أخوية  

أخوية سوريا: تجمع شبابي سوري (ثقافي، فكري، اجتماعي) بإطار حراك مجتمع مدني - ينشط في دعم الحرية المدنية، التعددية الديمقراطية، والتوعية بما نسميه الحد الأدنى من المسؤولية العامة. نحو عقد اجتماعي صحي سليم، به من الأكسجن ما يكف لجميع المواطنين والقاطنين.
أخذ مكانه في 2003 و توقف قسراً نهاية 2009 - النسخة الحالية هنا هي ارشيفية للتصفح فقط
ردني  لورا   أخوية > مجتمع > منبــر أخويـــة الحــــــر

إضافة موضوع جديد  إضافة رد
 
أدوات الموضوع
قديم 09/08/2009   #1
شب و شيخ الشباب Elephant And Castle
عضو
-- قبضاي --
 
الصورة الرمزية لـ Elephant And Castle
Elephant And Castle is offline
 
نورنا ب:
Feb 2009
المطرح:
The Other Side
مشاركات:
526

افتراضي تذكرتك لبيت خالتك ..بعمرها ما كانت اسهل !


بالفترة الأخيرة صار الحكي كتيير عن انو الناس بسوريا ملّت و قرفت من التنظير و التشخيص ..و كمان صار الحكي كتيير عن انو الأزمة السوريّة ما الها حل ...او حلها مانو بمتناول الشعب السوري ....و صار الحكي كتيير عن انو الحديث عن الوضع السياسي و الأمني بسوريا بيولّد استجابة عند المواطن السوري بتشبه استجابتو للرائحة الكريهة !


حابب من خلال الموضوع هاد و عبر المنبر هاد انو اسمع من السوريين نفسون شو هي مُقاربتون للحل بسوريا ...و خلونا نتجاوز التشخيص و التنظير ...

انو مثلا عنجد يمكن ما يكون فيه حل ! او ما قادرين انو حتى نفكّر بحل منطقي ! ...طيب ...اذا ما في حل ...خلونا نفكر بحلول جزئية ما بتعالج مشكلتنا بالكامل بس بتحسن من حالتنا شوي ...يعني هون بقصد ...المعتقلين السياسيين و معتقلين الضمير كملف ..و قانون الطوارئ كملف تاني ..او قانون الأحزاب ,,,او قانون لأعلام ...الخ ..

و على فكرة ...صدقوني ,,يمكن تفكرو انو في افكار معينة صغيرة و ما كتير الها قيمة و ما بتنفع كحل او كجزء من الحل ...بس الأفكار هي يمكن تطلع مفيدة كتيير لألنا ,,او الأفكار هي اذ كلها انجمعت مع بعضها ممكن تعمل شي ....لهيك بتمنى انو كل واحد و لو بيعتبر انو فكرتو ما كتير مهمة معلش ..خلونا كلنا نسمع بعض ...سواء لو كانت افكارنا ثورية ...او لو كانت افكارنا بتشوف انو واقعنا قابل فقط للتغيير ضمن حدود ضيقة ....سواء اذا عم نحكي نحنا شو قادرين نعمل من داخل سوريا ...او عم نحكي شو قادرين نعمل من الخارج ... خلونا كلنا نسمع بعض ....حتى ولو كنت موالي للرئيس بشار الاسد و منظومة السلطة بسوريا ....كمان بهمنا نسمع رأيك ...

يعني خلونا نقول كيف منعمل حلول و شو هي الأليات الممكنة لتحقيقها ..ما ضروري شرح مفصل عن الأليات ...بس افكار عريضة ...انو مثلا انا بشوف مقاطعة الأنتخابات البلدية و النيابية و الرئاسية بسوريا فكرة حلوة وما بتطلب مننا غير انو نقعد بيبتنا ...او مقاطعة النشاطات الحزبية بالمدارس و الجامعات ,,كمان نفس الشي ... او مثلا ضراب من العمال عن العمل ليوم واحد بيشمل البلد كلها مثلا للأحتجاج على زيادة الأسعار ...

او هدون البرا مثلا ...اعتصامات امام السفارات السورية بكل دول العالم يلي بتسمح بشي اسمو اعتصام ,,للمطالبة الأفراج عن معتقليين الرأي و الغاء قانون الطوارئ ...يعني هو اعتصام واحد بصراحة ما الو قيمة ....بس يوم اعتصام ب برلين ..و بعد اسبوع ب نيويورك و بعدين بلندن و ب باريس و موسكو ...بتصير الحكومة تشوف انو في شباب عم يحكو و صدقوني لما بتكون الشغلة جماعية و في كتير من السوريين برا.. ما قادرين يسجنون كلون بس يرجعوا على سوريا ...خصوصا انو الأعتصامات هي الها مطالب محددة و وطنية بالدرجة الأولى ..او حملات انسانية بالجامعات يلي عم يدرس فيها السوريين برا بتجذب عدد اكبر من السوريين و بتلفت الأنتباه اكتر و اكتر ....في مثلا التطوع بمنظمات متل العفو الدولية و الهيومان رايتس ووتش ..


يعني فينا نبحبش و نشوف شو قادرين نعمل ...ما بظن انو خلص متنا على الأخيير !!

و حبيت حط العنوان بالطريقة هي فقط لتبيان الأنحطاط يلي وصلنالو بسوريا ..لما بتصير الكلمة ....تذكرتك للسجن

That is not Dead which Can Eternal Lie And With Strange Aeons even Death may Die

لا ميتاً ما قادراً يتبقى سِِِِِِِِِِر مدى فإذا يجئ الشذاذ الموت قد ينتهي



Who Sacrifices The Social Liberties For The National Security Deserves Neither  
  رد مع اقتباس
قديم 09/08/2009   #2
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


حكي حلو

بس بظن اول خطوة هي انك تعرف بالضبط كم سوري بيرغب فعلا بالتغيير.. من السوريين داخل سوريا و خارجها

انا بتوقع انو بأريحية تامة اغلبية المسيحيين و العلويين و باقي الطوائف الصغيرة رح ترفض التغيير خوفا من شبح الارهاب يلي رح يصير من الانفلات الامني و يلي رح ينهي سوريا بالشكل يلي منعرفها من هون لشي خمسين سنة

نفس الكلام رح ينطبق على تقريبا كل السنة السوريين الغير متعصبين.. و يلي هني اكتر من السنة المتعصبين

هالحكي داخل سوريا.. خارج سوريا.. نسبة السوريين العلمانيين او المسيحيين اعلى من نسبتها داخل سوريا (مجرد احتمالية اكبر لهجرة الناس يلي معها مصاري أكتر.. و ازدياد المصاري يتناسب عكسا مع ازدياد التدين غالبا)... بقى نفس النتيجة

هلق انا اطلب منك رقم واضح و دقيق عن اديش بالضبط نسبة السوريين مستعدة تموت كرمال سوريا بشكلها الحالي.. و نسبة يلي مستعدة تموت كرمال التغيير... شو رح يطلع معنا؟ اول شي بيطلع معنا انو نحنا ما منعرف شي.. بس منقدر نتوقع نسبة اعلى للجماعة الاولى

بقى يعني اذا السوريين الراغبين بالتغيير انفسهم ما بيعرفوا عددهم و تمثيلهم الطائفي و السياسي و الجغرافي (داخل و خارج سوريا).. فأيا نوع من التغيير نحنا بدنا نحقق؟ كل كلامنا بينصب تحت خانة حديث قهاوي... ما إلو أي معنى على الأرض
يعني حتى الاجوبة يلي رح نحصل عليها هون.. مانا معبرة بأي شكل من الأشكال عن نسبة الشعب الحقيقية

هون رح تلاقي نسبة كبيرة من الناس يلي مستعدة تنظّر ليوم التنظير. بينما لما تجي ال moment of truth .. يمكن يوقفوا ضد اي تغيير خوفا على طائفتهم



ثم بخصوص التنظيم.. بتلاقي السوري بس يطلع برات سوريا .. إحدى اهم النصائح يلي بتنعطالو هي انو يبعد عن سوريين!! و فعلا هون بتلاقي الجاليات السورية عبارة عن جاليات طائفية مناطقية.. اهل كل مدينة و طائفة صحبة مع بعض و بس... مافي شي اسمو جالية سورية متلاحمة و إلها وجود و لوبي جروب... للاسف مع انو اعدادنا هائلة و عنا قوة اقتصادية كبيرة بكتير دول بالاميركييتين.. بس على الفاضي
طيب هي كمان بدنا نلوم عليها الحكومة؟ مع العلم انو هالهجرات قبل و خلال و ما بعد الحركة التصحيحية المجيدة

يعني انقساماتنا موجودة داخل الوطن و خارجه... بقى... ناس منقسمين مافيك تتوقع منهم شي





بخصوص الحل.. انا ممكن اطرح عَلمَنة الشعب (من علمانية).. بس هالطرح رح يكون في مقابيلة طرح مقابل هو أسلمة الشعب بما انو نسبة كبيرة من العرب شايفة انو مشكلتنا هي الابتعاد عن الدين! (كل هالتدين و لسا بدهم تدين أكتر)... بقى طرحنا رح يكون متل يلي عم يطبش بالمحيط... بقى انسى

الحل الوحيد الممكن هوي حل بعييييد المدى جدا و هوي عبارة عن تشكيل مجموعات جدية لنشر الثقافة و العلم.. و بقى بتتأمل انو بسبب العلم و الثقافة الشعب رح يوصل للعلمانية لحالو.. بدون دفش
يعني انت بتعطيهم الثقافة و العلم.. و بتتركهم يوصلوا للنتيجة الصح (لانو نحنا منفترض انو بالاساس العلم و المعرفة المفروض تودي لهيك اتجاه..).. يعني بدون ما ندحش بعقولهم شغلات بتخليهم ينفروا من العلمانية و التحرر.

هالشي رح ياخد وقت... بس هي الطريقة الوحيدة المضمونة برايي

و هي شغلة كل الناس ممكن تشارك فيها و كل شخص بيشارك بالشغلات يلي بيفهم فيها

شغلة حلوة مثلا بلشت شوفها هي انتشار عقلية التطوع. صار في برامج للتطوع بسوريا بالصيف و قصص متل هيك... هي اول الطريق لانشاء مجتمع مدني.. يعني خطوة خطوة منوصل نشالله

ذكرى مرور عام على وفاة الأديب العالمي سيبيري ماسكوليه 1932 - 2008
  رد مع اقتباس
قديم 09/08/2009   #3
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


اقتباس:
كاتب النص الأصلي : Joe عرض المشاركة
بقى يعني اذا السوريين الراغبين بالتغيير انفسهم ما بيعرفوا عددهم و تمثيلهم الطائفي و السياسي و الجغرافي (داخل و خارج سوريا).. فأيا نوع من التغيير نحنا بدنا نحقق؟ كل كلامنا بينصب تحت خانة حديث قهاوي... ما إلو أي معنى على الأرض
بعرف اني لعيتلك قلبك.. طالعلك بالسحبة انا

بس كتعقيب على هي الفكرة.. اعتبرها كانك عم تنظم حملة انتخابية. ما بدك معلومات عن قاعدتك الجماهيرية مشان تقدر تختار برنامج صحيح؟
اكبر دليل على فشل المعارضة انهم بكل طروحاتهم بيهاجموا النظام.. بس ما بيطرحوا شي بيتعلق بالشعب و شو رح يقدموا هني للشعب كبديل

بقى انا اذا بدي فكر جديا بالمعارضة.. لازم اعرف مين معي.. غير انت و فيفا سيريا و صديقي جاك حوراني.. بدي اعرف نسب الشعب و شو تطلعاتهم و شو رايهم.. غير هيك بكون انا بس جاي اعمل ضجة اعلامية أو متامل اني اركب على ضهر دبابة اميركية.. ما بيجوز هالكلام

بصراحة لو في رغبة حقيقية للتغيير عند السوريين كنا من زمان منشوف جرايد و مواقع معارضة حقيقية تابع للجاليات السورية الكثيرة جدا الموجودة بكل مكان... بس مافي رغبة و لا في حيل.. عوجاااااااااااا
  رد مع اقتباس
قديم 09/08/2009   #4
شب و شيخ الشباب Elephant And Castle
عضو
-- قبضاي --
 
الصورة الرمزية لـ Elephant And Castle
Elephant And Castle is offline
 
نورنا ب:
Feb 2009
المطرح:
The Other Side
مشاركات:
526

افتراضي


كلام خطير بس قبل كل شي هي



اقتباس:
حكي حلو

بس بظن اول خطوة هي انك تعرف بالضبط كم سوري بيرغب فعلا بالتغيير.. من السوريين داخل سوريا و خارجها

انا بتوقع انو بأريحية تامة اغلبية المسيحيين و العلويين و باقي الطوائف الصغيرة رح ترفض التغيير خوفا من شبح الارهاب يلي رح يصير من الانفلات الامني و يلي رح ينهي سوريا بالشكل يلي منعرفها من هون لشي خمسين سنة

نفس الكلام رح ينطبق على تقريبا كل السنة السوريين الغير متعصبين.. و يلي هني اكتر من السنة المتعصبين
ما بدي اتبع اسلوب اخد كلامك جملة جملة و بلش بقى شوف شو فيني طلع تناقدات ...بس هون كان في تناقض ما قدرت غير انو اشرلك عليه .... انت قلت انو العلويين و المسيحيين ما بدون التغيير ..لأنو الأخوان المسلمين رح يستلمو البلد و يحرقوها خمسين سنة ...بعدين قلت انو نسبة السنة غير المتعصبيين اكبر من نسبة السنة المتعصبيين ( يلي هني رح يشكلو ال Feed Source للأخوان ) !! .. هون كأنو عم تقول ,,انو نسبة الأخوان هني اقلية ..بس الشعب كلو خايف من الأقلية هي تحرق البلد خمسين سنة في حال صار تغيير !!!!


كلامك مهم كتيير و النقط يلي ذكرتها كتيييير مهمة ...بس خلينا هيك نحكي مع بعض شوي برحابة صدر ..


صديقي ... اولا ,,كلامك كأنو نحنا عم نحضر لشي حرب ..بلشت عم تحكي عن الموت و عن الأستعداد للموت ,,و كأنو في شي خطير بدو يصير ...يا رجل عنجد خليتني خاف ...لأ Joe ..ما حد حكى انو بدنا نموت ..بالعكس ..خصوصا انو على المستوى الشخصي ما بآمن بأي سيناريو بعد الموت,,,يعني اذا متت و انا هلئ شب ..فبتكون ,,,طلعت ب ***** نظامي .. فخلينا اول شي ننسى قصة الموت ..و ما تكون متل غيرك ..تمسك الموت و تبلش تخوف الناس فيه ..


هلئ مين الناس و كم نسبة الناس يلي عندها الأرادة انو تعمل شي ...هيك عم تصعبها كتيير علينا ...خليني قلك ...برأيك في نسبة بسوريا لتمثيل الطوائف ضمن المجتمع السوري ..لك في نوع من الأحصائيات او دراسات لأي شي بيتعلق بالديموغرافيا عنا ... كيف بدك ياني طلعلك نسب ...طيب انا ما قادر طلع نسب ...بس انت طلعت نسب و استعجلت و قلت يلي بدون التغيير اقل من يلي بدون الوضع هاد ...شو هي الأرضية يلي اعتمدتها لتوصل للنتيجة هي !


القصة باخدها بالشكل التالي ...انو انا مع التغيير ... اذا انا مع انو اعمل شي ..ما بهمني اذا ورايي عشرين مليون ...او عشرين شخص ...مع اني بحترم توقعاتك عن النسب و هيك شي بس انا كمان عندي توقعات انو لي بدو التغيير ...اكتر بكتيير من الشي يلي بتتوقعو !

اقتباس:
هون رح تلاقي نسبة كبيرة من الناس يلي مستعدة تنظّر ليوم التنظير. بينما لما تجي ال moment of truth .. يمكن يوقفوا ضد اي تغيير خوفا على طائفتهم
بس لما بشوفو يلي واقف جنبون من كل الطوائف ...رح يتشجعوا اكتر ...........و خلينا نرجع لموضوع المسيحي و العلوي انو ما بدون التغيير خوفا على نفسون ... اكيد عندك اطلاع على انو كتير من الشخصيات العلوية انحطت بالسجن بعد ما اجا بشار ...و حتى كانو اشرس المعارضين ..سواء بسوريا عارف دليلة ..او برا سوريا نزار نيوف و غيرون كتيير ... او المسيحية متل ميشيل كيلو و غيرو كمان كتيير ..يمكن تقلي انو هدون اقلية ضمن طوائفون . ..منرجع بعدين لقصص النسب و التناسب و مندخل بجدال بزنطي ..خصوصا انو نحنا التنيين ما عنا احصائات ,,بس مجرد تخمين





اقتباس:
ثم بخصوص التنظيم.. بتلاقي السوري بس يطلع برات سوريا .. إحدى اهم النصائح يلي بتنعطالو هي انو يبعد عن سوريين!! و فعلا هون بتلاقي الجاليات السورية عبارة عن جاليات طائفية مناطقية.. اهل كل مدينة و طائفة صحبة مع بعض و بس... مافي شي اسمو جالية سورية متلاحمة و إلها وجود و لوبي جروب... للاسف مع انو اعدادنا هائلة و عنا قوة اقتصادية كبيرة بكتير دول بالاميركييتين.. بس على الفاضي
طيب هي كمان بدنا نلوم عليها الحكومة؟ مع العلم انو هالهجرات قبل و خلال و ما بعد الحركة التصحيحية المجيدة

يعني انقساماتنا موجودة داخل الوطن و خارجه... بقى... ناس منقسمين مافيك تتوقع منهم شي


بخصوص التنظيم بالخارج ..هادا شي قادرين نشتغل عليه خصوصا انو البيئة برا بتساعدك اكتر بكتيير من لي جوا .. بعرف انو برا في عالم طالعة بفيزا مزورة و عم يشتغلو بالأسود مشان يرجعو لبلدون و معن كام ليرة بعد كام سنة ... بس هاد ما بيلغي انو في ناس كتير تانية لأ ظروفها بتساعدها لأنو تتحرك ..و عندون الرغبة ...بس يمكن ما في المحفز ...كلامك صح مية بالمية ..مجتمعاتنا برا مشتتة كتيير ,, بس اذا انشغل على قصة تنظيم الخارج بلاقي في امل و امل كبير .



اقتباس:
الحل الوحيد الممكن هوي حل بعييييد المدى جدا و هوي عبارة عن تشكيل مجموعات جدية لنشر الثقافة و العلم.. و بقى بتتأمل انو بسبب العلم و الثقافة الشعب رح يوصل للعلمانية لحالو.. بدون دفش
يعني انت بتعطيهم الثقافة و العلم.. و بتتركهم يوصلوا للنتيجة الصح (لانو نحنا منفترض انو بالاساس العلم و المعرفة المفروض تودي لهيك اتجاه..).. يعني بدون ما ندحش بعقولهم شغلات بتخليهم ينفروا من العلمانية و التحرر.

هالشي رح ياخد وقت... بس هي الطريقة الوحيدة المضمونة برايي

و هي شغلة كل الناس ممكن تشارك فيها و كل شخص بيشارك بالشغلات يلي بيفهم فيها
هدا كلام حلو كتير ...


اقتباس:
بقى انا اذا بدي فكر جديا بالمعارضة.. لازم اعرف مين معي.. غير انت و فيفا سيريا و صديقي جاك حوراني.. بدي اعرف نسب الشعب و شو تطلعاتهم و شو رايهم.. غير هيك بكون انا بس جاي اعمل ضجة اعلامية أو متامل اني اركب على ضهر دبابة اميركية.. ما بيجوز هالكلام


ما حدا قادر يعطيك ضمانات انو رح يكون معك مليون واحد او هيك شي .. الشي الوحيد المضمون ,,,,,هو التذكرة
  رد مع اقتباس
قديم 09/08/2009   #5
شب و شيخ الشباب Elephant And Castle
عضو
-- قبضاي --
 
الصورة الرمزية لـ Elephant And Castle
Elephant And Castle is offline
 
نورنا ب:
Feb 2009
المطرح:
The Other Side
مشاركات:
526

افتراضي


النقاط يلي طرحتها Joe مهمة كتير ...و الي رجعة تانية
  رد مع اقتباس
قديم 09/08/2009   #6
شب و شيخ الشباب Elephant And Castle
عضو
-- قبضاي --
 
الصورة الرمزية لـ Elephant And Castle
Elephant And Castle is offline
 
نورنا ب:
Feb 2009
المطرح:
The Other Side
مشاركات:
526

افتراضي


النقاط يلي طرحتها مهمة كتير ...و الي رجعة تانية لتفاصيل اكتر
  رد مع اقتباس
قديم 09/08/2009   #7
شب و شيخ الشباب ayhamm26
عضو
-- زعيـــــــم --
 
الصورة الرمزية لـ ayhamm26
ayhamm26 is offline
 
نورنا ب:
Oct 2007
مشاركات:
1,200

افتراضي


اذا بتسمحولي ادخل على خط النقاش

اقتباس:
كاتب النص الأصلي : Joe عرض المشاركة

بس بظن اول خطوة هي انك تعرف بالضبط كم سوري بيرغب فعلا بالتغيير.. من السوريين داخل سوريا و خارجها

انا بتوقع انو بأريحية تامة اغلبية المسيحيين و العلويين و باقي الطوائف الصغيرة رح ترفض التغيير خوفا من شبح الارهاب يلي رح يصير من الانفلات الامني و يلي رح ينهي سوريا بالشكل يلي منعرفها من هون لشي خمسين سنة

نفس الكلام رح ينطبق على تقريبا كل السنة السوريين الغير متعصبين.. و يلي هني اكتر من السنة المتعصبين

هالحكي داخل سوريا.. خارج سوريا.. نسبة السوريين العلمانيين او المسيحيين اعلى من نسبتها داخل سوريا (مجرد احتمالية اكبر لهجرة الناس يلي معها مصاري أكتر.. و ازدياد المصاري يتناسب عكسا مع ازدياد التدين غالبا)... بقى نفس النتيجة

هلق انا معك انو أغلبية الشعب بسوريا صارت تحسبها للاسف من منطلق طائفي بس ياأخي انو في أمثلة كتيرة عم تصير عم تعطي أمل انو في كسر لهاقاعدة الذهبية اللي اشتغل عليها حافظ أسد كتير لانجزها

خود عندك مثلا من الطرف العلوي معارضين كتير دفعوا ثمن معارضتن غالي, صح الاغلبية لازالت مقتنعة بفكرة الوحش الاصولي اللي بدو ياكلنا من بعد التغيير, بس الواقع السئ اللي عايشينوا عم يخلي كتير منن يتنبه للحقيقة.

يعني أهم شي بهالمجال انو لو في جهة محايدة موثوقة عندها قدرات اعلامية توصل لكل بيت سوري, بس تشرح للناس انو سبق للسوريين عاشوا بوطن واحد من دون قانون طوارئ و قائد مفدى.



اقتباس:
كاتب النص الأصلي : Joe عرض المشاركة

هلق انا اطلب منك رقم واضح و دقيق عن اديش بالضبط نسبة السوريين مستعدة تموت كرمال سوريا بشكلها الحالي.. و نسبة يلي مستعدة تموت كرمال التغيير... شو رح يطلع معنا؟ اول شي بيطلع معنا انو نحنا ما منعرف شي.. بس منقدر نتوقع نسبة اعلى للجماعة الاولى
للاسف كلامك صحيح, بس في فرق بين واحد مؤيد للنظام و مصالحو معو واحد ما عم يحاول يلاقي بديل مشان هيك ماشي على مبدأ خلينا متل ما نحني احسن شي, كمان ما بظن نسبة اللي مستعدين يموتوا مقابل سوريا بشكلها الحالي كبيرة.

اقتباس:
كاتب النص الأصلي : Joe عرض المشاركة

هون رح تلاقي نسبة كبيرة من الناس يلي مستعدة تنظّر ليوم التنظير. بينما لما تجي ال moment of truth .. يمكن يوقفوا ضد اي تغيير خوفا على طائفتهم
في منن كتير هدول.

اقتباس:
كاتب النص الأصلي : Joe عرض المشاركة

الحل الوحيد الممكن هوي حل بعييييد المدى جدا و هوي عبارة عن تشكيل مجموعات جدية لنشر الثقافة و العلم.. و بقى بتتأمل انو بسبب العلم و الثقافة الشعب رح يوصل للعلمانية لحالو.. بدون دفش
كلام حلو, بس في ظل النظام الحالي برايك هالشي ممكن؟؟ لك اذا بدك تشكل جمعية لجمع التبرعات للصم والبكم بدك مية موافقة أمنية فشلون بدن يخلوك تعمل جمعيات هدفها تهدم الواقع اللي هني عم يرسخوا.


أنا رح قلك شغلة, نحني عم نناقش التغيير من وجهة نظر داخلية فقط, بس انا رأيي انو نسيانين شغلة اهم وهي التأثيرات الاقليمية والدولية, هي باوربا الشرقية انا بعتبرن كان عندن وعي سياسي اصعاف اللي عنا هلق, وحاولوا كذا مرة يعملوا انتفاضات بس فشلت دائما لانو الظرف الدولي كان دائما ضدن.

أنا معك بنقطة انو الحل لازم يكون تدريجي بس يا أخي بدك نظام يفك العقدة شوي, يسمح على الاقل لتلت او اربع شباب يقعدوا يحكوا بواقع بلدن من دون ما تنتهي السهرة بالاعتقال, يسمح بوسائل اعلام مستقلة, جمعيات ومؤسسات تعليمية ترفع شوي من مستوى الشعب بدل من جيل الاميين اللي عم يتخرجوا من الجامعات.

يعني بالنهاية نحني عم ندور بدائرة مفرغة, لانو الشعب مو قادر على التغيير و لحتى يصير قادر على هالشي بدو اعداد وطالما في ناس ضد مصلحتها هالاعداد مارح تسمح في, وتغير الظروف الدولية اللي عم تعطي النظام الحالي المناعة ضد التغيير هو الامل الوحيد انو نحط رجلنا على اول الطريق.

  رد مع اقتباس
قديم 09/08/2009   #8
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


سلامات شباب و شكرا على المداخلات القيمة

انا ما حددت الاخوان المسلمين بالتحديد. طبعا هني طرف بالموضوع بس بتخيل هني احسن من غيرهم

كلنا منعرف انو الارهاب ما بيحتاج قاعدة شعبية. و انو بيكفي وجود نسبة معينة تؤمن بالعنف و بالتعصب لحتى تصير كوارث. يعني صحيح انو نسبة المتعصبين السلفيين اقل من نسبة المتديني بشكل معتدل و اقل من العلمانيين حتى (or at least i hope and think so).. بس هدول كافيين ليعملوا مغنطة للشارع. انا النقطة يلي طرحتها حتى لو ما كانت حقيقة مية بالمية.. بس هي قلق حقيقي و مشروع و موجود عند الجميع. الكل خيفان من هالشي.. بقى هادا سؤال لازم يتجاوب عليه
انا شايف انو علينا خطر قومي حقيقي بالاضافة للارهاب و هادا الخطر متمثل بالعناصر الكردية الغير سورية يلي اكيد هلق صار منهم كتير بسوريا. هدول بيشكلوا خطر أمني كبير على السنة العرب بالشمال و على الاشوريين و السريان. اول ما يصير انفلات امني فيك تتوقع تدفق شديد للمزيد من الاكراد الغير سوريين... و بظن في كتير تقارير عم تحكي عن وجود للمخابرات الاسرائيلية باقليم كردستان.. بقى ان كان بلدنا هلق فيه اختراق, فيك تتوقع يصير منتزه او حديقة عامة. هدول جماعات عندهم قدرة على التسلح المخيف لانو الحدود رح تكون مفتوحة على مصراعيها. انا هدول بيخوفوني اكتر من اكبر متعصب عربي سوري.

هي نقطة... النقطة التانية هي بخصوص المعارضة يلي فيها علويين و مسيحيين.
اولا.. عفوا بس بصراحة يمكن بينعدوا على اصابع ايد وحدة!
ثانيا.. ما سمعنا انو حدا من الشعب وقف معهم .. و يا دوب حتى على الانترنت. التنديدات باعتقالهم ضلت محصورة بنفس شلة المعارضة نفسها و عدد معين من الناس يلي ألريدي متعاطفة. اما الناس يلي اول مرة بتسمع عن الخبر قالتلك بيستاهلوا.. انو كيف بيكتبوا هيك و كيف بيختاروا هادا "التوقيت".. طيب اي يحرق عرض هالشعب يلي ما بقى حتى يؤمن بحق الانسان بالتعبير و بالكتابة. اذا الشعب العادي هيك.. شو بتتوقع من الموالين للنظام؟

(على الهامش.. كان في اعتصام قدام احدى السفارات السورية بإحدى الدول الأجنبية بسنة 2005 و صديقي جاك حوراني شارك فيه بشكل سلمي: يعني شغل راح و وقف و اتفرج مين موجود.. اي كل الموجودين يا اخونجية كانوا يا اكراد مو معروف شو الاجندة تبعهم.. و أمو لجاك حوراني يا لطيف اديش انقهرت انو كيف بيروح -- مو خوفا عليه -- بس لانو هي خيانة! اي خود بقى.. على شوي كانت رح تغضب عليه.)

النقطة التالتة بخصوص قصة انو نموت او ما نموت. هي نقطة ضعف عند الانسان المتحضر. كل ما ازدادت ثقافة و تحضر الانسان, كل ما صار متسامح اكتر و منفتح اكتر ... و طبعا.. عندو استعداد اقل انو يموت مشان اهدافه... اي هي مشكلة كبيرة بصراحة. لأنك رح تكون عم تتنافس مع ناس مستعدة تموت. الموالين للنظام رح يكونوا مستعدين يموتوا كرمال يضل موجود لانو زوال النظام يعني انو رح يطالهم و يطال عائلاتهم تصفية و اعمال انتقامية... و الناس المشحونة قوميا متل الاكراد او دينيا متل السلفيين كمان مستعدين يموتوا... نحنا وين بالمعادلة؟ نحنا بدنا نعمل مجتمع مدني و بدنا ننشر الثقافة ... اي ما بعرف يعني كيف رح نقدر نربح اذا حتى تنظير مو مستعدين ننظر و نقول فداااااكي سوريا.. يعني الله يعينا و يعين سوريا احسن شي
  رد مع اقتباس
قديم 09/08/2009   #9
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


لعمى شو اني صاير بومة متشائمة
  رد مع اقتباس
قديم 09/08/2009   #10
شب و شيخ الشباب رجل من ورق
عضو
-- زعيـــــــم --
 
الصورة الرمزية لـ رجل من ورق
رجل من ورق is offline
 
نورنا ب:
Aug 2008
المطرح:
ببحر بعيد
مشاركات:
1,989

إرسال خطاب MSN إلى رجل من ورق
افتراضي


طيب ما لازم بالاول يتشكل شي اسمه مجتمع مدني قادر يتحرك يعني الحراك اللي صار ضد قانون الاحوال الشخصية او حملة الموبايل بتصور في حراك عند الكل
بس في شغلة ما فهمتا هلأ ليش ما بالاساس يتوعى الشعب انو انا السني مثلك انت العلوي مثلو هوي المسيحي مثل هيداك الدرزي والتركماني بالاخر سوريين ولا نسحبها طائفية مش هي بالاول المفروض تكون؟

قم واضرب المستحيل بقبضتك اليسرى
انت تستطيع ذلك
http://themanofpapers.wordpress.com
  رد مع اقتباس
قديم 09/08/2009   #11
شب و شيخ الشباب رجل من ورق
عضو
-- زعيـــــــم --
 
الصورة الرمزية لـ رجل من ورق
رجل من ورق is offline
 
نورنا ب:
Aug 2008
المطرح:
ببحر بعيد
مشاركات:
1,989

إرسال خطاب MSN إلى رجل من ورق
افتراضي


اقتباس:
كلنا منعرف انو الارهاب ما بيحتاج قاعدة شعبية. و انو بيكفي وجود نسبة معينة تؤمن بالعنف و بالتعصب لحتى تصير كوارث. يعني صحيح انو نسبة المتعصبين السلفيين اقل من نسبة المتديني بشكل معتدل و اقل من العلمانيين حتى (or at least i hope and think so).. بس هدول كافيين ليعملوا مغنطة للشارع. انا النقطة يلي طرحتها حتى لو ما كانت حقيقة مية بالمية.. بس هي قلق حقيقي و مشروع و موجود عند الجميع. الكل خيفان من هالشي.. بقى هادا سؤال لازم يتجاوب عليه
من قبيل اقامة الدولة الاسلامية يعني؟


اقتباس:
انا شايف انو علينا خطر قومي حقيقي بالاضافة للارهاب و هادا الخطر متمثل بالعناصر الكردية الغير سورية يلي اكيد هلق صار منهم كتير بسوريا. هدول بيشكلوا خطر أمني كبير على السنة العرب بالشمال و على الاشوريين و السريان. اول ما يصير انفلات امني فيك تتوقع تدفق شديد للمزيد من الاكراد الغير سوريين... و بظن في كتير تقارير عم تحكي عن وجود للمخابرات الاسرائيلية باقليم كردستان.. بقى ان كان بلدنا هلق فيه اختراق, فيك تتوقع يصير منتزه او حديقة عامة. هدول جماعات عندهم قدرة على التسلح المخيف لانو الحدود رح تكون مفتوحة على مصراعيها. انا هدول بيخوفوني اكتر من اكبر متعصب عربي سوري.
بظن قصدك خطر على السوريين اجمالا بالشمال جزيرة وحلب اكتر شي
بس شو الحل برايك؟
اقتباس:
(على الهامش.. كان في اعتصام قدام احدى السفارات السورية بإحدى الدول الأجنبية بسنة 2005 و صديقي جاك حوراني شارك فيه بشكل سلمي: يعني شغل راح و وقف و اتفرج مين موجود.. اي كل الموجودين يا اخونجية كانوا يا اكراد مو معروف شو الاجندة تبعهم.. و أمو لجاك حوراني يا لطيف اديش انقهرت انو كيف بيروح -- مو خوفا عليه -- بس لانو هي خيانة! اي خود بقى.. على شوي كانت رح تغضب عليه.)
اللي رفعوا فيها العلم الكردي ؟ يوميتها محمد حبش انبحت دين بحتة وكفرون ومدري شو
  رد مع اقتباس
قديم 09/08/2009   #12
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


اقتباس:
كاتب النص الأصلي : رجل من ورق عرض المشاركة
بظن قصدك خطر على السوريين اجمالا بالشمال جزيرة وحلب اكتر شي
بس شو الحل برايك؟

اللي رفعوا فيها العلم الكردي ؟ يوميتها محمد حبش انبحت دين بحتة وكفرون ومدري شو
ما بعرف شو الحل بس جزء منه انهم ينعطوا حقوقهم الثقافية المشروعة. و ينسمح إلهم انهم يفتحوا مدارسهم و يتم الاعتراف فيهم كأقلية عرقية و لغوية... لانو الكبت ما رح يحل المشكلة و رح يولد كراهية و يزيد من المشاعر القومية
متل ما الأرمن عندهم مدارس بتعلم أرمني.. هدول نفس الشي كمان

مع انو موضوعهم شائك و بنفس الوقت ما بدك تغذي المشاعر الانفصالية

بس يعني بدولة متل سوريا اسمها الجمهورية العربية السورية.. ما حدا آخد حقوقه الطبيعية.. بقى ما فيك تتوقع اي شي ايجابي او مدروس ليحل مشكلة الاكراد او اي مشكلة تانية. كلو اعتباطي
  رد مع اقتباس
قديم 09/08/2009   #13
شب و شيخ الشباب رجل من ورق
عضو
-- زعيـــــــم --
 
الصورة الرمزية لـ رجل من ورق
رجل من ورق is offline
 
نورنا ب:
Aug 2008
المطرح:
ببحر بعيد
مشاركات:
1,989

إرسال خطاب MSN إلى رجل من ورق
افتراضي


بالعكس ينعطوا حقوقون متل غيرون بس كمان بعيد عن النزعة الانفصالية
لا تسالني كيف لانو متل ما قلت اعتباطي كلو
  رد مع اقتباس
قديم 09/08/2009   #14
شب و شيخ الشباب ابو نجبوعضو مساهم
-- مستشــــــــــار --
 
الصورة الرمزية لـ ابو نجبو
ابو نجبو is offline
 
نورنا ب:
Dec 2006
المطرح:
瓷器..china
مشاركات:
2,011

إرسال خطاب MSN إلى ابو نجبو
افتراضي


اقتباس:
كاتب النص الأصلي : Joe عرض المشاركة
ما بعرف شو الحل بس جزء منه انهم ينعطوا حقوقهم الثقافية المشروعة. و ينسمح إلهم انهم يفتحوا مدارسهم و يتم الاعتراف فيهم كأقلية عرقية و لغوية... لانو الكبت ما رح يحل المشكلة و رح يولد كراهية و يزيد من المشاعر القومية
متل ما الأرمن عندهم مدارس بتعلم أرمني.. هدول نفس الشي كمان

مع انو موضوعهم شائك و بنفس الوقت ما بدك تغذي المشاعر الانفصالية

بس يعني بدولة متل سوريا اسمها الجمهورية العربية السورية.. ما حدا آخد حقوقه الطبيعية.. بقى ما فيك تتوقع اي شي ايجابي او مدروس ليحل مشكلة الاكراد او اي مشكلة تانية. كلو اعتباطي
ماالمشكلة أديش ما عطيتن من حقوق رح يقولولك كمان....
مشكلة الاكراد مشكلة عويصة ....وحلها صعب...
الجماعة طموحن و من زمان كتير.... اقامة دولة كردستان و احياء مملكة ميديا اللي كانت عايشة من 3500 سنة ....
الفرء بين الارمن و الاكراد ...انو الارمن اختارو سوريا وطن لالهن ....بينما الاكراد مابيعترفو بسوريا انو وطنن...وحتى قضاياها و قضايا العرب عموماً مابتهمّهم....

اللي بيتو من قزاز .....يبيعو فوراً ...أريحلو

.........

غيبة السبع ...خلّت للندل هيبة

.....

يعني ان لم تكن زئباً....ضروري تكون خروف..!!!!
  رد مع اقتباس
قديم 09/08/2009   #15
شب و شيخ الشباب ابو نجبوعضو مساهم
-- مستشــــــــــار --
 
الصورة الرمزية لـ ابو نجبو
ابو نجبو is offline
 
نورنا ب:
Dec 2006
المطرح:
瓷器..china
مشاركات:
2,011

إرسال خطاب MSN إلى ابو نجبو
افتراضي


أنا برأيي انو التوعية و تغيير مناهج التفكير هي الاساس لاحداث التغيير المنشود المطلوب ....
ومطلوب مننا كشباب سوري انو نحاول نتعالى و نتجاوز عقد الماضي و للي ابائنا و اجدادنا زرعوها برؤوس الاجيال المتلاحقة .....
ولاتنسو ثورة الاتصال و الانترنت و تدفّق الاخبار على مدار الساعة رح يساهم ....بحد كبير ....لتفتح العقل و زيادة الوعي.....
دورنا لازم يكون توعية اصداقائنا..أخواتنا.؟؟..اي قانون بيطلع ...اي فرمان بيصدر ...منحاول نفنّدو و نكشف مواطن الفائدة و الضرر الموجودة فيه .....

نبدا بحالنا....ونحاول نغيّر اللي حوالينا ...

و يسلمو شطرنج على هالموضوع.....
  رد مع اقتباس
قديم 09/08/2009   #16
صبيّة و ست الصبايا Nirvana
مشرف متقاعد
 
الصورة الرمزية لـ Nirvana
Nirvana is offline
 
نورنا ب:
Jun 2006
المطرح:
حيث لا أدري!
مشاركات:
3,323

افتراضي


الخوف...

كلمة جوهرية في الموضوع... قبل ما يفكر الواحد بحل كل المشاكل المذكورة أعلاه في بلدو.. لازم يحل هالمشكلة بينو وبين نفسو ...
كم مرة فكرتو تعملو شي وخفتو...؟

خوف من السلطة
خوف من الموت
خوف من الاعتقال
خوف من فقدان لقمة العيش
خوف من ضياع المستقبل
الخوف على حبايبو
وخوف من أنو الواحد يعمل شي فعلا بس ما حدا يوقّف معو ...
وخوف من أنو يفقد حريتو وحياتو عالفاضي..
وكمية الخوف لا تنتهي ... حتى لو حاولنا إنكارها..

بس يكون في بيئة خالية من الخوف إلى حد ما ممكن تعمل إضرابات واعتصامات وتكتب وتنشر وتوعي وتثقف وتحارب ازا بدك كمان... الخ.. ووقتها ممكن تلاقي حدا يتجاوب معك.

جايي عبالي أحكي كتير بهالموضوع لانو في كتير أشياء حابة أحكيها وإلي وجهة نظر بسيطة وإنسانية فيها ... بس عندي خوف من خيبة الأمل ...



بعرف أنو الموضوع ذو صبغة سورية .. لكن، حبيت اني قول رأيي المتواضع

كل جنون بينكتب بالدم ..
  رد مع اقتباس
قديم 09/08/2009   #17
شب و شيخ الشباب Joe
مشرف متقاعد
 
الصورة الرمزية لـ Joe
Joe is offline
 
نورنا ب:
Apr 2004
المطرح:
في قلوب العذارى
مشاركات:
1,763

افتراضي


بظن السؤال الحقيقي يلي لازم ينطرح هون هوي مين اهم.. الأرض لما الإنسان ... انا رح زت هالفتيشة و اهرب

بس بما اني كتير بصلتي محروقة.. فرح قول, قبل ما اهرب, انو معظم مشاكل العرب بتنبع من مفهوم انو الارض (او حتى الاشياء المبهمة الغير مرئية متل الفكرة) اهم من الانسان
  رد مع اقتباس
قديم 09/08/2009   #18
صبيّة و ست الصبايا Nirvana
مشرف متقاعد
 
الصورة الرمزية لـ Nirvana
Nirvana is offline
 
نورنا ب:
Jun 2006
المطرح:
حيث لا أدري!
مشاركات:
3,323

افتراضي


اقتباس:
كاتب النص الأصلي : Joe عرض المشاركة
بظن السؤال الحقيقي يلي لازم ينطرح هون هوي مين اهم.. الأرض لما الإنسان ... انا رح زت هالفتيشة و اهرب

بس بما اني كتير بصلتي محروقة.. فرح قول, قبل ما اهرب, انو معظم مشاكل العرب بتنبع من مفهوم انو الارض (او حتى الاشياء المبهمة الغير مرئية متل الفكرة) اهم من الانسان
اهرب ... بس قبل ما تهرب بدي أسأل سؤال تاني شبيه بسؤالك..

شو اللي بهم الانسان؟

كونو كل انسان في شي أو مجموعة أشياء بتهمو ... وفي اشياء ممكن يضحي مشانها ... وفي معايير نسبية وأولويات ... وفي انسان ما بهمو شي غير نفسو ... بقا شو اللي بهمّك يا إنسان؟
  رد مع اقتباس
إضافة موضوع جديد  إضافة رد


أدوات الموضوع

ضوابط المشاركة
لافيك تكتب موضوع جديد
لافيك تكتب مشاركات
لافيك تضيف مرفقات
لا فيك تعدل مشاركاتك

وسوم vB : حرك
شيفرة [IMG] : حرك
شيفرة HTML : بليد
طير و علّي


الساعة بإيدك هلق يا سيدي 16:04 (بحسب عمك غرينتش الكبير +3)


Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
Page generated in 0.16736 seconds with 11 queries