أخوية  

أخوية سوريا: تجمع شبابي سوري (ثقافي، فكري، اجتماعي) بإطار حراك مجتمع مدني - ينشط في دعم الحرية المدنية، التعددية الديمقراطية، والتوعية بما نسميه الحد الأدنى من المسؤولية العامة. نحو عقد اجتماعي صحي سليم، به من الأكسجن ما يكف لجميع المواطنين والقاطنين.
أخذ مكانه في 2003 و توقف قسراً نهاية 2009 - النسخة الحالية هنا هي ارشيفية للتصفح فقط
ردني  لورا   أخوية > مجتمع > منبــر أخويـــة الحــــــر

إضافة موضوع جديد  إضافة رد
 
أدوات الموضوع
قديم 15/12/2009   #37
شب و شيخ الشباب ayhamm26
عضو
-- زعيـــــــم --
 
الصورة الرمزية لـ ayhamm26
ayhamm26 is offline
 
نورنا ب:
Oct 2007
مشاركات:
1,200

افتراضي


اقتباس:
كاتب النص الأصلي : ابو نجبو عرض المشاركة
مرحبا أيهم ...الحل برأي موجود بردّي السابق ....قبل ما نحكي عن اسقاط النظام و احلال الديموقراطية لازم نسأل حالنا هل نحن كشعب مهيأ لتقبّل التعددية و الفكر المغاير و الرأي الضد ...أظن بالوقت الحالي لا
اي حلو هالحكي, هي انا وانت متفقين عليها تماما.

اقتباس:
كاتب النص الأصلي : ابو نجبو عرض المشاركة

اينا دول تانية عمتضحك علينا خيو ؟
العراق المحروق المحتل المنتعل رفّو !!
ولالبنان المحكوم بعشيرة و طايفة و قومية ..بأشخاص أقل وصف انهون ألعاب و بيادق بأيد القوى الخارجيّة!!
اينا دول عمتضحك علينا و نحن بالهم سوا .
والله يا خيو كتير دول... مو شرط من اللي حوالينا من العالم ككل, خود مثلا موريتانيا, المغرب تركيا.........

اقتباس:
كاتب النص الأصلي : ابو نجبو عرض المشاركة
ياحبيب البلد مابتحتاج لحكومة انتقالية ...البلد بحاجة الى تأهيل شامل كامل ...ولاتظن انو هالشي بتحمّل مسؤوليتو النظام لوحدو ..
لا هي اسمحلي اختلف معك فيها

اقتباس:
كاتب النص الأصلي : ابو نجبو عرض المشاركة
فيك تقلي وين دور النخبة الثقافيّة "محامين - اساتذة - ادباء -مفكّرين - علماء " ؟
أنا سبق بمشاركة سابقة استعرت تعبير للكاتب فرج بيرقدار انو نحني بدولة حتى حرية الصمت فيها ممنوعة, بهيك دولة ما حدا بيقدر يلعب اي دور

اقتباس:
كاتب النص الأصلي : ابو نجبو عرض المشاركة
مسؤولية المثقّف هي فتح العيون وتحرير العقول عالواقع ...كشف الخلل بالمجتمع و النضال لتغييرو ...هاي هي مسؤوليّة المثقف الحقيقية ...مو صف حكي شعاراتي بجرايد و مدونات ماحدا بيشوفها غير اللي متلو أو اللي بمستوا ثقافتو ..

المثقف لازم ينزل لتحت ...للشارع ..يشوف الناس و يتخالط معهون ...يرصد الاخطاء و يحكي عنها ...يتقرب من الناس لحتّى يوعّيهون ....و يصبر على خيبات الامل...ما ييأس ...
أغلب أدبائنا و مثقفينا اذا طلع معو شي ابداعي و انشهر شوي بيصير ببرج عاجي فوق ...مابيرضى يتنازل و يحكي مع العامّة ...
انا مابشوف دور الكاتب و الاديب انو يقعد يكتب اشعار غزل و قصص حب و هيام ..بيكفي ...من ايام عنترة و نحن عمنجترّ هالمشاعر و منعيدها بصيغة تانية ...أو يكتب شعر سياسي مقصقص بطريقة مزرية.. منشان الرقابة ...واذا كان هربان برّة البلد بيكتب قصائد سب و وتحشيك ...شو بدو يفيدني هالحكي ...بالعكس ...رح يشعرني بالذل أكتر و أكتر ....رح يدمّر ماتبقّى من نفسي ...

أنا بدّي أديب يعلمني كيف اقرا ....كيف احبّ القراءة ...يعلمّني كيف ازرع باولادي حب الادب و المعرفة والقراءة...
طيب هالمثقف لحتى يقدر يلعب دورو ما بدو هامش حرية؟ شلون بدو يتواصل مع الناس ليقدر يوعيها؟ اذا الاعلام بايد الدولة ....صحف تلفزيون.... اذاعة....انترنت...... و كلو موجه لهدف واحد معروف شو هو.
المثقف هو بالنهاية جزء من الشعب و الشعب مرعوب من شي اسمو عمل جماعي لانو اي نوع من انواع العمل الجماعي حتى لو كان ثقافي يصنف من قبل الامن على انو محظور


اقتباس:
كاتب النص الأصلي : ابو نجبو عرض المشاركة
وين الدور الحقيقي لرجال الدين مشايخ و قساوسة ؟
مسؤولية رجال الدين أكبر و أكثر تأثيراً ...بدل مايصرفو و قتون و جهدون لتكريس ثقافة الكراهية و المجادلة و النقاش بفسفسات و مقارنات و شغلات عفا عليها الزمن ..يوعو الشعب ...مئات القضايا التي تحتاج الى حلّ ...تقاليد بالية - التعليم-التربية-الاسرة-العنف الاسري-العنف ضد الاطفال-احترام البني أدم
مشايخ؟؟ المشايخ يا عمي صارو امام خيارين: يا اما واحدن لازم يشوف باسل الاسد عم يطير بجناحين في الجنة متل مولانا الشيخ البوطي مشان يصير مشهور
يا أما بيقطعوا عنو الهوا و حتى خطبة الجمعة بشي جامع صغير ما حدا سمعان في بيحرموا ياها

تذكرت شو صار بالشيخ عبد الرحمن كوكي؟ دخلك عرفتلي هدا ليش اعتقلوه؟ رغم انو ما قرب على سياسة و لا على اي خط احمر, و رغم هيك اعتقلو قال لانو اهان شيخ الازهر علما انو بشار الاسد نفسو سبق و بخطاب علني انو اهان رئيس مصر ووصفوا بنصف رجال. طيب شو بتفهم من هالحكي؟ انو المبادرة بهالبلد ممنوعة لانو الواحد ما بيعرف على شو عم يعتقلو هالعالم. اذا هدا الشيخ الساذج اللي واضح انو ما الو علاقة بشي صار معو هيك شلون لكن لو شيخ عندو فعلا برنامج اصلاح طموح لهالمجتمع
انا ممكن كون شيخ جامع و قرر اعمل درس كل يوم مشان وعي الناس على قصة جرائم الشرف, برأيك لو عملت هالشي بمبادرة شخصية مني كم استدعاء أمني رح يجيني؟ و اذا أصريت على هالشي كم برمة على بساط الريح رح يطلعلي؟؟


اقتباس:
كاتب النص الأصلي : ابو نجبو عرض المشاركة
دور جمعيات المجتمع المدني شبه غائب ....سوى بعض حملات الخجولة من حين الى أخر ....
الجمعيات الاهلية أغلبها يعمل باسم طوائف ..جمعية للسريان - جمعية للارمن - جمعية الشيخ الفلاني- جمعية الامام عليتاني...وكلهون بيشتغلو لصالح طايفتون و قوميتون ....
المجتمع المدني مصطلح غريب عندنا, شفلي بسوريا كم واحد بيعرف شو يعني هالمصطلح؟ المشكلة انو عندك دولة لا بترحم و لا بتخلي رحمة الله تنزل. بكتير دول باوربا الدولة مو فاضية لتحل كل المشاكل الاجتماعية فبتترك حرية كاملة لمنظمات المجتمع المدني تتصرف ضمن القوانين الموجودة بالبلد.
عنا نحني قال الشباب مو فاضين لحل مشاكل الشعب لانو مشغولين مع أحمدي نجاد في افشال المخططات الامريكية في المنطقة, طيب انو عطوا هامش حرية ولو هالقد لمنظمات اجتماعية لتحل مشاكل متل العنف الاسري متل جرائم الشرف متل قصص نظافة الشوارع و غيرها .........بس لاء كل شي بتلاقي مربوط بالامن و الاستدعاء ........... هلق انت كمغترب جرب ترجع على بلدك و تعمل جمعية سميها جمعية تعليم الناس عدم رمي النفايات في الشارع..... اي بس هيك سميها و شفلي بالله رح يصدقوك جماعة الامن؟؟ رح يخلوك تفتتح مقر لجمعيتك و تجتمع مع هالناس و تحاول تصلح سلوكن الاجتماعي؟؟

لك بزمانها المنتديات اول ما بلشت بال 2000 قالوا لحالن كم واحد علاك مسمين حالن مثقفين منخلين يطئوا حنك شوي بس بعدين لما انتبهوا انو هالمنتديات بلشت تجتذب ناس كتير و خاصة من فئة الشباب سكروها و دكوا كل اصحابها و اعضائها بالسجن

اقتباس:
كاتب النص الأصلي : ابو نجبو عرض المشاركة

ضياع النخب و تعطيل دورون ببناء الانسان هو اللي عمبيفرز التخلّف و يكرّس مفهوم الانقسام و الولاء للجماعة و ليس للبلد
ضياع النخب و تعطيل دورن مسؤول عنو الشخص اللي كان ما بدو اسم غير اسمو ينذكر بسوريا...... الشخص اللي حاول هو و نظامو القمعي ينسينا تاريخ بلدنا و يقنعنا انو التاريخ بدأ لما هو وصل لحكم سوريا

اقتباس:
كاتب النص الأصلي : ابو نجبو عرض المشاركة
هلاء منجي لاهم المشاكل و الامراض اللي منعاني منها كسوريين :
1-التخلّف : واللي بيندرج تحت وصفو كتير شغلات " الجهل - التقاليد البالية-التربية-الاسرة-النزعة الطائفية-ثقافة العنف الخ " ومتل ماحكيت فوق هي مسؤوليّة المتنورين و الطبقة المثقّفة و رجال الدين و الجمعيات المدنية و الدولة ...
برأيك كل هالمشاكل كانت بهالحدة بفترة الخمسينات و الستينات؟؟

اقتباس:
كاتب النص الأصلي : ابو نجبو عرض المشاركة
2-الحريّات : حجب و قمع و اعتقالات و ارهاب ... عمندفع ثمنا...من حريتنا من ولادنا من عمرنا ..لكن بالاخير رح نوصل للهدف ....لازم نوصل ...قبل كانو يوزعو منشورات بالليل و اذا بدّهون يعملو اجتماع بطريقة كتير معقّدة و خطرة..لكن هلاء ...بظرف ربع ساعة ممكن تجمع عشر تالاف شخص بكبسة زر و تعمل حملات و عرايض و تجمع تواقيع و تفضح الدنيا وانته قاعد ورا الشاشة ...الزمن بتغيّر و الاخبار اللي كانو يلقوننا ياها من القناة الاولى قبل خمسطاعش سنة مارح ترجع...هلاء تصير حادثة بالفلبين بعشر دقائق الدنيا كلها بتعرف ...والنظام بيعرف انو ماعاد يقدر يسيطر ...ومارح يبقى الوضع على حالو ....التغيير بدّو يجي ....بالرضى بالغصب بدو يجي ....
المشكلة مو انو كيف تجمع هالعشرتالاف المشكلة انو وين رح تلاقي مو عشرتالاف عشرة بس يسترجو يطلعو مظاهرة بهيك بلد؟؟

خود ابسط مثال, ما رح قلك تظاهر للمطالبة بحقوق سياسية او غيرو .....لاء هدا حلم في بلدنا العزيز..... خلينا ناخد موضوع شركة الخليوي اللي عم تنهب الناس علنا و مو فارق معها حدا. بذكر صارت محاولة مشان عمل احتجاجي و كانت محدودة لانها اساسا انتشرت عبر الانترنت يعني ضمن فئة معينة, طيب هلق لو فكرت مجموعة تعمل منشورات تشجع العالم انها تقاطع الخليوي حتى تتحسن الاسعار و الخدمات شو رح يصير فين برأيك؟؟ أصلا هالشي بديهي بسوريا مشان هيك ما حدا بفكر في أصلا.

اقتباس:
كاتب النص الأصلي : ابو نجبو عرض المشاركة
3-الفساد : المحسوبيات و الرشوة و الواسطات ... لما رح يصير عندك هامش حريّة معقول و يصير في مسائلة و قوانين شفّافة , مارح أقلّك انو رح ينقضى عليه ..انما رح توقف انتشارو ...ويبلش ينكمش و يتضائل
ما هون زبدة الحكي يا أبو نجبو, هامش حرية معقول هو الشرط لكل اللي عم تحكي مو بس لمحاربة الفساد وخلافي معك هو انو منين بدك تجيب هامش الحرية هاد؟؟ انا مقتنع تماما انو هالهامش الحرية مستحيل يتوفر طالما استمر الوضع الحالي.






المشكلة يا صديقي هي متل قصة البيضة و الجاجة مين فين لازم يجي اول؟ لازم الشعب بالاول يصلح حالو و يتحضر للديمقراطية..... طيب حلو بس شو بدك تعمل اذا في ناس مو من مصلحتها انو الشعب يتحضر للديمقراطية و شايفة الوضع الحالي كتير مناسب الها طالما هني متحكمين بهالبلد و مصالحن ماشية
و اذا قلت لاء بالاول مرحلة انتقالية فالناس مرعوبة و اللي بيكرهوا النظام بيخافوا من التغيير يمكن قبل اللي بيحبو


طولنا عليك لا تأخذنا خاي
  رد مع اقتباس
قديم 16/12/2009   #38
شب و شيخ الشباب Nihal Atsiz
عضو
-- أخ لهلوب --
 
الصورة الرمزية لـ Nihal Atsiz
Nihal Atsiz is offline
 
نورنا ب:
Feb 2008
المطرح:
دمشق
مشاركات:
350

افتراضي


اقتباس:
كاتب النص الأصلي : ابو نجبو عرض المشاركة
مرحبا أيهم ...الحل برأي موجود بردّي السابق ....قبل ما نحكي عن اسقاط النظام و احلال الديموقراطية لازم نسأل حالنا هل نحن كشعب مهيأ لتقبّل التعددية و الفكر المغاير و الرأي الضد ...أظن بالوقت الحالي لا

اينا دول تانية عمتضحك علينا خيو ؟
العراق المحروق المحتل المنتعل رفّو !!
ولالبنان المحكوم بعشيرة و طايفة و قومية ..بأشخاص أقل وصف انهون ألعاب و بيادق بأيد القوى الخارجيّة!!
اينا دول عمتضحك علينا و نحن بالهم سوا ...
ياحبيب البلد مابتحتاج لحكومة انتقالية ...البلد بحاجة الى تأهيل شامل كامل ...ولاتظن انو هالشي بتحمّل مسؤوليتو النظام لوحدو ..

فيك تقلي وين دور النخبة الثقافيّة "محامين - اساتذة - ادباء -مفكّرين - علماء " ؟
مسؤولية المثقّف هي فتح العيون وتحرير العقول عالواقع ...كشف الخلل بالمجتمع و النضال لتغييرو ...هاي هي مسؤوليّة المثقف الحقيقية ...مو صف حكي شعاراتي بجرايد و مدونات ماحدا بيشوفها غير اللي متلو أو اللي بمستوا ثقافتو ..

المثقف لازم ينزل لتحت ...للشارع ..يشوف الناس و يتخالط معهون ...يرصد الاخطاء و يحكي عنها ...يتقرب من الناس لحتّى يوعّيهون ....و يصبر على خيبات الامل...ما ييأس ...
أغلب أدبائنا و مثقفينا اذا طلع معو شي ابداعي و انشهر شوي بيصير ببرج عاجي فوق ...مابيرضى يتنازل و يحكي مع العامّة ...
انا مابشوف دور الكاتب و الاديب انو يقعد يكتب اشعار غزل و قصص حب و هيام ..بيكفي ...من ايام عنترة و نحن عمنجترّ هالمشاعر و منعيدها بصيغة تانية ...أو يكتب شعر سياسي مقصقص بطريقة مزرية.. منشان الرقابة ...واذا كان هربان برّة البلد بيكتب قصائد سب و وتحشيك ...شو بدو يفيدني هالحكي ...بالعكس ...رح يشعرني بالذل أكتر و أكتر ....رح يدمّر ماتبقّى من نفسي ...

أنا بدّي أديب يعلمني كيف اقرا ....كيف احبّ القراءة ...يعلمّني كيف ازرع باولادي حب الادب و المعرفة والقراءة...

وين الدور الحقيقي لرجال الدين مشايخ و قساوسة ؟
مسؤولية رجال الدين أكبر و أكثر تأثيراً ...بدل مايصرفو و قتون و جهدون لتكريس ثقافة الكراهية و المجادلة و النقاش بفسفسات و مقارنات و شغلات عفا عليها الزمن ..يوعو الشعب ...مئات القضايا التي تحتاج الى حلّ ...تقاليد بالية - التعليم-التربية-الاسرة-العنف الاسري-العنف ضد الاطفال-احترام البني أدم

بيجي عالم دين بقعدلو سنتين زمان و هو عمبيألف كتاب عن الفرق بين الفرقة النجبويّة و الفرقة الايهميّة و مين رح يدخل النار و مين رح بدخل عالجنّة ...ياترى لو هالرجل استثمر الوقت اللي قضاه بتأليف هالكتاب و استعمل العلم اللي متعلمو بقضايا تهمني انا الانسان الدرويش مو أثوبلو ...و أفيد الي !
أو بجينا شيخ بيقعد ساعتين و هو عمبيصرخ و يوصفلنا كيف بأخر الزمان رح يجي "الاصيلع الافيلع" اللي طولو سطاعش متر و طول ذراعو سبع متار منشان يهدم الكعبة ...اي انا شو بيهمني بأخر الزمان ...فهمني شو أعمل بحياتي هلاء ...كيف اتعامل مع البشر اللي حوالي...وخيو يبقى الكعبة الله بتولاها ...

دور جمعيات المجتمع المدني شبه غائب ....سوى بعض حملات الخجولة من حين الى أخر ....
الجمعيات الاهلية أغلبها يعمل باسم طوائف ..جمعية للسريان - جمعية للارمن - جمعية الشيخ الفلاني- جمعية الامام عليتاني...وكلهون بيشتغلو لصالح طايفتون و قوميتون ....

ضياع النخب و تعطيل دورون ببناء الانسان هو اللي عمبيفرز التخلّف و يكرّس مفهوم الانقسام و الولاء للجماعة و ليس للبلد


هلاء منجي لاهم المشاكل و الامراض اللي منعاني منها كسوريين :
1-التخلّف : واللي بيندرج تحت وصفو كتير شغلات " الجهل - التقاليد البالية-التربية-الاسرة-النزعة الطائفية-ثقافة العنف الخ " ومتل ماحكيت فوق هي مسؤوليّة المتنورين و الطبقة المثقّفة و رجال الدين و الجمعيات المدنية و الدولة ...

2-الحريّات : حجب و قمع و اعتقالات و ارهاب ... عمندفع ثمنا...من حريتنا من ولادنا من عمرنا ..لكن بالاخير رح نوصل للهدف ....لازم نوصل ...قبل كانو يوزعو منشورات بالليل و اذا بدّهون يعملو اجتماع بطريقة كتير معقّدة و خطرة..لكن هلاء ...بظرف ربع ساعة ممكن تجمع عشر تالاف شخص بكبسة زر و تعمل حملات و عرايض و تجمع تواقيع و تفضح الدنيا وانته قاعد ورا الشاشة ...الزمن بتغيّر و الاخبار اللي كانو يلقوننا ياها من القناة الاولى قبل خمسطاعش سنة مارح ترجع...هلاء تصير حادثة بالفلبين بعشر دقائق الدنيا كلها بتعرف ...والنظام بيعرف انو ماعاد يقدر يسيطر ...ومارح يبقى الوضع على حالو ....التغيير بدّو يجي ....بالرضى بالغصب بدو يجي ....

3-الفساد : المحسوبيات و الرشوة و الواسطات ... لما رح يصير عندك هامش حريّة معقول و يصير في مسائلة و قوانين شفّافة , مارح أقلّك انو رح ينقضى عليه ..انما رح توقف انتشارو ...ويبلش ينكمش و يتضائل

4-الاقتصاد المتدهور : أغلب المصايب نتيجة الفساد و السرقات اللي اهلكت الحرث و النسل ...اصلاً الاقتصاد هو قوانين صارمة , مرونة و شفافية ...لما بتحقق هالمناخ الاقتصادي المناسب , تلقائياً رح تترجم النتائج عالواقع ..


بعد مانحضّر حالنا و نهيئ انفسنا ونحل تلت المشاكل اللي فوق ...تفضلو ... عطونا ديموقراطيّة ...

انا مؤمن انو كل الامراض اللي بتعاني منها البلد مرتبطة ببعض ...
والاساس هو الانسان ...تفكيرو و نمط معيشتو و منهج حياتو هو مفتاح الحل للتغيير
صدقني لما بنبلّش نتقبل بعضنا و نتحرر من سجون تخلّفنا وننفض الغبرا من أدمغتنا...
بيكون أول و أشرف خطوة في طريق التغيير ...


بيكفي توصيف و تنظير و صف حكي عالواقع المرّ و الذلّ اللي عايشينو ...كلنا منعرف شو الامراض اللي منعاني منها ....وحاطّين ايدنا على خدنا ...عمننظر شي معجزة من السما ...أو قوى خارجية تجي تحتل البلد و تشيل النظام و تحط بدالو أنظمة ...واذا كنّا هلاء عمنصفق لقائد واحد ....هداك الوقت بدنا نصفق لخمسين قائد و زعيم..

صرلنا زماان كتير ونحن عمنحكي و منحكي ...لازم يجي الوقت اللي ندوّر فيه على حلول ....ونبلّش نشتغل
لعل و عسى أولادنا ...أو احفادنا.. يقدرو يوصلو ..ويعيشو بحريّة و هنن رافعين راسون ...هداك الوقت بيصير "انا سوري اه يانيالي"

سلام
أخي الكريم سأعطيك مثالا يلخص الحل برأيي:
كما هو معروف عندما تتعطل كليتي الانسان ويصاب بالقصور الكلوي’ فان ذلك يؤدي لمجموعة من الأضطرابات مثل:
ارتفاع الضغط الشرياني
تخلخل العظام
فقر الدم
اعتلال الدماغ

ولكن عندما يجري هذه الانسان عملية زرع كلى جديدة فان هذه الاضطرابات تختفي تلقائيا بمجرد زرع الكلى الجديدة

وهذا هو الحل اخي الكريم, يجب ان نكنس الزبالة البعثية الأسدية من سوريا اولا وقبل كل شيء وستجد كيف ستحل باقي المشاكل تلقائيا


بالنسبة للنخبة المثقفة انا بقلك هن وين:
إما في السجون أو في المنفى او تحت الارض
بتقلي محامين؟؟؟ ليكو عميد الحقوقيين في سوريا الاستاذ هيثم المالح عمره 80 سنة في السجن لمجرد انه انتقد ظاهرة السكن العشوائي بدمشق على قناة بردى!!!
بقى على مين المسؤولية هون؟؟ على النظام او على هيثم المالح؟
كمان عندك المحامي انور البني والمحامي مهند الحسني بالسجن والاستاذ عارف دليلة خرج لتوه من السجن والمفكر عبد الرزاق عيد وغيره من المثقفين السوريين في المنفى.
اي واحد بحكي كلمة برات الطريق النظام بنهي مهما كان عمرو شب صغير او ختيار كبير وهالشي اكيد النظام لوحده يتحمل مسؤوليته.
شوف شو صار بمنتدى الأتاسي, شوف شو صار باعلان دمشق, هدول مو احزاب سياسية, هدول نخب مثقفة كان عندن برامج تهدف لتوعية المجتمع السوري ورصد الاخطاء والنقاش حولها بكل حرية كما في منتدى سهير الاتاسي ولكن النتيجة كانت اغلاقن ورمي الاعضاء بالسجون, بمختصر الكلام ابو نجبو النظام ما يعطي حدا مجال ليتنفس, النظام لن يسمح بتوعية الشعب السوري .
بالنسبة لدور رجال الدين فمع الأسف غالبية رجال الدين في سوريا حاليا هم خريجو المؤسسات المخابراتية السورية, اما رجال الدين الحقيقيين فهم خارج البلاد هاربين من قمع النظام د او تحت الارض مثل الشيخ مرشد معشوق الخزنوي الذي قام النظام بقتل والده قبل سنوات.
واعلم اخي الكريم انو مافي خطبة تلقى في منابر يوم الجمعة الا بتدقيق وتمحيص من المخابرات السورية ولا يطبع كتاب ديني الا بعد ان تتم مراجعته وتعديله من الفروع الامنية, أي ان هذه الخزعبلات والسخافات عن اخر الزمان اللي عم يصرعونا فيها المشايخ هلئ هي بموافقة ومباركة المخابرات السورية.
بتقول انو دور جمعيات المجتمع المدني غائب!! مين غيبوا؟؟ الشعب او قمع الاجهزة الامنية؟

بالنسبة لمشكلة الحريات, مين قلك انو المعارضة ما عم تستخدم التقنيات الحديثة لفضح النظام؟
لما تم اعتقال المحامي هيثم المالح, كان المسؤولين الدوليين الكبار عم ينددوا بهالشي في غضون ساعات قليلة من الحادثة, هناك عشرات المواقع للاحزاب السورية المعارضة ومجموعات خاصة بها على فيسبوك وتويتر, حتى ان قنوات المعارضة كزنوبيا وبردى ارعبت طغاة دمشق الذين وظفوا كل قوتهم وجبروتهم واوراقهم لاغلاق هذه القنوات
المشاكل الاخرى اللي ذكرتها من فساد واقتصاد متدهور النظام مسؤول عنها مو الشعب.

The homeland of Turks is not Turkey or Turkistan
its great and eternal place called Turan
  رد مع اقتباس
قديم 17/12/2009   #39
شب و شيخ الشباب ابو نجبوعضو مساهم
-- مستشــــــــــار --
 
الصورة الرمزية لـ ابو نجبو
ابو نجبو is offline
 
نورنا ب:
Dec 2006
المطرح:
瓷器..china
مشاركات:
2,011

إرسال خطاب MSN إلى ابو نجبو
افتراضي


اقتباس:
كاتب النص الأصلي : ayhamm26 عرض المشاركة
والله يا خيو كتير دول... مو شرط من اللي حوالينا من العالم ككل, خود مثلا موريتانيا, المغرب تركيا.........
المغرب ..!! المغرب على اضرب ..
تركيا ...حلو هالكلام ...شوف تركيا بالخمسينيات و الستينيات ...كيف كانت و كيف صارت هلاء ...تركيا بالخمسينيات دولة علمانية بالاسم فقط ..القمع الفكري و الغاء الاقليات و سيطرة العسكر "حماة العلمانية" ...
وهلاء تركيا تطورت كتير و صارت أكتر نضجاً ....لكن كيف صارت هيك ....دعم خارجي !!..انقلاب عالنظام ..!! صارت هيك بفضل كفاح و تضحيات النخب السياسية و الثقافيّة التركية ....
عزيز نيسن...يساري التوجه و علماني الافكار .... كم مرّة اندك بالسجن ...كم مرّة يسكّرولو جريدتو و يرجع يفتح وحدة تانية بغير اسم ...
نجم الدين اربكان ...كم حزب اسس ...كل مرة ...بينحظر حزبو و يدخل السجن ...بيطلع و بيعمل حزب جديد و بيرجع للكفاح والعمل السياسي....
رجب طيب و عبد الله غول نفس الشي ..لاحظ انو هالشخصيات السياسية ذات توجّه اسلامي ...
شفلي كيف قدرت هالنخب السياسية تغيير سياسة البلد و توجهاتها لصالح أفكارون و مبادئون , الانفتاح و قيادة العالم الاسلامي ...تحقق هالشي بدون ما تمس نظام الدولة و بدون اراقة دماء ...بدون انقلاب ....
بقو يكافحو و يناضلو طوال تلاتين سنة حتى وصلو لغاياتون...مو سنتين تلاتة أو عشرة سنين...
وهاد اللي كنت عمبقولو بالمشاركة السابقة ...انو الكفاح من أجل التغيير, يتطلب الكثير من العمل و الصبر و الاصرار و المثابرة ....انته عمتغيّر مجتمع ..شعب كامل ....طريقة منهج التفكير..بدّك تنسجن و تتعذب و تنطرد برّة البلد و مع ذلك ما تيأس ...وتبقى مصرّ على اهدافك و ماتحيد عن مبادئك....مالك عمتعارض و تشتغل طمعاً بالحكم أو لغايات خاصّة ...متل المعارضة العراقية اللي صارو هلاء بالحكم و طلعو اوسخ من صدّام و نظامو ....

موريتانيا ...انقلاب على حكم ديكتاتوري ...جابو رئيس جديد ...رجعو عملو عليه انقلاب ...وعملو انتخابات ...مابتعرف بالمستقبل كم انقلاب بدّو يصير .....
بتبقى موريتانية حالة خاصّة و غريبة نوعاً ما..غريبة بالنسبة للوسط العربي انو يجي عقيد يعمل انقلاب و يسلم السلطة بعد انتخابات ديموقراطية ....مبروك الون و بتمنّى نصير متلون يوم من الايام....


اقتباس:
أنا سبق بمشاركة سابقة استعرت تعبير للكاتب فرج بيرقدار انو نحني بدولة حتى حرية الصمت فيها ممنوعة, بهيك دولة ما حدا بيقدر يلعب اي دور
يعني بدك تفهمني ازا طلع شيخ أو قسيس و قال انو المسيحية و الاسلام أخوة ...بيشحطوه على كلامو هاد ...!!
او بيحبسو واحد بيحكي عن جرائم الشرف أو الزواج المبكّر أو الثأر أو تشغيل الاطفال !
ولا بيحققّو مع صحفي لانو حضّ على حق البنت بالتعليم و الاختلاط و التحصيل الدراسي ...!!

برجع بقول دور النخب ليست المطالبة بالحرية و الديمواقراطيّة و التغيير بالوقت الحاضر....
حالياً المطلوب و بالحاح ...
توحيد رؤى و اهداف النخب الاجتماعية ...كيف يعني ..
انو المثقفين بمختلف توجّهاتهم ورجال الدين بمختلف انتمائاتهم, الكتّاب و روّاد الكلمة بمختلف مشاربهم, هالشريحة من الناس كتير بيكون الهون تأثير على الاشخاص و العامّة ....لازم يتفق الاغلبيّة منهون على مجموعة نقاط مشتركة تكفل الارتقاء بعقلية الشعب و انماط تفكيرون ...
يعني ....كتير من الكتّاب و المثقّفين و رجال الدين بيحرضو عالطائفية و العنصرية ...عالعنف...تبرير الجرائم...تطرف ضد المرأة ...تكريس سلطة الرجل .....الكراهية الطبقيّة....الخ من الامراض الاجتماعيّة المستشرية بالناس ...ويوجد كمان بعض الاراء النخبوية تبالغ في طرح افكار التحرر الاجتماعي و التخلّص من قيود الدين و العادات و الاخلاق ..الخ
هدول النوعين من النخبة ما بيساهمو و لا بشكل من الاشكال بواجبهون المفروض عليهون من حيث التوعية و ايجاد اسس تطور التفكير و العقليّة للناس ....بينما الملاحظ هلاء انو دور هالنخب منحصر ببث أفكارو و أيجاد أي دليل على صحتها و الانتقاص من الاخر و اقصائو ...
وتوجد قلّة من المتنورين اللي فهمو ماهيّة الصراع و ادركو أسباب الانحدار ...هي النخبة المفروض تكبر و شعبيتها تزيد بين الناس ...هالقلّة العاقلة الحكيمة من العلماء و المفكرين لازم تزيد قاعدتون الشعبية و تزيد افكارون بين الناس ...لازم نتخلص من ثقافة الكراهية و تحلّ محلها تقبل و محبّة الاخر ...نفهم انو المرأة هي نص الشعب ...ولمّا بنهمّش دور المرأة معناها عم نسقط نص الشعب من حساباتنا ..لما بنوصل لحقيقة انو البنت هي انسان عندو ارادة و ذكاء و بيقدر يحاكم الامور وليست كتلة شهوة متحركة...او عار لازم نخبّيه من العيون ....لمّا منعرف انو ست ولاد مابيقدر اي أب و أم يعطيون اهتمام و رعاية و تربية و انو رح يكونو تكملة عدد ليس الا...لما منعرف انو كلمة جحش أو ضرب الكف بتأذي نفسية الطفل و بتأثّر على شخصيتو وثقتو بنفسو و تفاعلو مع محيطو ...

اقتباس:
المثقف هو بالنهاية جزء من الشعب و الشعب مرعوب من شي اسمو عمل جماعي لانو اي نوع من انواع العمل الجماعي حتى لو كان ثقافي يصنف من قبل الامن على انو محظور
طيب هلاء التجمّع ممنوع حالياً ...شو منعمل ! نطالب السلطات بالسماح و نستنكر و نشجب تصرفات الامن ...طيب طالبنا و ماصار شي ..وبعدين...ننتظر لبين مايجي الفرج لحالو ....ولا منحاول استنباط طرق جديدة للتوعيّة ....!
مو ضروري يكون بصفة رسميّة ......بين الشلل و الاصحاب ....بالاجتماعات الخاصّة.....أغلب الشباب بتجتمع منشان تلعب تركس ...لو هالوقت الي بيضيعوه على شب الكوبة و بنت الدينار , عوضوه بتبادل الافكار و الطروحات والنقاش ...من أصل خمس اشخاص لو في واحد استفاد هالواحد رح يأثر على تنين و هالتنين على اربعة الخ الخ
برجع بقّلك المشوار طويل و صعب ..النتائج مارح تظهر لا بخمسة و لا بعشر سنين ...ازا الواحد بلّش هلاء





اقتباس:
المجتمع المدني مصطلح غريب عندنا, شفلي بسوريا كم واحد بيعرف شو يعني هالمصطلح؟ المشكلة انو عندك دولة لا بترحم و لا بتخلي رحمة الله تنزل. بكتير دول باوربا الدولة مو فاضية لتحل كل المشاكل الاجتماعية فبتترك حرية كاملة لمنظمات المجتمع المدني تتصرف ضمن القوانين الموجودة بالبلد.
صحيح كلامك ...انا أول الناس , وعندي الشجاعة اقولها , انو ماعرفت شو هاد مجتمع مدني الا من كم سنة ..وعن طريق صديق عزيز صار يشرحلي شوهاد مجتمع مدني و شو مهمّتو و غاياتو ...
هلاء الشي الحلو انو انا عرفتو و اقتنعت فيه و صرت أنقل قناعاتي لاشخاص تانيين ...منن اللي اقتنع و منن اللي صار يناقش ...وبرأيي النقاش كان كتير مفيد ..خصوصي انو كان في بشر مستمعين فقط وهاد شي جيد كونون فهمو و عرفو معلومات ماكانو بيعرفو شو بتعني ....أو كانو متخوّفين منها ...

اقتباس:
لك بزمانها المنتديات اول ما بلشت بال 2000 قالوا لحالن كم واحد علاك مسمين حالن مثقفين منخلين يطئوا حنك شوي بس بعدين لما انتبهوا انو هالمنتديات بلشت تجتذب ناس كتير و خاصة من فئة الشباب سكروها و دكوا كل اصحابها و اعضائها بالسجن
حبيب ...لاتروح لبعيد ...هون بالصين ...حاجبين اليوتوب و الفايس بوك و التويتر ...مع انو اغلب الشعب هون مابحب السياسة و لا بيحكي فيها ...لكن احداث شينجيانغ الاخيرة هو اللي خلا الحكومة تحجب هالمواقع ..

ليش عندنا مالون حاجبين مواقع متل عكس السير و موقع نساء سوريا و غيرون كتير ....مع انو أغلب هالمواقع هدفها هو تسليط الضوء على الامراض التي يعاني منها المجتمع السوري...
منين الواحد كان بدّو يعرف مساوئ أو محاسن قانون الاحوال الشخصيّة الجديد لولا هالمواقع و هالمتنورين اللي فنّدت و درست القرار ... وطرشت المواقع فيه ....
اقتباس:
ضياع النخب و تعطيل دورن مسؤول عنو الشخص اللي كان ما بدو اسم غير اسمو ينذكر بسوريا...... الشخص اللي حاول هو و نظامو القمعي ينسينا تاريخ بلدنا و يقنعنا انو التاريخ بدأ لما هو وصل لحكم سوريا
برجع بقلك هاد الحكي مابيفيد ...
عندك تلات حلول
يا أما تقعد طول الوقت تبكي على حالك و ضعفك و هوانك على الناس و تسبّ النظام و الحكومة ...
أو تحرّض امريكا و اسرائيل على احتلال البلد لتخليصك من قمع و استبداد النظام ...بس بهالحالة مابعرف كم مليون سوري ممكن يكفّو وقود لهالحتلال ...
أو تفكر كيف بدنا نغير حالنا ....وكيف لازم نتطوّر ....للوصول بالنهاية لمجتمع منفتح و شعب واعي ...

اقتباس:
برأيك كل هالمشاكل كانت بهالحدة بفترة الخمسينات و الستينات؟؟
لا ماكان الوضع متل هلاء ....
بس بتعرف ...بالخمسينات و الستينات كانت فترة نهوض قومي شامل بكل الدول العربيّة ..ولاتنسى انو الحماس الشعبي كان يغطّي المشاكل , الاعتزاز بتاريخ العرب و انجازاتون و الالتفاف حول الزعيم المهرّج عبد الناصر عمل عَمَل المخدر أو البنج ... ولما صحي المواطن على حقيقة الاحباط و الذل و الكذب اللي كان عايش فيه أدى الى تشخيص مشاكلو و حقيقة ضعفو و محدودية فكرو و عقلو ....

اقتباس:
المشكلة يا صديقي هي متل قصة البيضة و الجاجة مين فين لازم يجي اول؟ لازم الشعب بالاول يصلح حالو و يتحضر للديمقراطية..... طيب حلو بس شو بدك تعمل اذا في ناس مو من مصلحتها انو الشعب يتحضر للديمقراطية و شايفة الوضع الحالي كتير مناسب الها طالما هني متحكمين بهالبلد و مصالحن ماشية
و اذا قلت لاء بالاول مرحلة انتقالية فالناس مرعوبة و اللي بيكرهوا النظام بيخافوا من التغيير يمكن قبل اللي بيحبو
عزيزي ....الانجازات العظيمة كأن ترتقي بالوعي و تعلو بالفكر و تتخلّص من الذل و الخنوع , يلزمه تضحيات عظيمة وجهود جبّارة و همّة عالية و ايمان بقدرة الانسان ...ازا كنّا خايفين مابنقدر نعمل أي شي ...

أكيد بدك تتحارب و أكيد بدك تنظلم ......أكيد في جهات بدها تحاول تقضي عليك لتبقى هي المسيطرة ...

لكن ..باعتقادي و ايماني.. نبل الغاية يستحق كبر التضحية...



طولنا ..


سلام بقى.

اللي بيتو من قزاز .....يبيعو فوراً ...أريحلو

.........

غيبة السبع ...خلّت للندل هيبة

.....

يعني ان لم تكن زئباً....ضروري تكون خروف..!!!!
  رد مع اقتباس
قديم 17/12/2009   #40
شب و شيخ الشباب ابو نجبوعضو مساهم
-- مستشــــــــــار --
 
الصورة الرمزية لـ ابو نجبو
ابو نجبو is offline
 
نورنا ب:
Dec 2006
المطرح:
瓷器..china
مشاركات:
2,011

إرسال خطاب MSN إلى ابو نجبو
افتراضي


اقتباس:
كاتب النص الأصلي : Nihal Atsiz عرض المشاركة
أخي الكريم سأعطيك مثالا يلخص الحل برأيي:
كما هو معروف عندما تتعطل كليتي الانسان ويصاب بالقصور الكلوي’ فان ذلك يؤدي لمجموعة من الأضطرابات مثل:
ارتفاع الضغط الشرياني
تخلخل العظام
فقر الدم
اعتلال الدماغ

ولكن عندما يجري هذه الانسان عملية زرع كلى جديدة فان هذه الاضطرابات تختفي تلقائيا بمجرد زرع الكلى الجديدة

وهذا هو الحل اخي الكريم, يجب ان نكنس الزبالة البعثية الأسدية من سوريا اولا وقبل كل شيء وستجد كيف ستحل باقي المشاكل تلقائيا
طيب كيف تأكدت ...
ليش مايصير فينا متل العراق مثلاً...؟
اقتباس:
بالنسبة للنخبة المثقفة انا بقلك هن وين:
إما في السجون أو في المنفى او تحت الارض
بتقلي محامين؟؟؟ ليكو عميد الحقوقيين في سوريا الاستاذ هيثم المالح عمره 80 سنة في السجن لمجرد انه انتقد ظاهرة السكن العشوائي بدمشق على قناة بردى!!!
بقى على مين المسؤولية هون؟؟ على النظام او على هيثم المالح؟
كمان عندك المحامي انور البني والمحامي مهند الحسني بالسجن والاستاذ عارف دليلة خرج لتوه من السجن والمفكر عبد الرزاق عيد وغيره من المثقفين السوريين في المنفى.
اي واحد بحكي كلمة برات الطريق النظام بنهي مهما كان عمرو شب صغير او ختيار كبير وهالشي اكيد النظام لوحده يتحمل مسؤوليته.
شوف شو صار بمنتدى الأتاسي, شوف شو صار باعلان دمشق, هدول مو احزاب سياسية, هدول نخب مثقفة كان عندن برامج تهدف لتوعية المجتمع السوري ورصد الاخطاء والنقاش حولها بكل حرية كما في منتدى سهير الاتاسي ولكن النتيجة كانت اغلاقن ورمي الاعضاء بالسجون, بمختصر الكلام ابو نجبو النظام ما يعطي حدا مجال ليتنفس, النظام لن يسمح بتوعية الشعب السوري .
بالنسبة لدور رجال الدين فمع الأسف غالبية رجال الدين في سوريا حاليا هم خريجو المؤسسات المخابراتية السورية, اما رجال الدين الحقيقيين فهم خارج البلاد هاربين من قمع النظام د او تحت الارض مثل الشيخ مرشد معشوق الخزنوي الذي قام النظام بقتل والده قبل سنوات.
واعلم اخي الكريم انو مافي خطبة تلقى في منابر يوم الجمعة الا بتدقيق وتمحيص من المخابرات السورية ولا يطبع كتاب ديني الا بعد ان تتم مراجعته وتعديله من الفروع الامنية, أي ان هذه الخزعبلات والسخافات عن اخر الزمان اللي عم يصرعونا فيها المشايخ هلئ هي بموافقة ومباركة المخابرات السورية.
بتقول انو دور جمعيات المجتمع المدني غائب!! مين غيبوا؟؟ الشعب او قمع الاجهزة الامنية؟
انا ماكنت عمبحكي على دور النخبة في فضح النظام و تنظيم الاحزاب السياسية و الدعوة الى الحريّات ....ياريت تراجع كلامي ...
كنت عمبقصد انو دور النخبة بتوعية الناس و محاربة الامراض الاجتماعية المستفحلة بين البشر من طائفية لعنصرية لحقد طبقي الخ .....هاد الدور غايب ....وكنت عمبقول انو قبل ما ننادي بالديموقراطية ...يجب علينا و على النخبة اعادة هيكلة الانسان لكي يكون مستعداً لاستقبال شئ اسمو ديمواقراطية ...
يعني بردّي السابق كنت عمبتسائل ..اذا انا هلاء قلت انو ياجماعة ...ياناس...يابشر .... تشغيل الاطفال تحت سن ال12 خطأ ...يا أب لمّا بتشغل ابنك الصغير بتكون عمتعرضو لتحرشات ولا سمح الله يصير اغتصاب ..ياصاحب المحل أو الورشة ...اذا اجاك حدا بدّو يشغل ابنو عندك لاتقبل ...اذا صرلو شي للولد رح تكون انته مسؤول امام ضميرك ...شو فيو هالحكي ...عمبسب حدا أنا ...عمبضرّ حدا .... معقول بجي الامن بيشحطني على كلامي هاد...!!
  رد مع اقتباس
قديم 18/12/2009   #41
صبيّة و ست الصبايا sona78
عضو
-- مستشــــــــــار --
 
الصورة الرمزية لـ sona78
sona78 is offline
 
نورنا ب:
Jun 2008
مشاركات:
1,993

افتراضي


الديمقراطية كلمة كتير مطاطة سواء عنا ولا عند غيرنا
يعني مثلا اذا قلنا انها حكم الاكثرية منتذكر انو شخصية متل هتلر وموسيليني .. وبوقتنا الحالي جورج بوش الابن اجو بانتخابات ديمقراطية كانت نتائجها سلبية على دولهم ودول اخرى تانية
اذا حكينا عن تركيا تركيا اكيد فيها نوع من الديمقراطية بس للاسف المهددة دوما من قبل الجيش يعني الجيش اذا ما عجبو شي باسلوب الحكم المتبع بيلغيه او بيحاول يلغية وهيدا شفناه من اشكاليتهون مع الحزب الحالي
واذا قلنا تعدد احزاب حرية منلاقي انو بكل العالم غالبا بين حزبين واذا كتير 3 بيصير تداو السلطة وانو يعني غالبا عم تكون الفروق مانها جوهرية كتير لانو في درحة معينة لازم كل الاحزاب تحافظ عليها لتاخد سماحيةلنشاطها او دخولها الحكومة وهيدا مثى منشوفو بالمانيا نتيجة دحول وتزايد حصة الحزب النازي بيعتبرو انو لازم ينمنع مع انو الو قاعدتو الشعبية ...
فانو ديمقراطية ؟؟ شو يعني ؟؟ شو تعريفها بالضبط ؟؟ ومين بيحق الو يعطي تعريف؟؟

بتوقع بالنسبة الي ع الاقل بيكفي انو بس يصير في شي اسمو سلطة قانون ..
سلطة قانون اعلى من كل السلطات وانو تتفعل بشكل حقيقي .. مع اعطاء ميزات كبيرة مادية ومعنوية للقضاة للحفاظ على النزاهة..
بهي الحالة بيصير في شي اسمو مساواة وايا تجاوز لايا شحصية سواء مدنية او سياسية تتعرض للمسائلة القانونية
بهيك حالو بتوقع انو يصير في شي اسمو عدل يلي هوي بتوقع من اهم اهداف الديمقراطية بايا بلد

قلي لي احبك
كي تزيد قناعتي اني امرأة
قلي احبك
كي اصير بلحظة .. شفافة كاللؤلؤة
  رد مع اقتباس
قديم 20/12/2009   #42
شب و شيخ الشباب ayhamm26
عضو
-- زعيـــــــم --
 
الصورة الرمزية لـ ayhamm26
ayhamm26 is offline
 
نورنا ب:
Oct 2007
مشاركات:
1,200

افتراضي


اقتباس:
كاتب النص الأصلي : ابو نجبو عرض المشاركة

المغرب ..!! المغرب على اضرب ..
.
يا سيدي ياريت ربع اللي صار بالمغرب يصير عنا..... بتلاقي من فترة حكمو سنتين سجن على صحفي لانو نشر كاريكاتور عن الملك هي بالاحلام ما بتصير عنا لانو عنا اللي بيفتح تمو بكلمة عم ينسجن اكتر من هيك

اعترفت الدولة بعهد الملك الجديد بقسم كبير من جرائم التعذيب اللي صارت بعهد الحسن الثاني و تم تعويض الالاف ...... عنا لسا بيتفاخروا قدام الامريكان بهيك جرائم و بيعتبروها مكافحة ارهاب

انا ما عم قلك انو هني مثال يحتذى به بس شوف حجم التغيير اللي دخل على مجتمعن و حجم التغيير اللي صار عنا

اقتباس:
كاتب النص الأصلي : ابو نجبو عرض المشاركة

يعني بدك تفهمني ازا طلع شيخ أو قسيس و قال انو المسيحية و الاسلام أخوة ...بيشحطوه على كلامو هاد ...!!


او بيحبسو واحد بيحكي عن جرائم الشرف أو الزواج المبكّر أو الثأر أو تشغيل الاطفال !
ولا بيحققّو مع صحفي لانو حضّ على حق البنت بالتعليم و الاختلاط و التحصيل الدراسي ...!!
بجوز ما يحبسو بس على الاغلب رح يحبسو بتعرف ليش؟ لانو بلد ما فيها قانون و الاعتقال فيها كيفي و اسهل شي عندن يعتقلو انسان و يمسحوا في الارض

من كم يوم لسا اعتقلوا الصحافي معن عاقل, بتقدر تقلي ليش؟؟ هدا ما كان مراسل قناة بردى كان صحفي بجريدة حكومية و عم يكتب تحقيقات عن الفساد و الفقر و ما قرب على حقوق الانسان و التعذيب وغيرو

بتعرف طيب ليش اعتقلوا؟ انا ما بعرف و مثلا كمواطن عايش ببلد ما في قانون يمنع اوباش المخابرات يعتقلوا اللي بدن ياه او شي يحميني منن ما بقدر و الله بادر باي شي ....... احسن حل بصير بهالحالة هو اقعد ببيتي و اسكن لانو هدا الضامن الوحيد انو ما اتعرض للاعتقال و الاهانة بالعكس بهالبلد في قانون بيحمي المخابرات مني اذا خطرلي ارفع علين دعوى و ما في ولا قانون بيحميني منن

بتقلي بهالحالة انا جبان....... معك مظبوط انا جبان اصلا انا سالتك انو بالخمسينات كنا هيك ووافقت معي انو ما كنا هيك اصبح لازم نرجع ونشوف شو اللي خلانا نصير هيك؟ لازم نرجع ونشوف كمية القمع اللي شافها الشعب اثناء صراع النظام و الاخوان المسلمين على السلطة و اللي ولدت جيل بيخاف من خيالو

اقتباس:
كاتب النص الأصلي : ابو نجبو عرض المشاركة
برجع بقول دور النخب ليست المطالبة بالحرية و الديمواقراطيّة و التغيير بالوقت الحاضر....
حالياً المطلوب و بالحاح ...
توحيد رؤى و اهداف النخب الاجتماعية ...كيف يعني ..
انو المثقفين بمختلف توجّهاتهم ورجال الدين بمختلف انتمائاتهم, الكتّاب و روّاد الكلمة بمختلف مشاربهم, هالشريحة من الناس كتير بيكون الهون تأثير على الاشخاص و العامّة ....لازم يتفق الاغلبيّة منهون على مجموعة نقاط مشتركة تكفل الارتقاء بعقلية الشعب و انماط تفكيرون ...
انتي عم تفترض انو السلطة عم تستثني المثقف من القمع و عم تتركلو هامش حرية يتحرك, بالعكس المثقف هو المستهدف الاول من قبل هيك نظام

اقتباس:
كاتب النص الأصلي : ابو نجبو عرض المشاركة
يعني ....كتير من الكتّاب و المثقّفين و رجال الدين بيحرضو عالطائفية و العنصرية ...عالعنف...تبرير الجرائم...تطرف ضد المرأة ...تكريس سلطة الرجل .....الكراهية الطبقيّة....الخ من الامراض الاجتماعيّة المستشرية بالناس ...ويوجد كمان بعض الاراء النخبوية تبالغ في طرح افكار التحرر الاجتماعي و التخلّص من قيود الدين و العادات و الاخلاق ..الخ
هدول النوعين من النخبة ما بيساهمو و لا بشكل من الاشكال بواجبهون المفروض عليهون من حيث التوعية و ايجاد اسس تطور التفكير و العقليّة للناس ....بينما الملاحظ هلاء انو دور هالنخب منحصر ببث أفكارو و أيجاد أي دليل على صحتها و الانتقاص من الاخر و اقصائو ...
بالضبط هون السؤال, انو اللي بتلاقي عم يحرض على هيك افكار بتزيد تخلف المجتمع طليق وما حدا بقرب علي و المثقف اللي بحاول يصلح يااما معتقل او هربان برا البلد

بتتذكر قصة الشيخ المجاهد ابو القعقاع؟ بتتخيل انو ببلد يدعي العلمانية يعتقل ناس متل اكرم البني وغيرو و بينترك هو يخطب بجامع و يحرض العالم على انو يروحوا على العراق يفجروا حالن؟؟ هي القصة هي اكبر دليل على مشاركة السلطة بافساد كل شي بهالبلد ومن هالاشياء الدين نفسو
انو انتي كمثقف ممنوع تعمل اي نشاط علني الا بموافقتن الضمنية و اي نشاط بتعملو بيلم حولك ناس بيخليك بنظرن خطر محتمل

التعامل مع المجتمع عم يتم من منظور امني فقط لاغير, يعني لا في مؤسسات ولا حزب بعث ولا غيرو ضباط الامن هني اللي عم يسمحوا لفلان و يمنعوا فلان و بس

اقتباس:
كاتب النص الأصلي : ابو نجبو عرض المشاركة
طيب هلاء التجمّع ممنوع حالياً ...شو منعمل ! نطالب السلطات بالسماح و نستنكر و نشجب تصرفات الامن ...طيب طالبنا و ماصار شي ..وبعدين...ننتظر لبين مايجي الفرج لحالو ....ولا منحاول استنباط طرق جديدة للتوعيّة ....!
مو ضروري يكون بصفة رسميّة ......بين الشلل و الاصحاب ....بالاجتماعات الخاصّة.....أغلب الشباب بتجتمع منشان تلعب تركس ...لو هالوقت الي بيضيعوه على شب الكوبة و بنت الدينار , عوضوه بتبادل الافكار و الطروحات والنقاش ...من أصل خمس اشخاص لو في واحد استفاد هالواحد رح يأثر على تنين و هالتنين على اربعة الخ الخ
برجع بقّلك المشوار طويل و صعب ..النتائج مارح تظهر لا بخمسة و لا بعشر سنين ...ازا الواحد بلّش هلاء
يا اخي يا ابو نجبو هدا الشي اللي عم تحكي اسمو جهود فردية, انتي لحتى تقدر تحقق انجاز بمجال توعية شعب مؤلف من 20 مليون بدك اعلام ..بدك منهج تعليمي بدك امكانيات تواصل بين الناس
الطريقة اللي عم تحكي عنها ولا بمية سنة يتعطي نتيجة
يا اخي انا ما عم قول يجينا هلق حكم ديمقراطي بس على الاقل حكم يخفف القمع شوي أخي بدن السياسة و الاقتصاد طيب صحتين على قلبن.... بدن يحطو سياسة التعليم ياخدوا يتهنو فيا بس يتركوا شوية حرية حركة للمثقفين و لتاسيس منظمات مجتمع مدني فاعلة



اقتباس:
كاتب النص الأصلي : ابو نجبو عرض المشاركة
عندك تلات حلول
يا أما تقعد طول الوقت تبكي على حالك و ضعفك و هوانك على الناس و تسبّ النظام و الحكومة ...
أو تحرّض امريكا و اسرائيل على احتلال البلد لتخليصك من قمع و استبداد النظام ...بس بهالحالة مابعرف كم مليون سوري ممكن يكفّو وقود لهالحتلال ...
أو تفكر كيف بدنا نغير حالنا ....وكيف لازم نتطوّر ....للوصول بالنهاية لمجتمع منفتح و شعب واعي ...
بتعرف انا اخر شي عايشتو بسوريا قبل ما اتركها كان عملية توريث الحكم, انا كنت اتخيل انو خبر موت حافظ الاسد رح يحرر الشعب من خوفو بس للاسف اللي شفتو مو شعب عم يتطلع ليتحرر من الظلم و عم يستنى موت الديكتاتور ليستغل الفرصة و يستعيد حريتو, لاء اللي شفتو هو شعب ما بقى يهمو شي ومابدو شي وما بتفرق معو شو عم يصير بمصيرو و القبضاي فين هو اللي سكت

بقى هيك شعب شو بدك تغير في؟؟

أنا أؤمن بنظرية تغير الاجيال, شوف مثلا بالمانيا جيل الستينات والسبعينات من الشباب كان ميال بشدة للعنف و التطرف الفكري لانن عايشوا فترة ما بعد الحرب العالمية الثانية و الاحتلال العسكري المباشر لبلدن و هالشي خلاهن ناقمين على كل شي ببلدن وبدن يغيرو بالعنف, بس الجيل اللي بعدن طلع مختلف تماما

نحني جيلنا راحت علينا فيك تقول تمسحنا وما حدا بدو يغير باي شي ولا عندو عزيمة ليغير شي

املنا بشغلتين: الجيل الجديد اللي عم يعرف يستخدم وسائل الاتصال و تبادل المعلومات بشكل كبير و اللي ممكن توصلوا مفاهيم نحني ما سمعنا فيها الا لما هربنا من السجن الكبير اللي اسمو سوريا

وتغير الظروف الدولية اللي عم تستفيد منها الديكتاتوريات العربية في اطالة امد بقائها متل ما صار لما انهارت دول حلف وارسو نتيجة تغير الظروف الدولية.

شكرا ابو نجبو على النقاش
  رد مع اقتباس
قديم 21/12/2009   #43
شب و شيخ الشباب Nihal Atsiz
عضو
-- أخ لهلوب --
 
الصورة الرمزية لـ Nihal Atsiz
Nihal Atsiz is offline
 
نورنا ب:
Feb 2008
المطرح:
دمشق
مشاركات:
350

افتراضي


اقتباس:
كاتب النص الأصلي : ابو نجبو عرض المشاركة
المغرب ..!! المغرب على اضرب ..
تركيا ...حلو هالكلام ...شوف تركيا بالخمسينيات و الستينيات ...كيف كانت و كيف صارت هلاء ...تركيا بالخمسينيات دولة علمانية بالاسم فقط ..القمع الفكري و الغاء الاقليات و سيطرة العسكر "حماة العلمانية" ...
وهلاء تركيا تطورت كتير و صارت أكتر نضجاً ....لكن كيف صارت هيك ....دعم خارجي !!..انقلاب عالنظام ..!! صارت هيك بفضل كفاح و تضحيات النخب السياسية و الثقافيّة التركية ....
عزيز نيسن...يساري التوجه و علماني الافكار .... كم مرّة اندك بالسجن ...كم مرّة يسكّرولو جريدتو و يرجع يفتح وحدة تانية بغير اسم ...
نجم الدين اربكان ...كم حزب اسس ...كل مرة ...بينحظر حزبو و يدخل السجن ...بيطلع و بيعمل حزب جديد و بيرجع للكفاح والعمل السياسي....
رجب طيب و عبد الله غول نفس الشي ..لاحظ انو هالشخصيات السياسية ذات توجّه اسلامي ...
شفلي كيف قدرت هالنخب السياسية تغيير سياسة البلد و توجهاتها لصالح أفكارون و مبادئون , الانفتاح و قيادة العالم الاسلامي ...تحقق هالشي بدون ما تمس نظام الدولة و بدون اراقة دماء ...بدون انقلاب ....
بقو يكافحو و يناضلو طوال تلاتين سنة حتى وصلو لغاياتون...مو سنتين تلاتة أو عشرة سنين...
وهاد اللي كنت عمبقولو بالمشاركة السابقة ...انو الكفاح من أجل التغيير, يتطلب الكثير من العمل و الصبر و الاصرار و المثابرة ....انته عمتغيّر مجتمع ..شعب كامل ....طريقة منهج التفكير..بدّك تنسجن و تتعذب و تنطرد برّة البلد و مع ذلك ما تيأس ...وتبقى مصرّ على اهدافك و ماتحيد عن مبادئك....مالك عمتعارض و تشتغل طمعاً بالحكم أو لغايات خاصّة ...متل المعارضة العراقية اللي صارو هلاء بالحكم و طلعو اوسخ من صدّام و نظامو ....

.
لأ المغرب مو على أضرب أبدا
الملك الحالي محمد السادس اعتذر رسميا عن التجاوزات التي حصلت باسم الدولة في عهد والده الحسن الثاني وشكل هيئة باسم هيئة الانصاف والمصالحة لاجل هذا الغرض, بينما في سوريا ترفض السلطة اي تحقيق في احداث الثمانينات التي ادت الى مقتل وفقدان عشرات الاف السوريين

المغرب يعترف باللغة الأمازيغية كواحدة من اللغات والهويات الوطنية, بينما يرفض النظام السوري الاعتراف بأية لغة غير العربية في سوريا.

يوجد في المغرب قانون احزاب , واحزاب معارضة لها نواب وممثلين في البرلمان والحكومة بينما لا يوجد في سوريا قانون احزاب او معارضة برلمانية.

انا لا أقول أن المغرب دولة ديمقراطية, ولكن القول انو المغرب اضرب من سوريا هو كلام بعيد عن الواقع وفيه اجحاف كبير.

بالنسبة لدولة تركيا فأيضا ليس من الصحيح مقارنة تركيا في الخمسينات بسوريا حاليا.
ففي تركيا قديما وحديثا يستطيع اي شخص ان يشكل حزبا سياسيا مناهضا للنظام العلماني او مؤيدا له ويشارك في الانتخابات من دون اية مضايقات, ولكن تبدأ المشاكل بالظهور عندما يفوز هذا الحزب المناهض للنظام العلماني بأغلبية المقاعد البرلمانية وهذا ما حدث مع اربكان, بينما في سوريا فبالأصل لا يوجد انتخابات حتى تشارك بها الاحزاب ولا توجد حرية لتشكيل الاحزاب فكيف لنا يا سيد ابو نجبو ان نقتدي بالنموذج التركي مع العلم ان نجم الدين اربكان قضى في السجون فترة ثلاث سنوات فقط بينما السوري رياض الترك قضى 27 عاما مسجونا وهناك شخصيات من حزب العمل الشيوعي قضت 16 عاما في السجون وايضا اسلاميين قضوا 14 عاما في السجون ومن الليبراليين يوجد الدكتور كمال اللبواني المحكوم 12 سنة ومثلهم يوجد الكثير, فمن يضحي أكثر برأيك ؟
  رد مع اقتباس
قديم 21/12/2009   #44
شب و شيخ الشباب Nihal Atsiz
عضو
-- أخ لهلوب --
 
الصورة الرمزية لـ Nihal Atsiz
Nihal Atsiz is offline
 
نورنا ب:
Feb 2008
المطرح:
دمشق
مشاركات:
350

افتراضي


اقتباس:
كاتب النص الأصلي : ابو نجبو عرض المشاركة
طيب كيف تأكدت ...
ليش مايصير فينا متل العراق مثلاً...؟

بالعراق تم التغيير بواسطة تدخل عسكري خارجي, في حدا هون شفتو جاب سيرة التدخل العسكري الخارجي؟؟

انا ماكنت عمبحكي على دور النخبة في فضح النظام و تنظيم الاحزاب السياسية و الدعوة الى الحريّات ....ياريت تراجع كلامي ...
كنت عمبقصد انو دور النخبة بتوعية الناس و محاربة الامراض الاجتماعية المستفحلة بين البشر من طائفية لعنصرية لحقد طبقي الخ .....هاد الدور غايب ....وكنت عمبقول انو قبل ما ننادي بالديموقراطية ...يجب علينا و على النخبة اعادة هيكلة الانسان لكي يكون مستعداً لاستقبال شئ اسمو ديمواقراطية ...
يعني بردّي السابق كنت عمبتسائل ..اذا انا هلاء قلت انو ياجماعة ...ياناس...يابشر .... تشغيل الاطفال تحت سن ال12 خطأ ...يا أب لمّا بتشغل ابنك الصغير بتكون عمتعرضو لتحرشات ولا سمح الله يصير اغتصاب ..ياصاحب المحل أو الورشة ...اذا اجاك حدا بدّو يشغل ابنو عندك لاتقبل ...اذا صرلو شي للولد رح تكون انته مسؤول امام ضميرك ...شو فيو هالحكي ...عمبسب حدا أنا ...عمبضرّ حدا .... معقول بجي الامن بيشحطني على كلامي هاد...!!

ومين قلك انو مافي عالم عم تناقش وتطرح هالأمور؟؟
من المعلوم ان افضل وسيلة تستطيع ايصال الفكرة من خلالها للناس هو التلفزيون
بالنسبة لعمالة الأطفال مثلا هناك فيلم سوري يدعى ( حجر أسود ) تناول هذه المشكلة التي تتفاقم في سوريا
وتم تخصيص حلقة حوارية كاملة عن عمالة الاطفال في قناة بردى المعارضة في برنامج الخطوة الأولى الذي يقدمه الاستاذ عمار عبد الحميد نجل الممثلة القديرة منى واصف
وقبل ذلك تم طرح نفس الفكرة في قناة زنوبيا المعارضة, وما كان من النظام الا ان قام بالتشويش ومحاربة هذه الاصوات الاعلامية فاختفت قناة زنوبيا نهائيا واختفت قناة بردى لمدة اسبوع واحد ولكنها عادت من جديد ولا ندري ما سيحل بها بالمستقبل.
اعود واقول اساس المشكلة هم السلطة الحاكمة في سوريا, والحل لكافة المشكلات يبدأ بالخلاص منهم.
  رد مع اقتباس
إضافة موضوع جديد  إضافة رد


أدوات الموضوع

ضوابط المشاركة
لافيك تكتب موضوع جديد
لافيك تكتب مشاركات
لافيك تضيف مرفقات
لا فيك تعدل مشاركاتك

وسوم vB : حرك
شيفرة [IMG] : حرك
شيفرة HTML : بليد
طير و علّي


الساعة بإيدك هلق يا سيدي 13:09 (بحسب عمك غرينتش الكبير +3)


Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
Page generated in 0.23160 seconds with 13 queries