيل الاميين اللي عم يتخرجوا من الجامعات. يعني بالنهاية نحني عم ندور بدائرة مفرغة, لانو الشعب مو قادر على التغيير و لحتى يصير قادر على هالشي بدو اعداد وطالما في ناس ضد مصلحتها هالاعداد مارح تسمح في, وتغير الظروف الدولية اللي عم تعطي النظام الحالي المناعة ضد التغيير هو الامل الوحيد انو نحط رجلنا على اول الطريق. :D |
سلامات شباب و شكرا على المداخلات القيمة
انا ما حددت الاخوان المسلمين بالتحديد. طبعا هني طرف بالموضوع بس بتخيل هني احسن من غيرهم كلنا منعرف انو الارهاب ما بيحتاج قاعدة شعبية. و انو بيكفي وجود نسبة معينة تؤمن بالعنف و بالتعصب لحتى تصير كوارث. يعني صحيح انو نسبة المتعصبين السلفيين اقل من نسبة المتديني بشكل معتدل و اقل من العلمانيين حتى (or at least i hope and think so).. بس هدول كافيين ليعملوا مغنطة للشارع. انا النقطة يلي طرحتها حتى لو ما كانت حقيقة مية بالمية.. بس هي قلق حقيقي و مشروع و موجود عند الجميع. الكل خيفان من هالشي.. بقى هادا سؤال لازم يتجاوب عليه انا شايف انو علينا خطر قومي حقيقي بالاضافة للارهاب و هادا الخطر متمثل بالعناصر الكردية الغير سورية يلي اكيد هلق صار منهم كتير بسوريا. هدول بيشكلوا خطر أمني كبير على السنة العرب بالشمال و على الاشوريين و السريان. اول ما يصير انفلات امني فيك تتوقع تدفق شديد للمزيد من الاكراد الغير سوريين... و بظن في كتير تقارير عم تحكي عن وجود للمخابرات الاسرائيلية باقليم كردستان.. بقى ان كان بلدنا هلق فيه اختراق, فيك تتوقع يصير منتزه او حديقة عامة. هدول جماعات عندهم قدرة على التسلح المخيف لانو الحدود رح تكون مفتوحة على مصراعيها. انا هدول بيخوفوني اكتر من اكبر متعصب عربي سوري. هي نقطة... النقطة التانية هي بخصوص المعارضة يلي فيها علويين و مسيحيين. اولا.. عفوا بس بصراحة يمكن بينعدوا على اصابع ايد وحدة! :cry: ثانيا.. ما سمعنا انو حدا من الشعب وقف معهم .. و يا دوب حتى على الانترنت. التنديدات باعتقالهم ضلت محصورة بنفس شلة المعارضة نفسها و عدد معين من الناس يلي ألريدي متعاطفة. اما الناس يلي اول مرة بتسمع عن الخبر قالتلك بيستاهلوا.. انو كيف بيكتبوا هيك و كيف بيختاروا هادا "التوقيت".. طيب اي يحرق عرض هالشعب يلي ما بقى حتى يؤمن بحق الانسان بالتعبير و بالكتابة. اذا الشعب العادي هيك.. شو بتتوقع من الموالين للنظام؟ (على الهامش.. كان في اعتصام قدام احدى السفارات السورية بإحدى الدول الأجنبية بسنة 2005 و صديقي جاك حوراني شارك فيه بشكل سلمي: يعني شغل راح و وقف و اتفرج مين موجود.. اي كل الموجودين يا اخونجية كانوا يا اكراد مو معروف شو الاجندة تبعهم.. و أمو لجاك حوراني يا لطيف اديش انقهرت انو كيف بيروح -- مو خوفا عليه -- بس لانو هي خيانة! اي خود بقى.. على شوي كانت رح تغضب عليه.) النقطة التالتة بخصوص قصة انو نموت او ما نموت. هي نقطة ضعف عند الانسان المتحضر. كل ما ازدادت ثقافة و تحضر الانسان, كل ما صار متسامح اكتر و منفتح اكتر ... و طبعا.. عندو استعداد اقل انو يموت مشان اهدافه... اي هي مشكلة كبيرة بصراحة. لأنك رح تكون عم تتنافس مع ناس مستعدة تموت. الموالين للنظام رح يكونوا مستعدين يموتوا كرمال يضل موجود لانو زوال النظام يعني انو رح يطالهم و يطال عائلاتهم تصفية و اعمال انتقامية... و الناس المشحونة قوميا متل الاكراد او دينيا متل السلفيين كمان مستعدين يموتوا... نحنا وين بالمعادلة؟ نحنا بدنا نعمل مجتمع مدني و بدنا ننشر الثقافة :lol: ... اي ما بعرف يعني كيف رح نقدر نربح اذا حتى تنظير مو مستعدين ننظر و نقول فداااااكي سوريا.. يعني الله يعينا و يعين سوريا احسن شي :D |
لعمى شو اني صاير بومة متشائمة :shock:
|
طيب ما لازم بالاول يتشكل شي اسمه مجتمع مدني قادر يتحرك يعني الحراك اللي صار ضد قانون الاحوال الشخصية او حملة الموبايل بتصور في حراك عند الكل
بس في شغلة ما فهمتا هلأ ليش ما بالاساس يتوعى الشعب انو انا السني مثلك انت العلوي مثلو هوي المسيحي مثل هيداك الدرزي والتركماني بالاخر سوريين ولا نسحبها طائفية مش هي بالاول المفروض تكون؟ |
اقتباس:
اقتباس:
بس شو الحل برايك؟ اقتباس:
|
اقتباس:
متل ما الأرمن عندهم مدارس بتعلم أرمني.. هدول نفس الشي كمان مع انو موضوعهم شائك و بنفس الوقت ما بدك تغذي المشاعر الانفصالية بس يعني بدولة متل سوريا اسمها الجمهورية العربية السورية.. ما حدا آخد حقوقه الطبيعية.. بقى ما فيك تتوقع اي شي ايجابي او مدروس ليحل مشكلة الاكراد او اي مشكلة تانية. كلو اعتباطي |
بالعكس ينعطوا حقوقون متل غيرون بس كمان بعيد عن النزعة الانفصالية
لا تسالني كيف لانو متل ما قلت اعتباطي كلو |
اقتباس:
مشكلة الاكراد مشكلة عويصة ....وحلها صعب... الجماعة طموحن و من زمان كتير.... اقامة دولة كردستان و احياء مملكة ميديا اللي كانت عايشة من 3500 سنة .... الفرء بين الارمن و الاكراد ...انو الارمن اختارو سوريا وطن لالهن ....بينما الاكراد مابيعترفو بسوريا انو وطنن...وحتى قضاياها و قضايا العرب عموماً مابتهمّهم.... |
أنا برأيي انو التوعية و تغيير مناهج التفكير هي الاساس لاحداث التغيير المنشود المطلوب ....
ومطلوب مننا كشباب سوري انو نحاول نتعالى و نتجاوز عقد الماضي و للي ابائنا و اجدادنا زرعوها برؤوس الاجيال المتلاحقة ..... ولاتنسو ثورة الاتصال و الانترنت و تدفّق الاخبار على مدار الساعة رح يساهم ....بحد كبير ....لتفتح العقل و زيادة الوعي..... دورنا لازم يكون توعية اصداقائنا..أخواتنا.؟؟..اي قانون بيطلع ...اي فرمان بيصدر ...منحاول نفنّدو و نكشف مواطن الفائدة و الضرر الموجودة فيه ..... نبدا بحالنا....ونحاول نغيّر اللي حوالينا ... و يسلمو شطرنج على هالموضوع.....:D |
الخوف...
كلمة جوهرية في الموضوع... قبل ما يفكر الواحد بحل كل المشاكل المذكورة أعلاه في بلدو.. لازم يحل هالمشكلة بينو وبين نفسو ... كم مرة فكرتو تعملو شي وخفتو...؟ خوف من السلطة خوف من الموت خوف من الاعتقال خوف من فقدان لقمة العيش خوف من ضياع المستقبل الخوف على حبايبو وخوف من أنو الواحد يعمل شي فعلا بس ما حدا يوقّف معو ... وخوف من أنو يفقد حريتو وحياتو عالفاضي.. وكمية الخوف لا تنتهي ... حتى لو حاولنا إنكارها.. بس يكون في بيئة خالية من الخوف إلى حد ما ممكن تعمل إضرابات واعتصامات وتكتب وتنشر وتوعي وتثقف وتحارب ازا بدك كمان... الخ.. ووقتها ممكن تلاقي حدا يتجاوب معك. جايي عبالي أحكي كتير بهالموضوع لانو في كتير أشياء حابة أحكيها وإلي وجهة نظر بسيطة وإنسانية فيها ... بس عندي خوف من خيبة الأمل ... بعرف أنو الموضوع ذو صبغة سورية .. لكن، حبيت اني قول رأيي المتواضع |
بظن السؤال الحقيقي يلي لازم ينطرح هون هوي مين اهم.. الأرض لما الإنسان ... انا رح زت هالفتيشة و اهرب :pos:
بس بما اني كتير بصلتي محروقة.. فرح قول, قبل ما اهرب, انو معظم مشاكل العرب بتنبع من مفهوم انو الارض (او حتى الاشياء المبهمة الغير مرئية متل الفكرة) اهم من الانسان |
اقتباس:
شو اللي بهم الانسان؟ ;) كونو كل انسان في شي أو مجموعة أشياء بتهمو ... وفي اشياء ممكن يضحي مشانها ... وفي معايير نسبية وأولويات ... وفي انسان ما بهمو شي غير نفسو ... بقا شو اللي بهمّك يا إنسان؟ |
اقتباس:
لقلك ليش مع العلم انو طموح اقامة مجتمع حضاري ديموقراطي بسوريا قد تبدو للبعض خيال او شي مستحيل بس القصة غير هيك تماماً لانو نحنا مو مطلوب مننا ننشأ هيك مجتمع بسوريا وإنما المطلوب انو نرجع لهاد المجتمع يلي كان موجود قبل 1967 شوف اي فلم مصري او سوري مصور بسوريا بهديك الفترة وبيتوضحلك عن شو عم احكي.. راجغ تاريخ هديك الفترة ديموقراطياً وبرلمانياً وحضارياً بيبين معك انو سوريا كانت من أكتر الدول مدنيةً بالمنطقة... بتقلي صار انقلابات طيب وشو يعني؟؟ على القليلة صار تغيير وكان الحاكم عندو خوف دائم من الإساءة لعلمو انو الشعب حي والقيادات البديلة القادرة متوفرة... عندك خوف من تحول البلد لعراق تاني او يستلمو الاخوان المسلمين الحكم اذا صار اي تغيير بالبلد؟؟ هاد الشي يلي اشتغل عليه النظام طول الفترة الماضية وكأن الخيارات بسوريا تلاتة لا رابع لها استمرار النظام الحالي بشكله وأدائه الحالي أوالاقتتال الداخلي والتدخل الخارجي أو استلام الاخوان للسلطة معلم مشكلة انعدام وجود قيادات قادرة بديلة بالبلد مو نحن سببها وانما النظام ومابتصور مختلفين بهالشي.. اما انو ننطر وجود هيك قيادات لحتى تقول اي بدنا تغيير بهاد مستحيل بظل شكل الحكم الحالي.. وبأمن بقيام المسيج أو المهدي المنتظر قبل مايصير هيك شي... لك يازلمة اذا وزير بيطلع عالتلفزيون اكتر من دقيقتين بيلعنو ربو فكبف بدها تبرز القيادات؟؟ الحل لتبين هيك قيادان هو بالتغيير... مابنكر انو اي تغيير بسوريا بدو يعيش البلد بمرحلة من التخبط ممكن تستمر لعدة سنوات.. بس صدق بالنتيجة بتستقر الأمور وبتربح البلد... يعني اذا مو مشاننا مشان ولادنا عالقليلة سلام :D |
اقتباس:
بتجي للجد ..كلامك في كتير نقاط مهمة ... بس بدايةً ..في شغلة ...لهلئ بظن يلي شاركو بالموضوع اباؤون بينتمو لتلات او اربع ديانات مختلفة ...بس هي نحنا عم نحكي بكل صراحة و من دون ادنى تأثير للطائفية !! .ما عم قول انو شعبنا مانو طائفي ...لأ ..بس قصدي انو يا سيدي على الأقل جيلنا هاد وصّل لمرحلة من القرف بحيث عندو الأستعداد يرمي الطائفية وراه في حال شاف انو في جو جديد بسوريا عم تتحجّم فيه الطائفية ,,و هون المسؤولية على المعارضة انو تخلق متل هيك تطمين عند الشعب ,,,خصوصا انو النظام عم يشتغل بكل وزنو لخلق الطائفية و تخويف الناس منها في ما بعد ... و حابب ذكر مرة تانية بالأنتخابات الأربعة الديمقراطية يلي صارت بسوريا بين الأربعينات و الخمسينات و اول تلات سنيين من الستينات ...التجربة هي بتبين انو عندنا القابلية للمارسة العمل الديمقراطي ..و اكتر من هيك ..بتفرجينا شي مهم ..انو الشيوعيين و الأخوان ما حققو نجاحات مهمة بالأنتخابات هي .هاد الشي بيعني انو شعبنا بيرفض اليمين المتطرف و اليسار المتطرف بنفس الوقت . و التاريخ بيقول انو لا الشيوعيين و لا الأخوان وقفو حاجز لأعاقة الديمقراطية بهداك الوقت ...لهيك .بشوف انو ما في خوف منون في حال صار تغيير ..و اذا نجحو بأنتخابات ديمقراطية فبيكون الحق على النظم الحالي يلي ما خلا الأحزاب الوسطية تنشط طول هالسنين ..و ياسيدي و ان نجحو ..بكون في دستور ما بيضمن انو ولا واحد من هدون الطرفين رح يتحكم بشكل انفرادي بالدولة ....و انا عندي قناعة شخصية انو ما رح ينجحو ..بس ولو نجحو بعد التغيير مباشرة ..بعد عشر سنيين انا بأكدلك انو ما رح ينجحو .... |
مشان الأخطار من الأصولية السلفية و الموساد و الحركات الكردية الأنفصالية ...انا كاتبها بتوقيعي و عندي ايمان كتير فيها ...
يلي بيضحي بالحريات المدنية مشان الأمن القومي ..ما بيستاهل التنيين ! Who Sacrifices the social liberties for the national security deserves neither |
اقتباس:
بالفعل ..يعني ...انا بشوفها متل الموجة يلي بدها تجرفون بعيد برا سوريا ...انا بقصد تماما ثورة المعلومات الجديدة ...يلي سوريا ما دخلتها لمن كام سنة ...بس هلئ صار فينا نعرف حتى التفاصيل الصغيرة للشي يلي عم يصير باصغر ولاية بأمريكا او ابعد منطقة بالصين ....الشي هاد كلو ما كان موجود بالتسعينات و التمانينات ... لهيك ..بشوف انو شعبنا بدو يعمل شي ....لك يارجل اذا مثلا بمصر بصيير اضرابات عامة كلها بتنسيق عالفيس بوك ...يعني ...بظن ..انو نحنا ما مطوليين ليصير عنا هيك حراك :D |
اقتباس:
.... او خليني اخدها بطريقة تانية ... انت عم تقول انو الأنسان اهم من الأرض و هدا الشي بصميم قناعتي ....طيب شو رأيك انو صار الأنسان بسوريا عم يناضل لا اراديا مو مشان الأرض ولا الأنسان ...لأ ..السوري هلئ عم يناضل مشان النظام ,,,,الناس عم تموت مشان بقاء النظام ,,كيف عم تموت ...بقلك روح عالمشافي و شوف الناس يلي عم تموت و ما معها تعمل عملية ...الناس يلي عم تعيش بمرض قلب بدو عملية بنص مليون ..بس عم يموتو لأنو ما معون نص مليون ...او لأنو ما قادرين يدفعو ليعيشو ولادون ..و يعيشو هني كمان !! ..لاأنو في حرامية عم يسرقو عن حالون و عن ولادون و عن مليون شخص تاني يا رجل ...... الأنسان ..هو ..يلي ...******* بسوريا :D |
اقتباس:
المعارضة شقين. قيادة و شعب. نحنا منفتقد الاثنين بشكل ملموس. شيلك من داخل سوريا بما انو في نظام امني متشدد. لو في ناس عندها توجه حقيقي لتعمل تغيير و عندها برنامج و عندها تطلعات معينة, شو يلي بيمنعها او منعها انها تكون نفسها خلال عشرات السنين الماضية؟ صرنا عم نحكي بخمسين سنة. جماهير المغتربين.. او الناس يلي ممكن تترك البلد قصدا.. ليش ما نظمت حالها و اعلنت عن نفسها معارضة منفية؟ ليش مافي غير العناصر ذات التاريخ المشبوه او الغير واضحة المعالم كمعارضة خارجية؟ انا هالشي بيجعلني اشعر انو الشعب السوري شايف الوضع الحالي كشيء مقبول و ما بينغص عليه غير الفقر (مثلا)... اذا بدك تقنعني غير هيك فلازم تعطيني مثال عن حركة وحدة على الاقل نشات بالمهجر و كان عندها برنامج سياسي معين و قدمت نفسها للحكومات الغربية على انها بديل معقول. طبعا الحركة لازم تتالف من اكتر من 3 اعضاء.. مو متل حزب الاصلاح يعني تحياتي |
اقتباس:
بالفقرة الاولى.. مين جيلنا هادا؟ جيل الفيس بوك؟ اديش نسبة السوريين داخل سوريا يلي بيستخدموا الانترنت؟ انت نسيان كمية الرعاع و البشر الموجودة بسوريا؟ سوريا اكتر من 50 بالمية من سكانها دون ال19 (تقرير حديث من دراسة كويتية).. على فكرة.. لازم تلوموا سيريا نيوز على تشاؤمي.. كل يوم و التاني اما جريمة شرف او جريمة ثأر او عراك جماعي بين عائلات بالفقرة الثانية.. I don't think it's relevant at all to talk about the political situation 50 , 60 and 70 years ago! الاجواء السياسية و الاجتماعية بتتغير خلال خمس سنين.. شوف نسبة الحجاب بين نساء سوريا .. كيف كان بالماضي و كيف صار هلق... الشعب عم يتجه نحو التدين و مو حيالله تدين... التدين المنظم و السلفي.. من قبيسيات لمدري مين.. يعني انت مقتنع بكلامك اننا ممكن نعمل اسقاط لحالة سياسية من خمسين و ستين سنة على وضعنا الحالي؟ يا رجل هالحكي كتير قديم و معادلات كتير اتغيرت و الديمغرافية تغيرت بشكل رهيب |
اقتباس:
يلي رح قولو هلق رح يطلع كتير دج و كونتروفيرشال.... بس مافي دليل انو الديمقراطية بالضرورة هي الحل الامثل للبشرية. انا بشوف انو مزيج من الديمقراطية و من التفرد يمكن تكون احسن.. على شرط طبعا يكون الشخص المتفرد بيفهم بليرة و بيهمه مصلحة الشعب بس تخيل مثلا ديمقراطية بروسيا ايام الحرب العالمية الثانية؟ شو كانت عملت؟ في ظروف بتكون فيها الديكتاتورية احسن و اكتر فائدة هلق انا ماني عم قول انو نحنا عنا هي الظروف ابدا... بس انت علقت على قصة الأكراد و قلت انها ما بتستحق تعليق الحريات المدنية لانو بالنسبة إلك القانون انو يلي بيضحي بالحريات المدنية مشان الأمن القومي ما بيستاهل التنين... انا بنظري انو الموضوع مو بهالبساطة... و احيانا الأمن القومي بيجي بأولوية قبل الحريات المدنية الحريات المدنية بتروح و بتجي بس الأمن القومي بيروح و ما بيجي! مجرد فكرة للتأمل ... كالعادة طبعا :pos: |
اقتباس:
مشان هيك انا طرحت فكرة انو العمل لازم ينصب بخانة التعليم و نشر الثقافة لرفع من سوية الانسان السوري اولا لانو بوضعنا الحالي... الانسان السوري ما بيعرف شي و لا بيعرف حقوقه و لا بيعرف شو بده اصلا بدليل انو مافي جنس المعارضة الحقيقية يلي عندها رؤيا و هدف و شكل معين.... بقى مع هيك انسان مافيك تعمل ثورة بيضاء نضيفة.. فيك تعمل بس ثورة عنيفة.. انا ضد العنف مبدأيا (بس مو دائما).. بس خلينا نكون على نفس الصفحة و نقول انو كلياتنا ما بدنا حرب و دمار بسوريا.. اذا بدنا حرب و دمار فخلص الموضوع منتهي.. الحل ببساطة انو تجي اميركا او اسرائيل و تسقط النظام ... يعني الحل سهل... بس نحنا ما بدنا هيك.. بدنا تغيير سلس بيضمن حقوق كل الناس و كل الفئات و بيسمح بعودة الحياة السياسية و الصحافية إلخ باختصار.. اذا الصراع مشان شقفة أرض اسمها سورية مين بدو يحكمها.. فأسلوب الاخوان و الغادري و خدام و هالفئات بينطبق تماما. هدول جماعات ما عم تقدم اي بديل او برنامج للإنسان السوري... بل بدها الأرض و السلطة اذا الصراع مشان تحسين حياة الانسان السوري.. فهالشي لازم يتطلب انو ننسى قصة السلطة و نتعامل معها كواقع.. على الأقل للمرحلة الحالية.. و نهتم بنشر التوعية و الثقافة.. ما بظن هالموضوع مستحيل او رح يواجه معارضة شديدة من الاجهزة الامنية. تحياتي إلك و للجميع :D |
صحي هلق قولكن هادا المنتدى مراقب؟ :?
لاااا... ما بتخيل lol |
اقتباس:
الحريات المدنية و الأمن القومي متلازمين مع بعض ...و لو انا اتفقت معك انو بظروف استثنائية لازم يصير شوية تقديم للأمن القومي على حساب الحريات المدنية ....بس هدا ما بيعني انو لازم ندعس على الحريات المدنية و نغتالها اربعين سنة و نضحي فيها ! طبعا ما حدا قال انو مع امريكا تغير النظام بالقوة ...هدا الشي مو وارد عند حدا هون على حسب ظني . السياق يلي ذكرت فيه التجارب الديمقراطية بسوريا قبل البعث ..ما كانت بسياق اسقاط التجارب على وضعنا هلئ ...اخدت منها بس نقطتين ..الأولى انو شعبنا مارس الديمقراطية بمرحلة من المراحل ,, و التانية انو ما قدر لا الشيوعيين و لا الأخوان يحققو اي انجاز .. |
اقتباس:
|
اقتباس:
خوف من انو يبقى الوضع نفسو .. خوف انو تاريخ سوريا و مستقبلها يضيع بكلمة.. " سوريا الأسد" خوف من الفقر خوف من الظلم يستمر خوف من مزيد من الأنقسام بالمجتمع السوري خوف من الحرب الأهلية اذا بقي مجتمعنا طائفي و مشحون بالشكل هاد خوف من انو الخوف يصير عنا شي عادي بتعرف Joe ..بتجي للصراحة ...كلام Nirvana فيه جواب على ا سئلتك ليش شعبنا ما تحرك جوا و برا طول السنيين ! حاولت لاقي جواب لأسئلتك هي ..بس بالفعل شفت بالرد هاد جواب منطقي جدا طيب يعني هيك خلص !! ...هاي هية النتيجة ...ما بقى قادرين نعمل شي ... ما فينا نفكر بأضرابات شعبية .. احتجاجات سلمية ..اعتصامات بالداخل او الخارج ...تنظيمات شبابية بالخارج او الداخل بتحاول تتحرك قدر المستطاع ...مقاطعة انتخابات ,,و مقاطعة نشاطات ,,,خلص ...الخوف من هدون حثالات المجتمع بأقبية الفروع الأمنية ..صار عنا قبل ...حرياتنا ..افكارنا و تصوراتنا و انتمائنا و احلامنا و كرامتنا و شرفنا ...اذا النتيجة هيك ....لأ عمي ....خلي كل واحد فينا لكن يربي ولادو برا ...على الأقل ما بيطلعو متل اباؤون ,, بتعرفو شو .. عم فكر انو اذا الخوف بينتقل بالجينات او لأ |
اقتباس:
لأ ..طبعا عم امزح ...نحنا قدها و قدود :gem: ...و تاريخنا بيشهد بالشي هاد lOl.. بس العتب على لي خلاني اتشائم :x شو مشان انا عم اكتب و علّق على ردودي ...يبدو انها على قولة الله يزكرو بالخير ..." انفصام بالشمسية " |
اقتباس:
اذا كان هالانسان بهمو الشأن العام بقدر ما بهمو الشان الخاص، ممكن يقدم شي لبلدو ولشعبو ... وشوي شوي ممكن يصير وعي عام وتصير التغيرات المنشودة.. لكن، إن كان كل واحد فينا ما بهمو غير حياتو الخاصة وما يتعلق بها وبالتالي بخاف من السلطة والاعتقال ومستقبلو إلخ...، فالحكي اللي سبق ذكره أعلاه من قبل المشاركين في النقاش بعمرو ما رح يصير... فأي تغيّر بدو يصير لازمو معجزة ليصير... وأنا بطبعي لا أؤمن بالمعجزات. المشكلة انو الهم العام أو الشأن العام ما بقيلو مكان بحياتنا ... سواء لظروف شخصية وحياتية، أو تراكمات تاريخية، أو كوننا من ولاد هالزمن... ويمكن كل هالأشياء مجتمعة. والأشخاص اللي بعنيهم هالشأن العام ليس بالقول فقط بل بالفعل أيضاً قلة قليلة. (جو) سأل سؤال مهم، وانا رديت عليه بسؤال ... لانو لازم نحدد ... هل الانسان والأرض ضدين يجب الاختيار بينهما؟ أم أن الانسان هو الاساس والأرض جزء من وجوده؟ في الحالة الأولى عم حس وكأن الانسان إن أعطى جزء من وقته وأعماله واهتمامه لوطنه فإنّه سيفقد جزءاً من نفسه؟ أما في الحالة الثانية، الانسان هو الأساس ... قد يكون اهتمامه بوطنه كبيراً أو صغيراً، وهذا ما يحدد مدى تعلقه بوطنه واستعداده للقيام بما يخدمه حتى إن اضطر للتضحية بأمور أخرى... أخشى أن معظمنا يعيش في الحالة الاولى ... |
* Can you boys keep this topic alive antel i fix my f****** pc.
|
بخصوص موضوع الخوف و ليش شعبنا ما اتحرك... انا بتفق معكم على الجواب جزئيا فقط
نيرفانا قالت: اذا كان هالانسان بهمو الشأن العام بقدر ما بهمو الشان الخاص، ممكن يقدم شي لبلدو ولشعبو ... وشوي شوي ممكن يصير وعي عام وتصير التغيرات المنشودة.. لكن، إن كان كل واحد فينا ما بهمو غير حياتو الخاصة وما يتعلق بها وبالتالي بخاف من السلطة والاعتقال ومستقبلو إلخ...، فالحكي اللي سبق ذكره أعلاه من قبل المشاركين في النقاش بعمرو ما رح يصير... فأي تغيّر بدو يصير لازمو معجزة ليصير... وأنا بطبعي لا أؤمن بالمعجزات. انا ما بظن في هيك تقسيم بالواقع الواقع انو الكل عندو اهتمامات بالشأن العام و بالشؤون الخاصة.. حتى الناس العديمة الوطنية مثلا بيكون عندها اهتمامات بالشأن العام على مستويات تانية: مثلا دينيا, او مواطنة عالمية, او جمعية حماية البيئة.. هيك قصص بس بالحالة العادية... الكل عندو عدة مستويات من هالاهتمامات.. و بالظروف الصعبة, بعض هي المستويات بيكون ذو اهمية و اولوية اكتر من غيرو بقى الجواب على ليش شعبنا ما اتحرك مو هوي الخوف. لانو شعبنا بس يكون مضطر, ما بينخاف عليه.. بيتحرك. و مثلا الشيوعيين و القوميين مات منهم كتير تحت التعذيب كرمال مبادئهم.. الاخوان مثلا نفس الشي.. كتير فئات ماتت و حاربت مشان اهدافها بقى القصة مو قصة خوف.. القصة ببساطة انو الشأن العام بالنسبة إلنا عم يكون محصور بمحيطنا الضيق و الصغير يعني مثلا.. حارتي... انا مرتاح فيها. النظام الحالي عاطينا حرية.. منلبس على راحتنا, مناكل على راحتنا, منسهر و منطلع و منفوت.. مبسوطين بشكل عام هلق صحيح مافي حرية سياسية و مافي تعدد حزبي و حرية صحافة.. بس هالشي مانو مأثر على "الشأن العام" تبعي (حتى نستخدم تعبير نيرفانا) بس هلق يجي مثلا و يتعكر صفو هادا المحيط الاجتماعي الضيق.. تجي جماعة غريبة و تحاول تغير من نمط حياتنا يلي نحنا مبسوطين فيه.. وقتها انا شخصيا مستعد انزل من كندا و حارب مشان دافع عن الحارة و دافع عن الجو و البيئة و الوسط الاجتماعي يلي انا بحبو و متعود عليه!!!! و نفس الكلام بينطبق على كل فئات الشعب السوري... الكل عايش بالوسط يلي متعود عليه و مرتاح فيه (بشكل عام)... هلق الاخوان ثاروا بالسابق لأسباب متعددة منها الدعم و الحركشة الخارجية من قبل صدام حسين و منها التململ الديني ... بس بالنهاية على المدى البعيد شو صار؟ انعطوا حريات دينية كتير و هلق السنة عايشين عصر شبه ذهبي... من شوي كان رح يمرق قانون احوال شخصية بيرجعنا للعصور الوسطى لولا صحوة المثقفين و اصحاب الضمير. هلق الشارع السني عندو تنظيم ديني و بيقدر يربي دق ليشبع و يروح على الجامع و كلشي... مين بالثمانينات كان يسترجي يربي لحية ؟؟؟ بقى هلق... فعليا.. مافي اضطهاد للحريات الدينية الاسلامية لشو هالشي بيودي؟ هالشي بيودي انو الكل عندو حريات لدرجة انو يعيش بوسطو الاجتماعي المناسب بشكل سعيد و متواضع... بس طبعا مو كافي ليشكل حياة "كاملة" بالمفهوم الانساني... بدليل انو ما بيقدر مثلا يرشح حالو لرئاسة الجمهورية او يفتح صحيفة بس بنفس الوقت... الانسان السوري مانو متضايق لدرجة انو مستعد يرمي بكلشي و يضحي بحياتو كرمال.. شو؟ يعني النظام الموجود و بعد تجارب طويلة و بعد سنين طويلة.. صاير يعرف شو هوي ال Fine balance ما بين انو الانسان يكون مرتاح مية بالمية و لسانو طويل... و مابين انو يكون مدعوس عليه و حاسس بالقهر (بالتالي ممكن يعمل ثورة) بقى القصة مو قصة خوف و لا من يحزنون. ايا انسان بس يوصل لمرحلة معينة من التهديد و القمع و الحشك بالزاوية رح ينسى الخوف و رح تشتغل غريزة البقاء و رح يحاول يغير بقى من الواقع بالعنف او بغير العنف ايا انسان بيتهدد محيطو المباشر رح يتحرك... متل الحيوان بالضبط. بس طالما متروك بحرية و مساحة معينة.. ما رح يعمل شي. الحيوان هيك. بقى مشكلتنا مو مشكلة خوف... مشكلة انو ببساطة ما عنا نظرة بحيث نشوف كل الوطن هو عبارة عن محيطنا الشخصي... بينما منشوف وجودنا الضيق و مجتمعنا الضيق بس كالوسط المستحق التضحية (طبعا مع استثناءات حسب نوع الخطر المحدق بالوطن و نوع التهديد) بقى ليش هيك؟ اي الجواب ببساطة لانو نحنا مجتمع قبلي مناطقي طائفي مذهبي حوايرجي شوارعي ... و ضيفوا لسا شي خمس من هدول التقسيمات :lol: يعني "المعارضة السورية" مين ما كانت.. نشالله تضل تلعي ليل نهار عن اغتصاب الحريات السياسية و قمع حرية التعبير و الفساد المستشري و سورية مزرعة لمدري مين... ما رح يصير شي بس يمكن نهار واحد... شي بنت بدوية يتحركش فيها شي ضابط و تقوم القيامة... يمكن بليلة وحدة تسقط الحكومة :lol: شعب مهتم بقشور الأمور... شرف المرأة.. غشاء البكارة... الدين... أمي و أبي أنت يا رسول الله.. هيك قصص هيي يلي بتمشي هلق... و رح تضل هيي الطاغية لفترة طويلة جدا اسف شباب بس هادا واقعنا... و ورد ذكر مصر كدولة إلها potential >>> إنو شوفوا شباب مصر شو عم يساروا و يالله نحنا على الطريق... اي عفوا بس هادا أسوأ مثال يمكن نحتذى فيه... نفس هالشعب المصري يلي عم ينسق اضرابات على الفيس بوك.. هوي الشعب الممحون يلي قام بالثورة "الجنسية" لما استوحشوا بالشواع و صاروا يتحركشوا بالبنات متل قطعان البقر. و نفسو الشعب يلي ضاربة فيه الطائفية للعمق و نفسها الحكومة يلي عايشة على المساعدات... بقى شكرا ما بدنا نصير متل مصر... جيبولنا مثال احسن |
اقتباس:
|
حل نابع من تغيير النظام ما في ، ( أو شخصيا ً ما عم شوف في عالمدى القريب ) أنا بشوف المحاولة تنبع بالتغيير على المستوى الشخصي والمجتمعي الضيق لناخد قانون الطوارئ كمثال يا جماعة الناس مابيعنيها قانون الطوارئ ( اي للأسف يعني ، متل ما عم قلك) اللي بيعنين قانون الطوارئ ما بيشكلو شي من الشعب وطول ما طروحاتنا هي حرية التعبير ، قانون الطوارئ ، والمعتقلين السياسيين ، ففي هوة بيننا وبين هالشعب المستقر والمسالم واللي شايف انو على نفسها جنت براقش بدك تحكيه عن وضعو هو " قضية مصالح " ، اليوم هو رح يضحي بالاستقرار اللي عايشو " حتى لو كان استقرار سلبي بجانب ما ، لكنه استقرار بالأخير " لينتقل لـ شو ؟ للمجهول ؟ للفوضى ؟ لشو بالضبط يعني كل التجارب اللي حواليك ما بتحمس هادا الشعب إنو يتشجع ع التغيير ، " بيقلك ما بدي الفوضى اللبنانية ، ولا الديمقراطية اللي رح تجيبا الدبابة الاميركية ، " فبيضل شايف وضعو رحمة بدنا تغيير ، بدو يكون بسيط وصغير وبقضايا يومية ومادية وملموسة ، وبدنا نصبر وبدنا نحط إيدنا بإيد الحكومة " يعني بصراحة ما في بديل " وتحت سياسة الأمر الواقع ، بدك تتعامل معها ، وضمن خطوطها الحمر وقواعدها ، بدن الناس الجيدين يحاولو يصلو للسلطة ، يحاولو يصلو للإعلام ، .. يا عمي ماضروري يكتبو سياسة ، في مية مرض مجتمعي فين يحكو عنو فين يعملو ، أدب جيد ، مسرح جيد ، لك فين يعملو تغيير تحت نظر الحكومة ( أو أنا بشوف هيك ) ، ما عم قول المهمة سهلة ، بس كمان انا إزا عم شوف حل ، فهو بأنك تغير التفاصيل المجتمعية ، العقلية السائدة عند الشعب ، مشاكلو تبع كل يوم ، وإزا هالتفاصيل وصلتك "يوما ً ما ، لتغيير سياسي " بيكون منيح ما وصلتك ، بيكون بدنا نحاول " ويحاولو ولادنا وأحفادنا على ما يبدو " وإلا ما يصلو شي يوم |
كلام الانسة المشرفة بتر فلاي صحيح ... طبعا هالشي مالو علاقة بكونها مشرفة و اسمها بتر فلاي
بس كل دولة فيها خطوط حمر و فيها مجموعات معينة بتدير شؤونها. مثلا أميركا.. قد ما الناس حكت على اللوبي الصهيوني و لا اللوبيا بزيت.. فبيضل العصب يلي ممشي أمور أميركا الأمنية هوي الCIA .. و يلي بالتأكيد رح يضل محصور بإيدين مجموعات موثوقة من البيض البروتستانت.. و إن دخل بينهم كل فترة و فترة ناس من إثنيات مختلفة. بس هل تتوقعوا يسمحوا لواحد يهودي يتدخل بأمن أميركا الحقيقي؟ أكيد لاء.. وقت الجد.. مصلحة أميركا فوق كلشي هادا مع العلم إني متأثر شوي بفيلم the good shepherd .. مع تحفظ طبعا.. بس بتخيل الوضع الحقيقي قريب لهيك شي كل الدول يلي بتتمتع باستقرار فيها نوع من الديكتاتورية بعمقها و ديمقراطية على السطح. تركيا مثلا كمان.. شو يلي بيمنع انو سوريا تتطور بهادا الاتجاه؟ انا بصراحة بشوفو حل مناسب جدا.. الحفاظ على هيكل أمني معين و اتجاه عروبي الكل بيآمن فيه.. و الشكليات و المسائل اليومية بتصير بموضع الأخد و العطى مع الوقت وارد جدا تزداد مساحة الحرية و يقل الفساد خاصة انو جيل محدثي النعمة رح يختفي مع الوقت و الناس يلي رح توصل رح تكون ناس عينها شبعانة نسبيا... و مع وجود الانترنت و انتشار الصحافة اللاكترونية هالقصص رح تخف.. مثلا اتفاقية الشراكة الاوروبية او اي انفتاحات اقتصادية غالبا رح تشكل ضغط لتنظيم السوق السوري و ايجاد شفافية اكتر |
قبل كل شي حابب قول ,,انو ما حدا من اطراف النقاش بوارد اقناع الآخر باتباع اي طريقة هو/هي ما بشوفوها مناسبة ...الموضوع كلو عبارة عن تشارك بالأراء ...و بتبقى لكل شخص حريتو بانو ياخد الطريق يلي بيريحو و بيناسب قناعاتو ... نقط كتير مهمة عم تنطرح هون ,,و للكل يعطيكون العافية عنجد .. و الي رجعة ... اكيد مستنايينك جيمي |
اقتباس:
بس المطلوب مثلا انو نمشي بالعكس ... انو ما لازم نتعاطى بملفات متل معتقليين الرأي و قانون احزاب و غيرها حتى بالأول نرفع سوريا من قاع العالم التالت لمستوى دول العالم الأول .... لأ ...هيك بظن فيها صعوبة شوي ... هلئ في مين عم يقول انو بدل ما نلوم النظام خلونا نلوم حالنا بالأول لأنو بالأحرى نعالج مشاكلنا كأفراد و كمجتمعات بعدين منحاسب النظم ,,المقاربة هي برأيي غير صحيحة لأنو لدرجة كبيرة النظام كيان و الشعب بأمراضو و مشاكلو كيان تاني ...و الكيان الأول عم يحاول يأثر سلبا بالكيان التاني و ياخد ادفاندج قدر المستطاع ... لهيك المقاربة هي برأيي غير صحيحة ...بس انا ذكرتها لأوصل للمقاربة العكسية " بدل ما نلوم المعارضة خلونا نلوم حالنا بالأول " ...المقاربة هي فيها شوي من الصحة ..لأنو بشوف المعارضة و الشعب كيان واحد ...لأنو منبع المعارضة هو الشعب ..انا و انتو و كل واحد سوري ( طبعا انا بقصد المعارضة ك فكر ما بقصد خدام و الأخون و رفعت و الغادري ,..و اعلان دمشق و غيرون ) ..و وصول المعارضة الحالية للشكل المزري هاد مو نتيجة المعارضيين الحاليين ..لأ ...نتيجة تملصنا من دورنا الطبيعي و الحيوي كمجتمع بيطمح دايما للأحسن ...كمان الفكرة هي ذكرتها لأوصل للنقطة يلي بتهمني ..يلي هي " اعطيني معارضة محترمة و انا رح انضم الها اليوم قبل بكرا .....بس ما في معارضة محترمة بسوريا ! لهيك انا ما بدي الفوتة هي من اصلها " ,,,المعارضة بما انها فكر شعبي ( يعني مانها جسم اجنبي غريب ) لهيك المسؤولية مشتركة بين كل السوريين ... لهيك ,,قبل ما العن خدام و الأخوان و رفعت ......و اعلان دمشق ) ...لازم العن تهربي من مسؤوليتي و مراوغتي .... نحنا الشباب لازم نصنع المعارضة الحقيقية ...هي مسؤوليتنا ...و على فكرة نحنا الشباب يلي اكتر شي منحكي ..نحنا بالحقيقة اقل شي بيعمل !! ...و هدا شي غريب شوي لما بتقارن حالنا بسوريا بغيرنا من لي مر بتجربتنا ,,,رفعت عمرو فوق السبعين ..و خدام نفس الشي ...الأخون لسا شكلون جايين ما قبل التاريخ اصغر واحد فيون عمرو تمانيين سنة ( مع كل هاد بتلاقيون عم يحاولو ينشطو بين الشباب ) ...اعلان دمشق ,,كمان كلون بالأربعينات و الخمسينات ......طيب شو مشان الشباب ,,, في كام مدون حاولو يوصلو رأيون و انسجنو ....و هاد كل شي ....لهيك ..انا برأيي ..انو كشباب بالتحديد ..لازم نلوم حالنا قبل ما نلوم المعاضة الحالية..... لأنو الشباب بمجتمعات مرت بالشي يلي نحنا عم نمر فيه هلئ هو يلي لعب الدور الحاسم و قلب الطاولة بوجه الأستبداد :D |
| الساعة بإيدك هلق يا سيدي 04:25 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون