حوار تحت ضوء القمر

[الدنجل]

حوار تحت ضو القمر

بين زوج سكران وزوجته الصاحية



- شايفة القمر فوق حبيبتي

- إيه شايفتو حبيبي ...يالله ماأحلاه

- يعني القمر لسّاتو طالع ..

- إيه حبيبي ...لسّاتو طالع ..

يخرج من جيبه مسدساً ويضرب باتجاه القمر ثلاث طلقات ...فينطفيء

- لاء..لاء..ليش قتلت القمر ..موحرام عليك

- أنا حرام علي ولاّ هو ...

- ليش حبيبي ..شو عملك القمر

- شو عملي ..قولي شو لسّا ماعمل...شوكان لسّا بدو يعمل لو خليتوا متمتطرق فوق وعم يضحك على هالبشر.. موهو اللي خلاني أحبك واتجوّزك ...مو هوّ اللي كان يتدلى كل يوم لقلب غرفتي وأنا نايم ويخليني أحلم بالبيت وبالسيارة وفيك إنت ..

- وهي أنا جنبك حبيبي القمر ماكذب عليك ..

- ولك شلون ماكذب علي شلون ...هو وصفلي وحدة شعرهاأشقروعيونهاخضرجيتيني إنت...وصفلي بيت بسبع غرف وحمامين ...وشحي ساكن على سطح بناية بغرفة مافيها لاحمام ولابطيخ مبسمر ...وصفلي سيارة موديل سنتها عمتسرح هيك على طريق كل ورد وشجر ...وصرلي يومين عما فكر من وين بدي جيب حق كندرة جديدة روح فيها عالشغل بعد ما اهترت كندرتي من الطين والحفر...ولسّا عمتقولي ما كذب علي ..

- وأنا حبيبي نسيت كل الكلام الي قلتلي ياه قبل ما نتجوز ...نسيت شلون كنت تغنيلي تحت ضو القمر...ولا ازرعلك بستان ورود ...وشجرة صغيرة تفييكي

- أيه وشو عليه ...وهلق كمان بغنيلك ...ويضرب القمر وضوو ...

- غنيلي لشو ...

- ولا ازرعلك بستان قرود ...تعبي البيت وتشويكي

ولا تركلك بيتي واهج ...واخلص من بلاويكي

واللا قلك ...خدي إنت كمان ...

ويطلق عليها ثلاث رصاصات