هل أنت متفائل أم متشائم من الحياة ؟

[Placebo]

أوكيه رح أكتب هذا الموضوع لشوف عدد المتشائمين والمتفائلين بالحياة وهل عندهم رغبة بإكمالها أو أن تنتهي حياتهم بأقرب وقت ممكن .. يومياً بصادف الكثير من الناس يللي بتقول أنو متفائلة ومبسوطة بعيشتها وأنو مافي أية مشكلة بحياتهم وهني بحبو الحياة .. بينما بنلاقي ناس عم تلعن الساعة يللي إنخلقت فيها ويللي عاشت فيها هيك عيشة .. وهذا الحكي ما بينطبق بس عالفقراء وكمان عالأغنياء ويللي معهم مصاري كتير بس بتلاقيها بالرغم من ذلك متضايقة من عيشتها لأحد الأسباب ..


أنا بالنسبة ألي ما بعرف شوبدي قول .. بس بالرغم من أنو حالتي المادية ماشي حالها وأنو أنجزت شغلات كتير بحياتي من إخراج صحفي عالكمبيوتر واحتراف التصميم عالفوتوشوب وبرامج التصميم الكورل والإليستريتر والبيج ماكير وكذلك إتمامي للغة الإنكليزية تماماً وحصولي بنهاية الصيف هذا على شهادة الآيلتس وكذلك اللغة الإيطالية بشكل نصفي .. ولكن مع ذلك حاسس أنو حياتي مالها هدف .. حاسس أنو الله عم يعذبني وليش ما بعرف .. في كتير أشياء بتخليني متشائم من الحياة ولهالسبب العالم بالخارج بتشوفني متشائم ومكتئب دائماً ..

يمكن الأسباب بتعود لأني عشت بعيلة إسلامية منغلقة على حالها وأنا فكري متحرر وعلماني ولحد الآن عايش بينهم بس ما بقول هالحكي إلهم مشان ما يتركوني .. يمكن لأني عشت حياة طفولية سيئة كتير تعرضت فيها لكل أنواع الممارسات السيئة من ضرب دائم ولظلم وحرمان وفقر وحبس في المنزل وخصوصاً إني كنت عايش بالسعودية وأنتو بتعرفو كيف الإسلام هنيك يللي للأسف سمم أهلي بأفكار سلفية وهابية كالعادة ..

يمكن بسبب مرض الأسبيكوشلاتر يللي عم ياكل ركبتي اليمين وعم يدمرلي حياتي لأنو وجع ركبتي عم يضايقتي .. وهذا الوجع يللي صرلو سبع سنين ولحد الآن ما لقيت علاج عند أكتر من دكتور .. كل ما أتوجع من رجلي باخد حبة مخدر مشان تنيمني طول اليوم وتنسيني الوجع يللي جواتي ويللي بركبتي ..

يمكن لأني ما بخالط الناس والسبب هو قلة المعرفة بأهل الشام .. ولأنو ما عندي رفقات وبخجل بقول هالشي إدام حدا .. وكمان خجلي الزائد يللي كان الحبس المنزلي أكبر سبب بنشوء خجلي الغريب .. والعزلة يللي عم عيشها مع نفسي وإبتعادي عن العالم يللي صاروا ياخدوني مسخرة لإلهم عالطالعة والنازلة ..

يمكن بسبب أني فاشل بالدراسة وصرلي أربع مرات عم قدم بكالوريا وعم إرسب وبعرف شو سبب رسوبي وهو أنو راسي عم ينفجر من التفكير بالعالم التانية وبحياتي قبل الدراسة .. حاولت ابتعد عن كل شي رفاهيات عني ولكن للأسف ماعم إحسن إضبط تفكيري حتى لو كنت بغرفة أربع حيطان بطاولة دراسة بس .. يا عالم بدي فوت عالجامعة وماعم إقدر لأني فاشل بالدراسة .. والله شيء بيضايق كتير ..

يمكن لأني حبيت مرة وحدة عن جد وحدة مسيحية متحررة بس للأسف ماعادت تهتم فيني مع أنو بالماضي كانت مستعدة تضل معي حتى لو كلفها الأمر تروح وين ماروح أنا .. ولكن يبدوا انها تراجعت مو بس عن الحب .. حتى صداقتي معها على الحفة وأنا صابر عليها .. ما بلومها لأنو خجلي وإكتئابي بحد ذاتهم مرض معدي للغير ... وخايف يجي هداك اليوم يللي شوفها عم تقلي أنو في واحد تاني بحياتها وأنو أنا خلص صرت متل إلتك!


أرجوكم أعذروني عن الفضفضة الزايدة .. ولكن حبي هالمنتدى يللي كنت دائماً متابع له وهو المنتدى الوحيد يللي فيه ناس عاقلة وبتحكي بالعقل والمنطق قبل الدين والعادات .. هذا المنتدى الوحيد يللي جعلني أحكي يلي براسي .. فآسف عالإزعاج إذا كنت ضايقت حدا..

تحية!

[قهوة دايمي]

صديقي ..
فضفض ... وما تحط بقلبك ... هاي أحسن شي ممكن نستفيدو من فكرة المنتدى .. انو بنتشارك الهم ..
فضفض .. و بدي اتمنالك الشفا .. والنجاح ... !!

انا يمكن يكون متشائل ...
لأنو بعتبر انو التشاؤم مو هوي اليأس ... والتفاؤل ما بيكفي لحتى نوصل !!

كل شي بيرجع لإرادة الانسان ..

[Placebo]

شكراً على الرد المشجع سيد قهوة دايمي .. بصراحة أنا حالياً عم فكرة بهالأسبوعين قبل كل شيء إستشير طبيب نفسي .. قبل ما تزيد الأمور للأسوأ .. بالرغم من الضغط المالي يللي أنا فيه ولكني مستعد قدم هذا الشيء مقابل عدم خسارة مستقبلي ولأسباب نفسية كالعادة ..

تحية لك!

[ِAbu Alzooz]

و الله أنا متشاءم
و لو لم تكن الحياة صعبة لما ولادنا و نحن نبكي

[نائب الرئيس]

اييييييييييييييييييييييه....


يا ريت ما يصير معنا اللي صار معك .....


انا متفائل مع كل الشؤم في الحياة والظروف السياسية السيئة .....
والظروف الاجتماعية الاسوأ ....


لكنما يابى الرجاء يموت .......

[راديا]

اول شي بكون متشائمة و بعدين اتفاءل احسن ما اتفائل و تصيبني خيبة امل مريرة مشن هيك بس متشائمة عالاغلب و الا ما نلاقي امل بين هالتشاائم ...

[Remember Me]

بصراحة رغم كل المصايب يلي عم تنزل على راسي وحدة ورا وحدة ... بس سبق وجربت مصيبة كانت كتير كبيرة عليي ... من وقتها صرت لاقي كلشي غيرها سهل ... وصرت متفائل بكلشي

[ما بعرف]

والله يا شباب انا هي عادة (التفاؤل والتشاؤم ) بطلتا من زمان
لانو بتكون الشغلة ماشية تمام 100% وما بتظبط
وشغلة دعست عليها ومشيت بتلاقيها نطت بوشك ظابطة وما احلاها
اي عيفونا يا لسا تفاؤل وتشاؤم وضراب السخن

[كل مره بزعل وبفل]

ال متفائل ال
والله لو شو ما صار ما بتفائل
حتى لو صا كل شي حولي حلو غير ضل متشائم لاني بكون عم بحلم
ثاااانك يووووووووووو سو متششششششششش

[Miss Karmoosheh]

سيدي أول شي مش غلط تروح تراجع طبيب نفسي ((يعني علشان تفضفض قد ما بدك))

تاني شي انت هلأ بالشام يعني طلعت من السعوديه يعني فيك تغير كتير شغلات من حياتك

تالت شي التربية الاسلاميه مش المفروض تعمل فيك هيك المفروض تعلمك الثقه بالنفس أكتر إلا إذا أهلك ((الله يسامحهم)) كانوا عم يعلموك اياها غلط!!!

يعني لما تكون متضايق كتير جرب صلي ركعتين لرب العالمين و أقرأ سورة من القرآن و اتـكد أنك رح تتحسن

حتى بالنسبه لمرض جربت شي مره تدعي رب العالمين من قلبك انه يخفف عليك و يشفيك؟؟!!
أهم شي لما تصلي و تدعي لربنا كون واثق انه ربنا رح ينفذ إللي بدك اياه لو مش عاجلاً
بس المشكله انه نحنا ما بنصبر يعني بنطلب من ربنا و بنكون بدنا الاجابه مباشره!!!

و اعتبر كلي إللي عم يصيرلك امتحان من رب العالمين

أهم شي ادعي ربنا بقلب صادق و ابكي لربنا و اتذلل و ان شاء الله حتتحسن كل حياتك

((شغله كتييييييييييييييييييييير مهمه))
وانت عم تدعي كون متأكد بداخلك انه ربنا رح يستجيب

و الله مريت بكتييير شغلات و لجأت لرب العالمين و الحمدلله تحقق إللي بدي اياه بعد فتره

الله يخفف عنك و يوفقك بحياتك

[verocchio]

ما في متشائم أو متفائل على طول كل لحظة تحمل في طياتها انقلابات مزاجية
على العموم لا يمكن المضي في الحياة من تفائل فهو مثل الألوان في لوحة

[Ms. J.A]

كنت حطلب تحط خيار متشائل !
لأنو انا هيك
متشائلة
في كتير مصايب بتصيب الواحد بحياتو خيو
مصايب يمكن اكبر كتير من المصايب اللي عندك اياها !
صعب تعيش حياة مرتاحة وما فيها تعب
عشان هيك لازم تعود تحلّي حتى الموت عشان ما تنفجرش وتموت بدري
كتير منيح بيكون لو استشرت دكتور نفسي
مش عيب نهائي ولا غلط
بالعكس اشي كتيييير منيح وبيدل ع انك فهمان
وبدك جد تطلع من الوضع اللي انت فيه
موفق
وقلبي معك

[Maher 4x4]

كتير حلو هالسؤال

أنا متفائل لأنو في خير

وبتشائم من اللي ما بيقول في خير

ولولا مافي خير ما كنا منشوف خيار

[pioneer]

صديقي
اول شي الفشل اول خطوة لطريق النجاح بشرط انه ما يخالطه اليأس
خلي ثقتك بحالك اكبر من هيك ال شي يلي حققته مو قليل والبكالوريا والجامعة مو كل شي
توكل عالله واطلب منه المساعدة وحاول تفهم دينك صح
قطرة الماء تحفر في الحجر بالتكرار لا بالعنف
ركز اهدافك وصفي ذهنك و قول يا رب ورح تلاقي نتيجة و بس خليك صبور
بتمنالك التوفيق من قلبي

[Placebo]

شكراً إلكم عالردود المشجعة يللي خلتني إنبسط بأنو في عالم لاحظت الوجع يللي جواتي ..

Miss Karmoosheh

شكراً إلك عالمداخلة اللطيفة .. ولو إنو صدقيني ساويت كل شيء قلتي عنوا .. دعيت ربي وقريت قرآن كتير وتركت كل شهوات الدنية كرمال إرضي ربي .. بس ماعد تحملت وحالتي صارت أسوء .. نعم بعترف أنو عائلتي أثرت كتير عليي بسبب الدين .. لأنو حرموني من كتير شغلات بصغري ولحد هلأ كمان .. حرموني أية نوع من أنواع الرفاهية .. حرموني إني إختلط بالعالم الخارجي وقت كنت صغير .. حرموني كل شي رفيق ما بيصلي أو مو مسلم وخلوني إحكي بس مع طلاب الجوامع يللي مافي بيني وبينهم شي ينحكى .. خلوا شخصيتي ضعيفة وكل هذا بسببهم وبسبب كلمتهم (الإسلام ما سمح بهالشي) .. خلوني إتمرد عالدين وكرهوني شي إسمو إسلام بسببهم .. وبالآخير عم تسأليني ليش صرت علماني ما بآمن بالدين ..

عموماً شكراً مرة تانية على مداخلتك اللطيفة .. وآسف من كلامك إذا ضايقك

LaMoUsH

شكراً كتير على كلماتك المشجعة .. بعترف أنو في كتير عالم مصايبها أكتر من مصايبي .. وبعرف أنو كل واحد في إلو مشاكل بحياتو ومو بس أنا .. بس كمان بنفس الوقت .. أوجاعي النفسية وأوجاعي الخارجية عم تخليني إتمنى الموت .. إنعزاليتي عن الخارج عم تخليني إتمنى الموت بدال الحياة .. يمكن عم بالغ .. بس هذا الأمر صرلو من أكتر من أربع سنين وأنا عم قول (بكرا إنشالله بيكون أحلى) .. الصيف الماضي عانيت من نفس المشكلة ولكن هالصيفية عم حس بإكتئاب أكتر لأنو الأمر تكرر للمرة التانية عالتوالي .. عم حس حياتي سودا لهالسبب ..

شاكر إلك كلماتك الحلوة مرة تانية .. وبشكرك عالمجاملة اللطيفة منك ..

pioneer

للأسف يا عزيزي أنا حطيت أمل الدراسة براسي مشان إترك هموم الدنية وإلتجئ لدراستي مشان عوض بالمقابل عن حياة العزلة تبعي .. حاولت إني أتفوق عالعالم يللي بشوفها عم تتسلى وأنا قاعد ببيتي وماعم إعمل شي .. حاولت إني إدرس مشان فرجيهم .. لكن للأسف طلعت بالآخير أسوء منهم وبرجع وبقول ما بلوم حالي .. حاولت صفي ذهني ولكن عبس .. تفكيري عم ياخدني ويجيبني وماعم يخليني ركز على شي ..


تحياتي إلك وشكراً على الكلمات الحلوة منك

[Ichigo]

انت متشائم لانك تحس بالفراغ ما تسميه انت بالتحرر قبلت ان تتخلى عن دينك من اجل هدف وهمي انت بنفسك لا تعرفه اخي ان كنت تؤمن بالله فسترى الخير في كل ما يحصل معك انت ترى الجانب المظلم من الحياة لانك تعيش في الفراغ الذي اوهموك بانه تحرر اياك ان تستسلم وجد هدفا تحيا لاجله وليكن هدفا يستحق ان تعمل لتحقيقه ولا تفكر كثيرا في الماضي .ان وضعت كاس ماء امامك فحاول ان ترى انه نصف مملوء وليس نصف فارغ.

[tiger]

متفائل و نص و خمسة .....

[اميرة الظلام]

بيقولو تفائولو بالخير تجدوه .....مافيه شي يجي بالسهل

يعني الحياه فيها مصاعب ومشاكل انو مافي حدا ماعندو مشاكل بس أكيد بأرادتنا بنعديها بخير ونكمل الطريق

شو بنعمل ..هذا قدرنا